بصراحة يا فاوست انا شايف خيار الانتفاضة الشعبية صعب شوي يعني الشغلة مو بس انو الشعب ينزل على الشارع ويعمل اعتصامات وغيرو الشغلة متعلقة كمان بالظروف الاقليمية والدولية يعني خود عندك مثلا اوربا الشرقية كذا مرة حاولت شعوب اوربا الشرقية تنتفض ضد الحكم الشيوعي ومنها 1954 برلين الشرقية, براغ 1968 بس كل مرة كانت الدبابات السوفيتيية بالمرصاد والعالم الغربي ما كان يقدر يفتح تمو
بس مثلا برومانيا 1988 لما سقط تشاوشيسكو بالانتفاضة الشهيرة ما لقى نظامو قوة خارجية ترد عنو الشعب والظروف الدولية كانت مواتية فمشي الحال
نرجع لسوريا على فرض صارت هيك انتفاضة برايك شو رح تكون ردة فعل النظام؟؟ رح تكون برايي جنونية يعني رح ينزلو الجيش والدبابات ضد الناس وخود على قتل واعتقالات وما رح يتورعوا يعملو اي شي ليرجعوا يسيطروا على الوضع
هلق بيجوز تقلي الامم المتحدة ومنظمات حقوق الانسان بس هدا كلو حكي فاضي طالما الامريكان والاسرائيليين بدن النظام يبقى رح يبقى والنظام عرفان هالشي مشان هيك بيقدر يعمل اللي بدو ياه لحتى يخلي هالشعب المسكين تحت رحمتو
اما اخي ياس فما بظن انو الحل رح يجي من قلب النظام لسبب بسيط حافظ اسد بني نظام من اللصوص وعديمي الضمير والوطنية يعني القاعدة الذهبية بعهدو الميمون كانت انو ما بيسلم واحدمنصب ليتاكد انو ما حرامي وما عندو ضمير و في مثالين قدامك خدام وغازي كنعان طلعو من قلب النظام وحاولوا يعملوا شي برايك ممكن التغيير يجي على ايدين هيك ناس؟؟ ولو فعلا نجحوا شو فرقن عن النظام الحالي؟؟ يعني من تحت الدلف لتحت المزراب
|