[jano.]

كاتب النص الأصلي : Nay

من فعلها بنا؟!
من اختصر المجتمع بهذا السوء؟!
من أعمى عيوننا و عقولنا؟!
من شابه بين الأفراد على رغم اختلافهم؟!
من حوّل هؤلاء الأفراد الذين يتسلّقون أعمدة الصحف كل صباح باعتبارهم مواطنين، ليُلقى بهم في الحاويات مساءً على أنهم فضلات.

بتصور أنو نحنا بشكل عام تم رفع منخيرنا زيادة عن اللزوم، في شي بيميزنا ويفضلنا عن غيرنا، بس هالشي مانو موجود فعلياً، شي بيحيّر
كتاب القومية وحكي الحكومة ورجال الدين زرعو فينا مفهوم انو نحنا أفضل من غيرنا، بس على أرض الواقع عم نعيش التعتير والذل والفقر وعم نشوف غيرنا "يلي نحنا أفضل منون" عايشين بألف نعمة، فيمكن مشان نصحح هالخلل ونعوض هالفرق بنشتري أغلى موبايل ونأجر أحلى سيارة (حتى لو بالدَين وبعد الشحادة) ونتشبه بفلان وفلانة، المهم ولو بالمظاهر والبهورة أنو نحس حالنا متل غيرنا عالقليلة.

مافي مانع يكون عنا "فقير" وغني -هيك الدنية وهيك البشر طول عمرون مختلفين- بشرط أن يكون أفقر مواطن عايش بكرامة، بس طبعاً هالشي غير وارد بسوريا.
المفروض يكون في فوارق واضحة بين الناس من حيث الوضع الإقتصادي وأنو الكل يتقبل هالشي ويعيش ويدير مواردو الاقتصادية على حسب قدرتو ووضعو، بهالحالة رح تركز الناس ع تحسين وضعها فعلياً، إن كان من الناحية الإقتصادية أو من ناحية الوعي بكل مجالاتو (وهاد أهم شي)، غير هيك رح ياخد التقليد عقل الناس ويصرفو كل طاقاتون ليعيشو عيشة وهمية والفقير رح يضل طول عمرو فقير والجاهل رح يضل طول عمرو جاهل ومارح يطور نفسو.
طبعاً مالازم نحط الحق كلو عالوضع العام بالبلد، مع أنو سبب كتير مهم (وهون بضيف على تساؤلات طالب ابراهيم: "من يريدنا ان نبقى هكذا؟"). الشغلة بدها وعي وكل واحد فيه -إذا قدر يتحدى الكليشيه الحالية- أنو ينجح بالحياة وما يلتفت لهيك أمور.
--------

إذا كانت الثورة قد فعلت فعلها. فقد حولت الأرض لمن يفلحها، والمعمل لمن يعمل به، فمن حوّل الناس؟! من خلطهم بهذا الشكل الغريب، ليغدوا عصييّن عن التصنيف؟!

هي كمان شغلة. أنو هالثورة اجت ضحكت علينا وراحت! عم نشتغل بالأرض وبالمعمل وماعم نقدر نعيش. وفي ناس غيرنا يعني شي متل السحر! كيف عايشين هيك فوق الريح مع أنو كانو متلون متلنا ويمكن مؤهلاتنا أفضل من مؤهلاتون؟ يالله، خلينا نقلدون ونعمل حالنا عايشين متلون مشان تصدق نظرية الثورة ولو بالمظهر