تساءل عجيب أطرحه على جميع
التماسيح في المنتدى...
أنا عانيت كثير في حياتي من الكورة....
وكرهتها من كثر ماحبوها أخواني الشباب...
وسأقص عليكم اليوم..قطرة من بحر معاناتي مع الكورة...
ففي يوم من الأيام....
كانوا كل أخواني رايحين مشوار ولا بقى إلا أنا و واحد من أخواني....
وكان فيه مباراة بين فريق اسمه آرسينال وفريق ثاني روسي...بس للأسف ماأذكر اسم الفريق....
وكان على كاس أبطال أوروبا.....<<يا
حليلي صرت مثقفة
من كثر ماأزعجوني
وطبعاً أخوي ما كان وده يتفرج ع ـالمباراة لحاله...لازم يكون فيه أحد يسب
ويشتم معه...
وهـالأحد للأسف صادف يكون أنا...
ناداني وقال مينشن.. حبيبتي.. وش رايك تتفرجين معي ع ـالمباراة..؟؟<<أول مرة في حياته يقول حبيبتي
أنا بصراحة ماكان ودي ..
بس بحكم رقتي وطيبة قلبي...
وافقت
خصوصاً ان وجه كان
يتعفط وهو يترجاني....مسكين..
جلسنا قدام التلفزيون.....
واستلمني اخوي بالسواليف....
وقال لي تدرين ان حارس الارسينال هذا جني..
أنا
ارتعت...
قلت وش جنيّه...؟؟!!<<على نياتي احسبه جني صدق...
قال أخوي...لا قصدي انه رهيب...
تدرين ان محد يقدر يجيب فيه قوول..إلا اذا كان الهدف مستحيل ينصد...<<طيب وش أسويله؟!
وقعد يوصف لي الأهداف اللي جت فيه ...
ويقول تذكرين ذاك الهدف اللي جابوه ايطاليا فيه..
قلت.. لا والله ما أذكره
..<<لأني أصلاً ماشفته
قال إلاّ لازم تذكرينه .. حتى كان جاي من زاويه صعبة...والركلة كانت صاروخية..والله الهدف كان رهيب...
وقعد يوصف لي الهدف ويحرك يدينه.. ويشرح..
وسعابيله تقوطر مع الحماس
...
ويطشر علي..وأنا أمسح وجهي...
ساعة وهو يوصف هدف واحد...<<
حشى صار مسلسل مكسيكي
وأنا
فاقّه خشيشتي والله مدري وش يقول
.... كنت أحس انه يتكلم لغة عجيبة..ومصطلحات أول مرة أسمعها....شكيت انه يسولف علي بالصيني...
وآآآآآآآآآآآآآآخر شي...قال...هاه ذكرتيه؟؟
وقعدت
أصرف ...أبيه يسكت بأي وسيلة..فقلت تصدق كني ذكرته ....<<نصابه
سألني قال أنت من تشجعين في الدوري الأسباني....
طبعاً أنا
توهقت لأني ماأعرف الفرق....قلت له...هم عندهم الهلال
..؟؟؟<<أنواع البرائه
...قعد يستغفر ربه ويتحمده وقال... لا ماعندهم هلال...أنتي ماتعرفين إلا الهلال....
قلت خلاص أجل أنا أشجع رونالدينيو...
قال آه يعني تشجعين برشلونة..
قلت ...لا ما أشجع برشلونة أشجع رونالدينيو...ما تفهم أنت....
قال ايه رونالدينيو يلعب في برشلونة....
مار يضيع وجهي
..وأقول
ياحليله غيّر فريقه...
وقالي طيب من تشجعين في الدوري الانجليزي؟؟<<أحوول ذا الولد
نشب لي...
قلت..أشجع بيكهام...<<وأنا في بالي أقول ...آه يا
ملحه...
قعد يضحك
...قال بس بيكهام ما يلعب في الدوري الانجليزي..هو يلعب مع الأسباني..<<والله
التوهيقه
وقلت له طيب أنا أشجع...
وأقعدت أعصر مخي
أبغى ألقى اسم أي لاعب انجليزي عشان أطلع من ذا التوريطة...
وأتذكر شكل واحد بس مدري وش اسمه....
وقعدت أوصف لأخوي شكله ...
بس انه مافهم علي...مو لأنه غبي..لأ ...
لأن شرحي زي وجهي ..اللي يسمعني يحسبني أوصف موقع مكان مو بني آدم.....
وقلت خلاص أنا عندي صورته في جهازي ..بروح أجيبه..<<تحمست
وأوريه الصورة....قلت هذا...
قال آه هذا اسمه روني ويلعب مع مان يونايتيد...
قلت خلاص أجل أنا أشجع ذا الفريق....<<
ياحليلي كشخة صرت أشجع فريقين وأنا ما أدري
وصفر الحكم معلناً بداية المباراة....
ومع تصفيرته ...ذهبت أنا في سبات عميق.....
ولكن فجأة ومن حيث لا أعلم....وجدت نفسي أطير.. والغرفة كلها تدرور حولي....ترارارا..<<مؤثرات صوتيه
....ما اللي حدث؟؟؟؟؟هل كانت مينشن تحلم؟؟؟؟؟
...تساؤلات عديدة قامت بالتطاير في أذهان المشاهدين
....
إليكم ماحدث بالتفصيل
...
خلال الشوط الأول...<<لا تسألوني أي دقيقة لأني كنت نايمة
قام الفريق الروسي..(اللي مدري وش اسمه)
بتسجيل هدف على الآرسينال(اللي يشجعه أخوي)
في المرمى الحارس الجني..<<يقالكم محد يجيب فيه قوول
وطبعاً من
الحرة اللي جت أخوي ..مالقى قدامة إلا ضعيفة الله ...مينشن...
فمسكها مع
شوشتها...وطيرها فوق....و
نطلها في آخر الغرفة...
ولكن أبشركم لم يكن هناك أي نوع من الإصابات....وعادت مينشن إلى النوم في أقل من نصف ثانية...
وأرجع أقوم ....وألقى الغرفة مظلمة....وفاضية....ولا فيها أي مخلوق بشري.....ترارارا
تساؤلات عديدة قامت بالتطاير في أذهان المشاهدين...<<عجبتني ذا الجملة
ماحدث بالتفصيل....
أبد ماصار شي
....كل اللي صار ان المباراة خلصت....
وراحت علي نومه...وماقمت إلا وهي الساعة وحدة...
شلت نفسي وكملت نومتي في الغرفة....
انتهت معانات اليوم الأول....وإليكم معانات يوم آخر....
وفي يوم آخر....<<بس ترى هاليوم قبل اللي تو....ماأعرف أرتب قصتي...
المهم...
كانوا أخواني معزومين عند واحد من
عماني وكانت فيه مباراة في الدوري الأسباني..
فوصوني أخواني أسجلهم المباراة...
وأنا قلت خلاص ولا يهمكم... أنتم بس روحوا زوروا عمي وقوموا بالواجب وخلوا الباقي علي ..<< ماشاء الله علي سنافية....
ويا حليلي حليلاه...والله كنت
طفشاااانه وأنا أتفرج على المباراة...
ونص الوقت وأنا غافيه
يا ناس والله مدري وش يعجب ذا الشباب في المباريات....
ويوم رجعوا أخواني ...كنت أنا مبسوطه....حاسة اني مسوية انجاز...
وأول مادخلوا...و
الفز الشريط في وجيهم..
وأقول ...تراي سجلت المباراة...والله سجلتها من أولها....
وأول ماشغلوا أخواني الشريط قاموا يسبون ويشتمون....
أنت ماتعرفين تسجلين وش ذا التسجيل....
وأنا
مفهية...وش فيه تسجيلي...سجلت المباراة من أولها...<<على بالي فيلم أمريكي...
قالوا لي...وراه ماسجلتي التشكيلة ...فيه أحد في الدنيا يسجل المباراة من دون التشكيله...
قمت عصبت عليهم....
هذا جزاي اللي ضيعت وقتي قدام المباراة عشانكم وفي النهاية تسبوني...
فعصبت عليهم وقلت لهم النتيجة وطلعت.....<<أم النذالة
هذه معانات فتاة واحدة من الشعب السعودي.....
فاذا كان لديك أي موقف أختي العضوة....فلابأس أن
تسدحيه تحت....
أمابالنسبة
للتماسيح....أبغى أفهم وش يعجبكم في الكورة لهذي الدرجة؟؟؟؟