[Hus]

طيب. ...

كاتب النص الأصلي : butterfly

قدي رح تكون نسبة الحقيقة بأجوبتك ؟وقدي المجاملة ؟وقدي التهرب ؟ ( نسب من 100 )
الحقيقة 95% المجاملة 2% التهرب 0% وفي 3% مزاججج

اول شي مافي تهرب، في شيئ فيني جاوب عليه وفي شيئ مافيني جاوب عليه ، الجزء الي مافيني جاوب عليه ما هوي تهرب من الإجابة ، وانما ببساطة انو مافيني جاوب عليه "سواء سؤوال شخصي _وعدم الإجابة عن سؤوال شخصي ماهو تهرب وانما هوي تعدي على خصوصيتي من قبل طارح السؤوال_ سواء لضيق الوقت ، سواء سوال عام جدا ، من النوع تبع يش يش ونص ..

عن المجاملة انو بحاول جامل ، و بضلني عم حاول جامل ، بعرف المجاملة شيئ منيح (او للدقة هوي شيئ الناس بيحبوه لا اكتر ولا اقل) ، بس على الأقل هون بالمقلاي وانت عم تتشوي و الزيت عم بيطرطش من حواليك .. ما رح تلاقي وقت تجامل فيه ، ولا رغبة .. خوش المجاملة بدها مع سبق الإصرار والترصد ..


بشو بيختلف Hus عن حسام ؟ وليش هالمسافة بين التنين موجودة ؟
ههههههههه .. لاء مافي فرق ، هوي اثواب ليس اكثر، لمن بلبس توب Hus _قائم بأخوية هون _ فبتصرف من هال المنطلق ، وبفكر من منطلق مصلحة اخوية، و بتعاطى من عقلية فلسفة اخوية .. لمن بيصير في قائم آخر على آخوية ويعود Hus عضو ، رح يصير الثوب Hus توب عضو ..رح يكون بيجوز اقرب ل حسام او هيك شي ..


ليش " يش " مسافة من الخصوصية ممنوع الناس تفوتا ؟ ولا قلة وقت فعلا ً ؟ ولا ضيقة خلاق ؟
وضحت سلفا انو يش هيي عم هز راصي ، فسواء السؤوال غلط (مسؤول بطريقة غلط) يعني متل الأسئلة العامة العريضة او سؤوال سازج .. او السؤوال فيه تعدي ما على خصوصي ما .. (وهون بلوم الي بتعاملو مع الآخرين على انهم مرفقات واملاك عامة .. انا مش بنك بحديقة، انا مش ملكيي عامة ..) بالمناسبة حكيت هون وفوق عن الخصوصية بس بالأسئلة الي انطرحت ماكان في شيئ فيه تعدي على الخصوصية .. بس انو الحكي بيجر الحكي .. مو اكتر ..

قلتلنا الله من شو بريئ ؟ بشو برأيك هو متهم ؟؟
فكرت بس ما طلع معي شي ... ما بعرف بشو متهم .. بيجوز ما بيهمني ..

هل بتجد صعوبة

• أنك تثني على شخص

هق بس بحب اعطي كل شيئ حقو لا اكتر ولا اقل (لمن شايف الألف ليرة بتشوف المليون رقم كبير ، بس لمن تشوف الميت مليون بتبطل تشوف المليون رقم مهم ، بتصير المليار هوي الرقم المهم او الكبير بنظرك .. )

• تعترف بحاجتك للأخرين
  

كمان هق ، انو ما عندي صعوبة بالقول بحاجتي للأخر لمن تكون موجودي .. بس السؤوال ليش الآخر بيبقى معتقد انو ممكن في حدى يحتجلو من اساسو .. قليلي المرات الي بحس فيها بحاجة للآخر (هيك هبش او بالجملي الآآآخر ) انو اوقات بحس بحاجة لشخص معين بعينه وزاته ، وبوقت تاني لشخص آخر بعينه وزاته ، بس على العموم حتى هاي المرات صارت لسبب او آخر قليلي .. (بعدين تعي لهون شو هال السؤوال الداخل ببعضو)

• تعتذر وقت بتغلط
  

كمان و كمان هق .. عادة في برصيدي كم من الإعتزارات موزعها اكتر من الأغلاط بكتير، .. بالعكس يعني بعتذر عن اغلاط ما مرتكبها ولا مقتنع فيها ، من باب وئد الفتنة ، او مثلا انو طيب يالله اسف ياشباب خلصونا بقا

كنت تكتب " تخربش شغلات حلوين " ليش وقفت ؟؟
الوقت ثم الوقت ثم الحاجة ..

راضي عن أدائك بأخوية بالفترة الأخيرة ؟؟
لاء.. بس بقلك شغلي .. انا بولا وقت كنت راضي عن الأداء، بس بكل وقت كنت راضي عن نفسي ، اصدي كيف ، الأداء ككل النهائي بولا وقت حسيت انو اوووه هيك تمام ، هيك الأمور ماشية متل ما بدنا ونص، بس دائما كنت عم بشتغل بكل طاقتي المتاحة (هون لمن بنقول بكل الطاقة المتاحة بيعني ، انو ممكن فترة كون فرضا امتحانات و بالتالي وقت الفراغ ساعة لمن تشتغل ساعة هاي كل طاقتك، واوقات بيكون روقان ، فبيكون فيك تشتغل 18 ساعة وبتكون ال18 كل طاقتك .. و هيك .. )

لأيمتى " الطب " ؟؟
لوقت قريب

خلال كل سنينك بأخوية .. في شخص ممكن تعتبرو صديق لألك عن طريق أخوية " يعني مو كان صديقك من قبل .. " لأ" أخوية جعلت من هالشخص صديق ؟؟
اي طبعا .. في كتار (مش مليون) بس في كتار .. بس ما بدي اذكر مين ..

بتبكي ؟؟ على شو ؟ ( أتوقع ال " يش " بس شو بدنا نسوي )
لاء .. (هلق انتبهت انو نص الأجوبة تبعونك جوابهم لاء ههههههههههه)
بس مش لإني حجر يعني وانما بيجوز لإني يا ما بتعرض لمواقف بتبكي ، يا ما بخلي حالي اتعرض لهيك شي ..
كيف بدي قلك ، انو مثلا لاحظت من جديد اني اوقات بموقف ما انا وعم بحضر فلم بحس غصيت .. _انو انا بعدي جديد على عالم الموفيز و التي في شوز وهيك مسائل_ فمثلا لمن لاقي انو بهذا النوع من الأفلام ممكن غص او يابا دمع ابطل بحضر هذا النوع .. وكفاها الله
متل افلام الرعب ، انا بنقز ، انو عادي يعني بنقز وبقفط وهيك .. حضرنا مرة فلم رعب و تاني مرة فلم رعب .. بعدين خلص ولا في قوة بالدنيا بتخليني احضر فلم رعب ، حتى لمن بالصدفة عم قلب ويطلع شي فلم فيه شي ممكن ممكن يقلب رعب ، او تطلع شي سكين تخرط شي واحد .. بلحظتها بقلب ، انو ببساطة "شو الله جابرني؟؟ احضر شيئ بينقز ، احضر شيئ بيغصص وهيك .."

خلينا نحكي شوي عن الكتب ؟
بتفكر تكتب كتاب ؟ عن شو إذا إي ؟ وشو بتكتبلي إهداء ( واثقة من نفسي ) ؟
ما عندي رغبة احكي عن الموضوع جملاً _الآن_

شو اكتر مجال بيشدك تقرا فيه ( يعني رواية - شعر ولا قصة .. علم نفس سياسة ... إلخ ) ؟
هممم .. كنت قبل ما اقراء غير ادب "رواية - قصة" هذا سابقا .. (يعني تقريبا لغاية سن ال 21-22) .. بعد ذلك صارت قرائاتي كلها بين علوم اجتماع ، علوم سياسية، اقتصاد السوق.. تاريخ معاصر، فلسفة تحليلي او الي هوي النمط القديم من الفلسفة .. (اقصد بالقديم يعني الأمهات بالنظريات الفلسفيي التحليلي)..تاريخ التجارب ، او شلون بدي قلك ، الجزء من التاريخ المعاصر في تجارب الشعوب الناهضة ، الي قدرت بفترات تعمل شي ، سنغبور، الصين ، اليابان .. .. و بالجزء تبع التاريخ بيعجبني ايضا التاريخ المزوّر الي هوي بيكتبوه المنتصرين .. (انو التاريخ عامة بيكتبوه المنتصرين) واكبر كذب بيكون عن لسان المنتصرين .. فتقري السير الذاتية لرئيس/وزير خارجية .. الخ .. بتشوفي اكبر قدر ممكن من التزوير في التاريخ ولمن بتكون كمية التزوير كبيري بتقدري بسهولة ما.. تعرفي التزوير وين عم بيصير ، بمعنى بتقري التاريخ الصح من على لسان كبار الكذابين (او اكثر مين عندو مصلحة بالكذب) بيمكنك من الجزم بحذف اجزاء معينة او هوي الي بيعطي ادق الصور للتاريخ و حقيقته .. يعني اذا عم تقري تاريخ عادي بنسبة تزوير صغيري ما رح تعرفي بالتزور، ما بيبان التزوير ومنه الحقيقة غير من نسب التذوير بتكون كبيري .. (ما بعرف اذا وصلت الفكرة ..)
بالنسبة للترفيهي بقرا جغرافيا و عربي، هدول بوقت الترويح عن النفس او هيك للتسلية و ما اليه .. (طبعا بالإضافة لمجلة ميكي )

ببيتك هلق كام كتاب موجود ؟؟
انو كتير بس ولا مرة خطرلي عدون ، في الحيط الجمبي اول ما اخدت هاي الشقة فصلت مكتبة فيه على ايدي هوي الحيط بعرض شي 3متار 3 ونص، و فيه خمس رفوف على طول الحيط .. فمدري شقد بيطلع الكتب .. بس على العموم حتى الكتب العني مش كلها قاريها او جايبها ت أقرأها ، في جزء يسير من الكتب الأرشيفية الي عندي هيي ارشيفية او مراجع يعني ..
طبعا متل حالنا جميعا مؤخرا خفت كتير الحاجة للكتب الورقية، ببساطة لإنو الكتب الإلكترونية بتيح وسيلة البحث ، وهذا جزء صار الي متعود يقراء الكتروني يحسب بغصة بالقراءة الورقية لمن بدو يبحث عن كلمة ما او ما اليه ..


شلونك أنت والشوكولا ؟
يش يش

برجع
لا مافي لزوم ..