[قرصان الأدرياتيك]

كاتب النص الأصلي : Nay

بنتبه كمان على قصة بتصير عن السوريين اللي برا.. مثلا بس ينسأل الواحد انت من وين بيقول أنا كردي .. او انا شركسي.. او انا سوري بس "مسيحي" او من أصل كذا أو كذا.. متل كأنو عم يهربو من كلمة سوري أو عربي.. ومتل كانو عم يستثنو حالهون من الرعاع العايشين بسوريا

بالشق الأوّل معك حق وهنّ معن حق! كيف؟! بالنسبة ألي ما عندي أي مشكلة قول أنا سوري وين ما كان، لا بل بحب قولا برغم أنّو هالاسم بأوروبا بيوطي الراس للأرض، وبيخلي العالم تتجنبك وتنظرلك شزراً! بس كمان بنفس الوقت أنا ما بلوم السوريين يلي بيتجنبوا الاسم وبيفتخروا بانتماءاتن القبليّة والدينيّة لسبب بسيط جداً: أنّو شو مقدملن هالاسم لينتموا ألو؟! يوم سافرت من روما كتبت صفحة مذكرات بتحكي عن هالموضوع ورح نزلها شي يوم بمكانها. عموماً أنا بحب الإنسان الشجاع يلي بيعترف بجنسيتو شو ما كانت تكون.

هلا بالنسبة للشق التاني ويللي هو الهرب أو تجنب كلمة "عربي" فهو أمر صحيح وأنا بسورية وخارج سورية بتجنبها لأن أصلاً السوريين ليسوا عرباً. ودائماً بكتفي بقول عن حالي "سوري" دون أي إضافة أخرى. ومعروف تماماً شو علاقة السوريين بالعرب والقبائل العربيّة، وكمان تاريخ سورية والآثار الممتدة من شمالها لجنوبها بتأكد أنو سورية بلد السوريين ويلي ما بيعرف شو معنى الكلمة يا ريت يراجع اللغات اللاتينية أو اليونانية قبل قرن من الزمن ليعرف أنو كلمة سوري تعني سرياني بس وجود دولة بهالاسم خلانا نفصل بين اسم شعب وبين صاحب جنسيّة...

أنا هون ماني بصدد لشرح انتماء معين أو سرينة السوريين أو الدفاع عن فلان أو علتان... إلخ! أنا كتبت اللي كتبتو أعلاه بس للتأكيد على أنو من الخطأ يقول السوري عن نفسو بأنّو عربي إلا اللهمّ إذا كان منتمي لشي قبيلة عربيّة من قبائل البدو أو القرى أو المدن.
وكمان لا ننسَ أنو كلمة "العربية" اللي انضافت لاسم "الجمهورية السورية" كانت على عهد الشيشكلي يعني من نص قرن!

وبصراحة كاملة أنا ما بحب دين أي مغترب على تصرفاتو، لأن لو كان البلد مشبع ابنو ومعلمو ما كان صار هيك! فلا تلوموا حدن لأن رح يجي يوم وتمروا بنفس التجربة!
.