[minime1967]

الى السورية المشتاقة :

شكرا على الرد الحنون ...

أنا مابعرف اذا كنت مقيم ولا مغترب .. يعني معني أني مو طيار ولامضيف , بقضي وقتي بالطيارات .. وليس طيارات فرع فلسطين.

كل ما بعيش بالشام أسبوعين , بكرهها وبكرها حياتي وبسافر الى أيطاليا أو أنكلترا أو هولندا أو ألمانيا .. وكل ما بغيب أسبوعين عنها .. بشتقلها وبحن وبرجع متل الكلب .. يمكن القط بيحب خناقو .. أو أنو تعودت على ريحة دخنة السيارات ومنظر الزبايل بالحواري ,,,ووسخ المطاعم وغلاظة السرافيس وحقد موظفي القطاع العام وهبلنة المعارضة وحيونة شوفرية التكاسي ونق الأم وسخافة الزملاء وخيانة الأصدقاء ومنظر الشحادات والشحادين اللون البني القذر للأبنية وغلاء الشغلات الضرورية وساحة الأمويين ونشرة أخبار الأرضية وبرنامج "مع الفلاحين" و "مع العمال" وسيارات السعوديين المفيمة ورجال الخمس وعشرون {شرطة المرور} ............ما بعرف بالظبط ...

ممكن أنو في ناس مصيرهم القلق وعدم الرضى .. وممكن هالقلق يقتل أو يبني ... وممكن وممكن ..

ممكن أنو الله بيبحبنا بسوريا غصب عنا يعني بالصرماية أو بيجوز بالبصطار.. لأنو مو طبيعي يدمعو عيونا على الأغاني الوطنية التافهة اللي دارجة بهالأيام ...بس والله عم بيدمعو ..شو أعمل ..