استهلاك قضية
اول شي رح ابدا شو هية القضية حسب المعجم
"القضية" في معجم المحاكم: "كل ما هو نبيل ومثالي قضية" كل ما هو إنساني " قضية.. كل ما لا يفنى.. كل ما يمكن أن يُخلد.. قضية كل ما لا يستحدث ولا يوجد من عدم.. قضية وكل ما هو مرفوع طبعاً في مجلس الدولة.. قضية
هلق انا اختلف مع المعجم  برأيي انو القضايا تفنى ... على كتر استهلاكا ..
مثلا ً
القضية الفلسطينية قضية انسانية قبل ما نحتكرها كقضية العرب المركزية او قضية إسلامية ..
بس برأيي انو القضية خلال خمسين سنة .. استهلكت .. لدرجة أنو الكثير من الجيل الجديد ما عادت القضية بتعنيلو شي ..
الإعلام استهلكا كتير ... يعني لدرجة صار عدد القتلى .. رقم بس لأنو اعتدناه ...بعض الجرائد في سوريا ما بحسا سورية ... لأنو ممكن بالصفحة الأولى كلها ما يكون في ولا خبر سوري
الحكومات استهلكتا كتير ...لتخوف شعوبا .. لتحشد شعوبا .. لتستثمر عواطفن ..
الفن استهلكا كتير ...
التربية .. التعليم .. " بمناهجنا .. إذا بدك تكتب موضوع تعبير عن العيد وأفراح العيد بيكون خاتمة الموضوع أنو أفراحنا ناقصة لأجل اطفال فلسطين .. بعدين ضافولا الجولان .. بعدين ضافولا العراق ... !!!!!!! "
اليوم الجيل الجديد " جيلنا " وعي على الخيبة .. يعني نحنا ما عاينا ولا نصر حتى الآن ... لهيك بتحس انو بكثافة طرح القضية لألنا .. بيصير عندك منعكس ..رفض
بيصير القتلى و الارض والمدن اللي عم تروح ...  مجرد رقم لشي ما عاد يعنيلك ..
هلق في قضية تانية رح اطرحا ... وهي استهلاك القضية من الأطراف الغلط ..
يعني في موجة الاعتقالات بسوريا .. اللي هي كمان قضية إنسانية طبعا ً
صار جميع الاطراف المعارضة بدا تحكي بأسم المعتقلين ! ..
الاطراف الاميركية واللبنانية و السعودية و ... بدا تحكي عن المعتقلين !!!
لك حتى جية فيروز عسوريا إلها علاقة بالمعتقلين ، اختيار دمشق عاصمة للثقافة .. مرتبط بالمعتقلين ..
حقوق الانسان بسوريا كل يوم بتطالع مدري كام بيان بيخص المعتقلين ..
وعدت فترة بأخوية البعض .. إذا بتقلو شو جاي عبالك تاكل اليوم .. يقلك ما بيجي عبالي اكل وفي ناس معتقلين 
هلق هادا لا يعتبر من منظوري " ضغط " عالحكومة !! برأيي هاد استهلاك للقضية .. مما رح يخليها تفنى بسرعة !
هلق بدي بسرعة نتناقش حول هالأشياء
1 ) - شو يعني قضية ؟
2 ) - القضايا اللي بتمسك ، بتتأثر : بالبعد الإنساني - البعد الديني - البعد الإقليمي ( الجغرافي ) ؟
3 ) - كيف برأيك فيها تحافظ قضية ما على حيويتا ؟ بعيدا عن الاستهلاك ؟؟ او الاستغلال او إساءة الاستخدام ؟
4 ) شو القضايا اللي كنت تتبناها بحياتك ؟ بعدين حسيت انها ما عادت تعنيلك ... ؟ وليش صار هالتحول ؟
5) - شو القضايا اللي بتتبناها اليوم ؟ وليش !
طولت عليكن كتير ... 
|