تعوا ت قلكن..
بما إنو يمان ع السمع.. خلينا نحط وحدة ";محرزة"
قال هاد يا إخواتي كان ياما كان.. بقديم الزمان.. كان في ملك..
ومتل العادة.. هالملك.. عندو بنت وحيدة وبتاخد العقل..
ومتل العادة.. مرض هالملك بآخر حياتو.. وصار بدو يلاقي عريس للأميرة.. مشان يتطمّن عليها وع المملكة من بعدو
ومتل العادة.. هالملك كان عندو تلات وزرا.. طمعانين بإيد الصبية وبإيد المملكة
ومتل العادة.. هاد الملك.. حكيم (متل كل ملوك العرب يعني!) فـ قرر يعمل اختبار ت يشوف مين الأذكى.. ومين بيستاهل يكون صهرو ويركب الـ.. مملكة من بعدو
بعدكن ع السمع؟
يالله بلّش الجد..
جاب الوزرا التلاتة.. وعصّبلهن عيونه.. ووقفهن على رؤوس مثلث متساوي الأضلاع.. مقابيل بعض يعني
وحط هالملك نقطة من الحبر على جبين كل واحد منهن
هلق
هالنقطة الحبر.. ممكن تكون حمرا.. وممكن تكون زرقا.. فقط
شال الملك العصبة عن عيون وزراءو.. وسأل الأول:
شايف نقطة زرقة؟
قلو: إي
سأل التاني: شايف نقطة زرقة؟
قلو: إي
سأل التالت: شايف نقطة زرقة؟
قلو: إي
ممممممممممممممم
هلق هيك.. صارت معلومات الحزورة كاملة مكمّلة..
بيفوز بإيد الأميرة اللي بيعرف لون النقطة اللي ع جبينو.. قبل غيرو (قبل غيرو.. هه)
فـ السؤال:
كيف ومين رح يقدر يحزر لون النقطة ع جبينو.. ت يورت الحكم؟
ربما كان عدم الاتفاق أقصر مسافة بين فكرين. (جبران النبي)