اقتباس:
كاتب النص الأصلي : DARKNESS
ممممم 
اولا بحب اشكرك عا تفاعلك و تحمسك للموضوع
تانيا في كم شغلة بس حابب اوضحن اول شغلة الكون مكون من مليارات المجرات مو من عدة مجرات يعني في مليارات المجرات و العدد المكتشف لحد هلق حسب ما بعرف جاوز ال مية بليون مجرة و المجرات منها الصغيرة المكونة من كم مليون نجم
و منها العملاقة المكونة من مليارات النجوم يعني من اجل المثال مجرتنا تعتبر متوسطة فيها تحوي ما بين 200 إلى 400 بليون نجم
بالنسبة للشروط فما رح اضيف شي اكتر من اللي قالو الأخ شام لأنو بصراحة ما تركلي شي لقولو
بس بحسب العلماء الحياة ملزمة بالوجود اذا ما تواجدة كافة شروطها بس نحن لحد هلئ تفكيرنا الحالي ما قدر يستوعب شكل حياة غير متلنا
نحن يعني الوحدات الكربونية و بحسب اتساع هالكون اللا منتهي يمكن يكون في مليارات الأشكال من الحياة اللي تركيبها أعقد من تركيبنا
هاد و لسا ما فتنا بنظرية الأبعاد تبعت كوننا اللي بتخلينا نفتح علينا أبواب ما بتنتهي
و بالنسبة لوجود الحياة فأكيد داخل مجموعتنا الشمسية المتواضعة ما ضل أمل أنو نلاقي حياة بالشكل العاقل لأنو ما ضل وسيلة ما جربناها
و ما مشي الحال معنا (إلا إذا كانت نظرية المؤامرة صح و طلع المريخ مأهول  )
فأملنا الوحيد صفا خارج حدود مجموعتنا الشمسية و ما بعتقد من جهتنا رح نقدر نغادر مجموعتنا الشمسية قبل الخمسين سنة الجاي
و المركبتين الوحيدتين اللي غادرو مجموعتنا الشمسية هني الفويجار احد و تنين
و بعتنا معن شوية معلومات عنا بجوز هي الوحيدة اللي رح تضل اذا ما دمرنا حالنا و كوكبنا بشي يوم من الأيام
و للحديث تتمة.. |
أبو الليل.. سعيدة
هيك كام فكرة ع السريع (تأييد لحكيك)
1- بدءاً من عشرينات القرن الماضي (1924) بفضل العالم الأميركي إدوين هابل.. توضّحت صورة أو بنية الكون: إنو مكوّن من جزر كونية (مجرات).. أقل مجرّة فيها مية ألف مليون شمس..
هالمجرات بتتواجد بـ تلات أنواع رئيسية: مجرات حلزونية (متل مجرتنا درب التبانة) - مجرات إهليلجية (على شكل مجسّم القطع الناقص، متل البيضة يعني) - مجرات عديمة الشكل (متل المجرتين اللي اسمهن: سحابة ماجلان الصغرى والكبرى، هيدول بينشافوا بالعين المجردة من النصف الجنوبي للكرة الأرضية، وهني مجرات صغيرة تابعة لدرب التبانة).
هلق في نوع رابع فرعي.. بيسمّوه المجرات الحلزونية ذات القضيب.. هيك بتكون مجرّة حلزونية ولكن ممطوطة شوي (بفعل اندماج مجرتين مع بعض.. أو بفعل انفجار سوبر نوفا أخو إختو بقلب هالمجرة)
2- مجرة درب التبانة لحالها (اللي بتضم الشمس).. بتحتوي على 400 ألف مليون شمس تانية. وقطرها (من الطرف للطرف) 100 ألف سنة ضوئية (يعني إذا مشينا بسرعة الضوء.. حتى نقطعها بدنا 100 ألف سنة!!)..
شمسنا بتبعد عن مركز المجرة 30 ألف سنة ضوئية (مركز المجرة هاد اللي منشوفو متل حزام ضو أبيض بالسما.. ومنسمّيه الدرب اللبنية أو نهر المجرة أو درب التبانة)
3- في أربع مركبات فضائية صاروا تقريباً خارج المجموعة الشمسية.. هني بايونير-10 و بايونير-11 (أطلقوا سنة 1972، و 1973).. و مركبات فوياجير-1 و فوياجير-2 (أطلقوا سنة 1977)
هيدول المركبات تم تحميلهن برسائل لـ حضارات غير أرضية..
ولكن.. المشكلة إنو حتى يوصلوا لأقرب نجم من الأرض (وهو النجم المسمّى ألفا سينتوري/الحضّار القريب، واللي بعدو 4.3 سنة ضوئية) بدهن كذا ألف سنة (رغم إنو سرعة مركبة فوياجير هي بتمشي بأكبر سرعة بين المركبات الفضائية اللي انبعتت)
4- الحياة بالمجموعة الشمسية..
صح.. ع الأغلب لا توجد حياة متطورة على كواكب المجموعة الشمسية
ولكن..
المريخ.. مالئ الدنيا.. وشاغل الناس (متل صاحبنا أبو الطيب)
تأكدوا العلماء اليوم إنو المريخ ببداية حياتو (من شي 4500 مليون سنة) نشأت عليه حياة (بنفس الفترة اللي نشأت الحياة على الأرض).. حيث وجدوا العلماء سنة 1984 نيزك مريخي بجليد القطب الجنوبي.. وبالتحليل طلع هالنيزك بيضم خلايا حية دقيقة متحجرة.
بس اللي صار.. بسبب صغر كتلة المريخ.. ما قدر يحافظ على غلافو الجوي متل الأرض.. فـ هرب معظم الغلاف الجوي.. وتبخّر المي على سطحو.. ودخلت الأشعة الشمسية القاتلة.. و قتلت الحياة المريخية.
فـ هلق ع سطح المريخ.. نعم.. مؤكد بإنو لا يوجد حياة.
ولكن..
إذا منطلّع ع قطبي المريخ.. منشوف إنو في قلنسوتين قطبيتين من الجليد (متل مو موجود ع الأرض)..
وتحت طبقات هالجليد.. يوجد محيطات من الماء السائل (متل ع الأرض)
طيب.. نحنا منعرف إنو تحت طبقات الجليد بالقطبين ع الأرض فيه حياة..
إذن؟
معقول كتير يكون في حياة مريخية مائية بالقطبين
بس شو شكل هالحياة؟ شو طبيعتها؟ هل معقول تكون متطورة؟
هاد علمو عند ربّك..
بدنا ننطر حتى تصير الرحلة المأهولة للمريخ.. ت نعرف (لإنو الروبوتات اللي بعتوها ع المريخ لحد هلق.. هي مركبات صغيرة.. ما بتقدر تحفر بالجليد كذا متر.. ت توصل للمي وتعرف)
5- واحد من أقمار كوكب المشتري.. إسمو (أوروبا).. هيدا القمر.. كل سطحو جليد.. وتحت هالجليد في محيطات من المي السائل..
يعني وضعو.. متل وضع المريخ.. احتمال يكون فيه حياة
شو كمان؟
حاجتنا هيك هلق..
وللحديث بقية
سلامات
ربما كان عدم الاتفاق أقصر مسافة بين فكرين. (جبران النبي)