[yass]

فيديل مانو مسؤول عن الحصار... أكيد لأ.. المسؤول عن الحصار هو من يحاصر و ليس المحاصَر ..

لكن فيديل كاسترو مسؤول عن أمور اخرى كثيرة.. منها التبعية العمياء للاتحاد السوفيتي (اللي ممكن تكون وليدة الظرف.. مابقول لأ.. ) و منها التصفية لخصومها الحاليين و المستقبليين (يعني اللي يشوف الطيف السياسي الكوبي ما بيلاقي غير شيوخ عمرون سبعين و تمانين سنة عم يحكو عن التحديث و التطوير... أي انو تحديث و تطوير جدو؟!) و هو بهالشكل في سبيل توطيد حكمه أنهى مرحلة الانتقال الجيلي (مافي جيل بعدو.. مافي غير شخص واحد و من الصف الثالث أو الرابع, و هو وزير الخارجية فيليبي بيريث روكي فينا نقول عنو انو شب -خمسيني الأخ- الباقي كلو من السبعين فما فوق)..

الثورة الكوبية هي مرحلة حاسمة من النضال الشعبي في القرن العشرين, و يؤسفني جدا بانو ثورة بدأت كنضال ضد المستحيل تحولت إلى ما هي عليه...

هاي ببساطة أخطاء فيديل.. غير هيك هامش المناورة عندو صغير جدا, يعني هو ما عندو غير قصب السكر و السياحة.. لكن كان ممكن تكون حياة الكوبيين أكثر انسانية (مابيقدر يعملهون مليونيرية أكيد) .. لكن في شغلات شفتها بكوبا تصل إلى انعدام الانسانية, متل انو في أبنية ممنوع الكوبيين يدخلوها, التغى هالقانون من شهور لكن لما انا رحت على كوبا أخدت معي مصاري لوصلهون لوالدة صديق يشتغل هون, و اتصلت فيها و كان بدي واعدها بالأوتيل لأنو ما بعرف امشي بالهافانا.. و ما قدرت واعدا بالأوتيل لأنو ممنوع على الكوبيين يدخلو أوتيلات بلدهون و كافتريات بلدهون.. أو انو ليكها محلات السياح فيها من كل شي.. و يجي الكوبي يوقفك بالشارع و يترجاك كسائح تفوت تشتريلو قداحة أو علبة كبريت لأنو هو ممنوع يشتري و بمحلات الدولة مافي (طبعا بكوبا مافي قطاع خاص.. كل شي بلا استثناء ملك للدولة.. حتى بقاليات مافي)

من اللي تنحسب لصالح النظام الكوبي هو نشر العلم و الثقافة بالمجان, يعني من أرقى شعوب الكون علما و ثقافة, و حتى مفهوم الجمالية عندهون (يعني صعب تلاقي كوبي مهما كان فقير ما عندو نشاط ثقافي أو فني, يا يكتب يا يعزف يا يرسم.. الكل!)

عدا انو شعب صاحب كيف... ما يتعكر مزاجو لو يتطربق الكون فوق راسو.. عندو سيجارو و كاس الروم بالدنيي كلها