[VivaSyria]

كاتب النص الأصلي : HashtNasht

و الله يعني انا كتير حاسس بخيبة أمل , اي يعني و ع شوي كانت صابتني بمقتل

سلامتك يازلمة بعدنا بمرحلة المناغشة وما انتقلنا لمرحلة المواجهة الحقيقية

أنو يا جماعة الخير , أنا كنت متوقع منكن تتعاملو معنا بطريقة شيك و ما تحشرونا بزوايا , يعني معلم انت كتير بتلاقيها حلوة بحق لجنة طويلة عريضة , و اضرب واطرح , و تسالي يعني , انو قبل يومين من انتهاء التصويت نسحب صور , أو نسمح بتعديلات ؟؟

ابونهلة صدقني الفكرة من النقاش لا الحشر بالزاوية ولاشي من هاد والموضوع كلو مو مستاهل متل ما الكل عم يقولو... بس طريقة انو نحنا اللجنة ونحنا ابطال الملاعب ومنعرف شغلنا وحكيكون مابيقدم ولابيأخر... ويامشاركين لاتجاوبوهون كتير كانت مستفزة...

في أمور بدها تاخد حقها , يعني و تمر بمراحل لحتى تنضج و تطور , و التجارب مفيدة , خلينا نقول مافي شي اسمو تجربة فاشلة , بكل مرة الواحد بيتعلم شي , و بيستفيد من الشي اللي تعلمو بالمرة القادمة ..و هيك يعني لحتى يوصل لحالة اقرب ما تكون الى الكمال .
خود مثلاً لعبة كرة القدم , لعبة عمرها هديك الحسبة و مع هيك الجماعة احيانا بيوقعو باخطاء , يوم اقرت الفيفا قاعدة الهدف الذهبي كتير ناس اعترضو , و قالو انو هي قاعدة سيئة و رح تسبب مشاكل كتيرة ..الخ , مع هيك يعني الجماعة جربو , و بعدين قررو يلغو قاعدة الهدف الذهبي و مشي الحال ..بس انو يعني الجماعة خلينا نقول جربو , و شافو بعينهن و اقتنعو.

كتير حلو هالمثال وبوقتها الفيفا قالت انو نحنا بدنا نسمع من الكل وأراء كل الاتحادات وتحفظاتها على العين والراس والدول حرة بانها تلتزم بالقرار او لاء... ما اجت الفيفا قالت نحنا منعرف كل شي ونحنا يلي عبينا الهوا بقناني وهاد الحاضر...

نحنا هون بدك تقول باول محاولة , يعني لسا باول تجربة , و ممكن نكون اخطأنا ( ممكن يكون الغلط أنو ضفنا الصورة ال 11 , و ممكن يكون الغلط بمكان تاني , يعني الموضوع حمال أوجه ترى ) , بس أنو من حيث المبدأ منتوقع منكن أنو تكونو اكتر مرونة , و انو تكون الاراء هيك يعني تحمل طابع السلاسة و الودية , بدون ما يكون في حشر بالزوايا أو اتباع سياسة مفترقات الطرق.

مشكورة محاولتكون ومجهودكون وبرجع بقلك المشكل بطريقة تعاطي البعض مع المشكلة مو بالمشكلة بحد ذاتها

حاليا و باعتبار التصويت بلش و قرب يخلص , خلونا نتعامل بواقعية مع الموضوع ,و انو نكفي التصويت على ما هو عليه , و انو كل الملاحظات و الاقتراحات اللي صارت بهالمسابفة تتاخد بعين الاعتبار بالمرات اللي جاية . خاصة انو بالمراة الجاية ممكن تكون انت او ابو طوني , او x من الاعضاء باللجنة مثلاً , و بتكون عليكن مسؤولية انو ما توقعو باخطاءنا , و هيك يعني .

بقى هلأ بدي اطلب منكن جميعا انو تساعدونا نخلص المسابقة ( متل ما هيي يعني ) , و بعدين نعمل لائحة بالملاحظات و ما الى هنالك و تصير متل ورقة مرجعية للمسابقات القادمة ...و الكل بكون مستفيد .

هيك يعني و على أمل أنو ما يخيب ألأمل هالمرة ...و تحياتي

مبدئياً اكيد بعمري ماحكون بلجنة لانو بكره المناصب الحساسة وبخصوص فكرة اللائحة عن جد فكرة جيدة وبتصور فيك تختصرها ببند واحد هو عدم كسر ضوابط المشاركة بالمسابقة تحت اي ظرف او تقدير شخصي حفاظاً على الروح الميثاقية للقانون "زبطت الجرافات وانا عم قول هالجملة"

أنا من جهتي ابونهلة هيك وصلني حقي ووضحت وجهت نظري وشاركت وصوتت وعين الله حولي... وبكتفي بتوضيجك وبعلن وقف كل "انشطتي المعارضة" لقرارات لجنتكم الموقرة... وبتصور الشباب ان كان غابي او محمد او ليناردو وكل يلي معترضين كمان وضحو وجهة نظرون...

وعندي طلب صغير من كل الشباب المزعوجين من اي خلل شاب هالمسابقة انو يعبروا عن رغبتون من خلال التصويت ويصوتوا لأحق صور موجودة بحيث هاد التصويت والتصويب هو رسالة أجدى من مقاطعة هالنشاط أو إفشالو... وهالنشاط مهما شابو من اخطاء بيبقى تحت مسمى ذكرى شب كلنا منكن لإله كل مشاعر احترام وتقدير...

تحياتي