جواب طويل شوي ... من وحي الجو
الليل  بعشقو
كيف ابتديت علاقتي بالليل ... هي كانت بالسنة رابعة جامعة
أهلي كانت الدراسة عندهم ما بتصير إلا الصبح بكير وأنا ضد تماماً ... هيك ما بحب الفيقة بكير
لأن أنا بطبعي ما بحب الصخب وصوات العيلة ... بحب أقعد بسكون أكتر
المهم شوي كان وضع الدراسة بالبيت بهديك الفترة صعب فكنت انتظر ليصير ليل والكل ينام وأقعد أدرس وجنبي كاسة الشاي ووقت الاستراحة أحضر التلفزيون
بعدين عرفت أنو رفيقتي متلي بتسهر بالليل  وصرنا نحكي عالتلفون بالساعات ... طموحاتنا ،أحلامنا ، آمالنا
طهر الحب الأول بحياتي بهالفترة وكمان كنا نسهر عالتلفون كتير
تعلقت بالسهر أكتر تعلقت بالليل أكتر وأكتر رغم تغير الأشخاص اللي كانو يشاركوني السهر بالليل
سافرت وتركت البلد وضليت محافظة على هالعادة مع انها متعبة مع نمط الحياة الغربي
بس مو بإيدي بحب الليل وبتمنى يطول أكتر وأكتر
بعد غيابي الطويل ولما نزلت عالبلد بسهرتي الأولى بعد هالغياب كانت معي رفيقتي شريكة السهر وحكينا متل أول ونحن غرقانات بأفكارنا صوت ما تصورت إني بيوم رح افقتدو .. وهو صوت الأذان ... ما بعرف ليش لما سمعتو حسيت وقتها قلبي بدي يدق بشكل سريع وذكرياتي تزاحمت براسي ... ايــــه كانت سهرة
الليل هو رفيقي صار
// وأنّ حضورك في دمي مسكُ الختام //
|