علم المرصد السوري لحقوق الإنسان ان محكمة امن الدولة العليا سيئة الصيت أجلت يوم الأحد 8/06/2008 محاكمة الشاب السوري كريم عربجي إلى اجل غير مسمى وبررت المحكمة التأجيل بعدم جاهزية مقر المحكمة الجديد في حي المزة بدمشق من ناحية السلامة والأمن وإمكانية فرار المعتقلين من مبنى المحكمة....
بس عندي نقطتين بدي علق عليهن أول شغله بحياتي ماسمعت شي اسمو أجلت الجلسه لأجل غير مسمى شو وين عايشين في محكمه بدون مواعيد؟؟ بكل الدنيا ممنوع تحتجز الشخص قبل التأكد من انو مجرم و بكل الأرض الناس بتتمنى تخلص تحقيق و تتحول على المحكمه مشان يبان الحق إلا عنا القاضاة و المحاكم متل رجل الكرسي (( رجل اكرسي أهم ببعض الأحيان)).
و النقطه التانيه محكمة أمن الدوله بنص البلد و محاطه بالمخابرات أكتر من البيت الأبيض و الشارع يلي بيوصل للمحكمه مسكر من الجنبين و بعدين بيجو بيقولولك أجلو المحكمه خايفين المتهمين يهربو.. سمعت كتير صفات عن كريم و المشكله اني مابعرفو شخصي بس ما بتخيل سوبرمان لدرجة انو ممكن يهرب من محكمة أمن الدولة لك ياناس الواحد بسوريا مابيقدر يهرب من شرطي مرور لحتى يقدر يهرب من محكمه امن الدوله.. رحمونا شوي و الله تعبنا.
الحرية لكل أسرى الحرية في سوريا...
العربي الذي لايجرأ من الذل والخوف على رفع رأسه لرؤية القمر !!!
كيف سينتصر على غزاة القمر؟؟!!
|