[TheLight]

كاتب النص الأصلي : وائل 76

هلاء عن جد عم تحكي ؟؟؟؟؟؟؟؟؟
ما بتعرف انو الديانات كلها حرمت الزنا
ذا لايت بلا ما نضحك على حالنا ونستخف بعقول البشر انتا بتعرف اني بحترمك وبحترم وجهة نظرك دايما لكن هون ما ممكن اتفق معك بنوب
هلاء العذرية مو مقياس للشرف ممكن اقبل هاي العبارة لانو في كتير بنات ممكن يكونوا عذراوات ومع ذلك اقذر من العاهرات بتصرفاتهم و باسلوب حياتهم ممكن تكون الرذيلة هيا مفهوم حياتهم وممكن كتير اشيا نتخيلها هون
لكن انو يكون الجنس بدون زواج نهج حياتنا بعتقد انها صعبة شوي
هلاء في سؤال تبادر لذهني هون
على افتراض انك ارتبطت بفتاة بدون زواج وكانت العلاقة بينكم متل علاقة الزوج بزوجته وكانت هاي الفتاة مرتبطة قبلك بشخص ولسبب او لاخر تركته
هلاء نفترض انك كنت ماشي معها بالشارع وبالصدفة قابلتوا هالشخص هاد وانتا بتعرف انها مارست الجنس معه
بسئلك هون ذا لايت وبتمنى تكون صادق معي متل العادة
هل راح تعتبر الامر عادي وانو ما في مشكلة ولا راح تتنكد لانك شفته ولانها شافته وهو شافها ؟؟؟؟؟؟
تحياتي الك

وائل انت ما قريت كل ردودي
ردي الاول قلت فيه انو هو مخالف للشرائع الدينية كفعل وكممارسة....اما عن وجود علاقة جوهرية بين عذرية البنت بالشرف والاخلاق فانا بعتبر انو هاد الكلام كتير كبير وغيرمقبول....لانو الشرف والاخلاق هن قيمتين او مفهومين اكبر بكتير من انو يكونو بيخضعوا لتعريف محصور ومرتبط ارتباط حصري بالعذرية أو بغشاء البكارة....
تاني ناحية....العلاقة يللي بتسقط من قيمة البنت هي الدعارة ومش العلاقة الجنسية مع شريك حياة قبل الزواج....طبعا انا هاد رأيي ومقتنع فيه لسبب بسيط...انو العلاقة الجنسية قبل الزواج وقت بتكون في اطار مجتمع لا يحكمه الدين وبفضل اني سميه مجتمع علماني مع انو التسمية ما نها صحيحة...ووقت بتكون باطار علاقة حب صحيحة غير قائمة ع الخداع متل معظم لعلاقات بمجتمعنا...بشوفها علاقة صحية وصحيحة....
وراح اعطيك مثال بسيط....انا عايش بفرنسا...واتحدى اي شخص يقدر يقلك انو فيه يمارس الجنس مع اي بنت الا اذا كانت حبيبتو وشريكته حصرا....بمعنى انو هون الجنس جزء من علاقة تعايش بين شخصين ومش موجودة بالشكل يللي بتتخيله الغالبية العظمى من شعبنا....
وبصراحة اكتر....الانحلال الاخلاقي يللي كنت شوفو يوميا بمجتمعنا الشرقي هو اضعاف مضاعفة عن يللي شفتو هون......
وجوابي ع سؤالك....وبغض النظر عن رأي أي حدا فيه لانو ما كتير بيهمني....انا بقبل اتزوج بغير عذراء وما عندي مشكلة....
طبعا رديت ع السؤال وما كنت حابب رد عليه ع العام لأنو هلئ بتسمع حكي بطعمة وبلا طعمة والشاطر بيصير يللي بدو يقيملي اخلاقي ومبادئي وبدو يحاول يعطيني مثال عن اختي...