[عاشق من فلسطين]

انا من العام اللي مع القومية العربية ولكن ليس بمفهومها الحالي
ليش ؟
أنا مع القومية العربية بمعنى القومية ... يعني اذا اجتمع العرب كل كم سنة بقمة عربية
أو بجامعة عربية أو عطاولة أكل(وما أكتر اجتماعاتون على طاولات الأكل ) أو بجنازة شي مسؤول عربي ...ما بيعني أنو عم يحققوا القومية العربية ....أو اذا طلع كل رئيس عربي وعقد حواجبوا على شاشة التلفزيون وصرخ شوي وندد شوي ورفض شوي واستنكر شوي ....مشان الممارسات اللانسانية بالعراق الشقيق وبفلسطين المحتلة ...
ما بيعني أنو عندو أحساس بالقومية العربية..
لأنو أنا برأيي ما في رئيس عربي داير على قومية عربية أو أجنبية أو مريخية ...
كلهن دايرين على الكراسي ....والمناصب والشهرة وتحقيق المجد وتخليد أسمون لو باستخدام البسطار العسكري ( وهي وسيلة أغلبهن)...
أما العالم اللي دايرة فعلا" على القومية العربية أو على حلم القومية العربية ..فهنن الشعب الفقير والشعب المحتل مو لأيمانهون فيها ..لا بس لأنو هيي أكتر حل خيالي قريب من الواقع ...من الحلول المطروحة على الساحة العربية ...زوهدول العالم ما فيك تلومون لأنو هدول عم يغرقوا ...والغريق بيتعلق بقشة لو مسوسة....وأما وجهة نظري أنا كشخص مجرد بعيدا" عن قضيتي وأيماني بحلم التحرير...
فالعرب طول عمرهم متفرقين متناحرين ....وحتى بعصر الدولة العباسية اللي كان العرب فيها بحالة وحدة ما مر ومرح يمر متلها على العرب..
كانو طوائف وأحزاب متناحرة حاقدة على بعضها البعض وكل حزب أو فئة عم تضمر للتانية ....وطبعا" كان في فئة من الشعب اللي هي الفئة الموجودة بكل عصر وزمان ...الفئة اللي مابيهمها مين استلم أوم مين حكم كل اللي بيهمها المصلحة القومية ....وها الفئة لهلا موجودة يا بالسجون يا بمشفى المجانين يا بالقبور يا غير الله ما بيعرف وين ....بس هالعالم مانها مجانين ولا خياليين ممكن حالمين بس مانون خياليين ...ومن حقهون يحلموا لأنو القيادات لالعربية الله يخليلنا اياهم ما تركولنا شي منحبوا حقيقة كل شي صار حلم ...والله يستر ما يمنعونا من الحلم كمان ...
خلاصة الحكي القومية العربية اللي عم أتحدث عنها مو يعني نصير أمة واحدة من المحيط للخليج (مع أني بتمنى يصير هالشي بس هالشي صار خيال وأنا شخص حالم وماني خيالي ) عم أحكي القومية العربية بأبسط معاني القومية واللي هيي أنو أنا كعربي بسوريا أو بلبنان أو بمصر أو بالكويت أو بأي دولة عربية ... لما شوف بالأخبار المذابح اللي عم تصير بالعراق وبفلسطين على الأقل أحزن من قلبي وأسكت شي دقيقة بس مو أكتر.. بس للأسف حتى هالشي صار العربي يستكترو على أخوه الأنسان ...وأنا هون قلت أخوه الأنسان وما قلت أخوه العربي مشان اللي مو مؤمن بش اسمو عرب ..على الأقل يكون مؤمن بشي اسمو أنسان وأنو هالعالم اللي عم تموت قدام عينو على التلفزيون اذا ما بدو يعتبرها أخواتو بالدين ولا أخواتو بالعروبة على الأقل يعتبرها أخواتو بالأنسانية واذا حتى ما أعتبرها أخواتوا بالانسانية ...فهاد مانو أنسان وأنا الصراحة ما عندي القدرة ناقش كائن لاانساني .....بس اذا اضطريت ناقشوا باخدو عند رفيق الي بيشتغل طبيب بيطري يمكن يفهم عليه..
وبالنهاية كل شي حكيتو هوي وجهة نظر والدنيا وجهات نظر ..
واستروا ما شفتو منا....