من أولتا يدكن تتحملونا لأنو الرد بدو يكون طويل شوي باعتبار صرلي ساكت من أول السيران:
أول شي يا شباب ويا صبايا فكرو بالموضوع بطريقة بسيطة وبطريقة انسانية مو بطريقة ياباطل وبطريقة شرفي وشرفكون وشرفنا لأنو والله الشرف كلمة بتعبر عن مضمون أكبر من يلي عم نناقشو هون... مو معقولة كل شي عم يصير فينا قبلانينو وماضل مرتع للشرف العربي الأصيل غير هالقصة...
الجنس كمفهوم إنساني هو عبارة عن تفريغ مشاعر بين تنين..بمعنى هو تتويج لعلاقة حب بتجمع شخصين هلأ هون يلي لازم يكون واضح انو الجنس شئنا أم أبينا هو غريزه... والأكل غريزة والشرب غريزة والحكي غريزة وكل شي تصرفات الانسان وردات فعلو الطبيعية هيه عبارة عن غرائز... بس هالغرائز هي عبارة عن غرائز بشرية بحكم انها تصرفات انسانية وباعتبار نحنا هون ماعم نحكي عن الجنس المأجور أو الجنس من أجل الجنس وانما عم نحكي عن الجنس بين تنين بيحبو بعض فهو عبارة عن غريزة انسانية وعم نحكي عن ناتج طبيعي بعلاقة انسانية...
ودخيل عينكون طلب انو ترحمونا شوي من ضرب الأخلاقيات والشرفيات بغير مكانها... وفكرو بيلي عم تحكوه منيح لأنو يلي ضاع شرفو معو حق يدور على شرف بديل..بتشوف كل واحد تافه عطال بطال بيقلك "بعرضي باختي" انو يا ابن الكلب روح اشتغل وعميل شي لمستقبلك ومستقبل اختك وأهلك قبل ماتجي تقض مراجل فاضية....
مننتقل لموضوع غشاء البكارة يلي عم تحكو عنو وكأنو جدار برلين ولا كأنو جدار الصمود العربي ولا خط الرابع من حزيران 1967... انو عن جد يلعن رب هالشرف والكرامة يلي عم تنزلوه لهالمستوى هاد... السؤال يلي ماكنت لاقيلو تفسير طول عمري انو كيف بتسمح لحالك كشب تنام مع نص بنات البلد وماتقبل تتزوج بنت نايمه مع شب قبلك؟؟ مع العلم انو هالبنت بيجوز تكون نايمه مع هالشب نتيجة علاقة حب انسانية محترمه وانت نايم مع هالبنات نتيجة غريزة ونتيجة انك انت بني أدم واطي... شوية وعي دخيلكون ليش انت مسموح تنام مع بنت وبتنسى انو هالبنت الها أخ وممنوع حدا ينملك مع اختك؟؟؟ يعني حضرتك خالد بن الوليد وممنوع حدا يقرب على اختك واخوات العالم محللين لإلك؟؟ والله عيب وسخافة وحقارة...
كلمتين ياشباب وياصبايا باختصار الشرف شي كبير كتير ويلي بيلخص شرفو وكرامتو بإختو وبعلاقات اختو العاطفية بيكون بلا شرف وبلا أخلاق...
والبنت يلي بتفهم الجنس مع الشب غريزه بتكون بلا عقل...
والشب يلي بنام مع بنت لمجرد انو يشبع رغبة ويفضي هالطاقة بغض النظر انو مابيجمعو بهالبنت مشاعر وعواطف بيكون بلا شرف وبلا ترباية...
أما الشب والبنت يلي بينامو مع بعض نتيجة علاقة حب شو ماصار بيناتون مسموح وبلا غشاء بكارة بلا غشاء مسخرة لأنو من الأساس هدول يلي بيجمعون متل يلي بيجمع أي تنين متزوجين.. باعتبار الزواج مو ورقة عند القاضي الزواج مجموعة روابط انسانية بتجمع شخصين... فبتصور انو هالعلاقة واحد من مفردتاها الجنس وليس كل هدفها ومنبعها ومصبها هو الجنس....
لاتأخذونا ودمتم.
الحرية لكل أسرى الحرية في سوريا...
العربي الذي لايجرأ من الذل والخوف على رفع رأسه لرؤية القمر !!!
كيف سينتصر على غزاة القمر؟؟!!
آخر تعديل VivaSyria يوم 25/10/2008 في 23:59.
|