اقتباس:
كاتب النص الأصلي : VivaSyria
إعتراف بحق الفلسطينيين بدولتون
اعتراف بمعاناة الفلسطينيين لمدة 60 سنة
اعتراف بأخطاء بوش مع العرب والاسلام
وعد بسحب القوات الاميركية من العراق وافغانستان
اعتراف بشرعية حماس ووعد بالحوار معها
اعتراف بعدم شرعية الاستيطان الاسرائيلي
عدم الاعتراف بالقدس عاصمة لاسرائيل
التودد للعرب من خلال زيارة المساجد والاستعانة بأيات قرئانية
لهجة خطاب ودية تعترف بالأخر وقضاياه
وغيرها الكثير
أنا عاجبتني كبداية ومروق عليها وشايف أحسن من هيك بداية مستحيل يصير غير اذا احتيلنا أميركا عسكرياً وأجبرناها على الخضوع لمطالبنا دفعة وحدة...
حلنا بقا نبطل عجرفة ونحنا أخر الناس... رحم الله إمرء عرف قدر نفسه فوقف عنده.. بقا كيف اذا جايينا واحد عم يقلنا انتو قدركون كبير وتعو نشتغل مع بعض لنوصل لشي يرضي الكل؟؟ منقلو انقلع من هون ومو أهلا وسهلا خليه يروح على تل أبيب ويخطب بالكنيست بالعبري ويرجع يعادينا للأخر متل بوش.
|
خيو انا شايف انك معلق امال كبيرة على اوباما , بس انا عندي رأي تاني
اول شي قضية الحوار اللي هو طرحها والتودد للعرب والاسلام طيب حكي كتير حلو وانا معك انو اول مرة بيصدر من رئيس امريكي وانا نفسي اتفاجأت بهالحكي ورحت قريتو بالانكليزي لاني فكرت الترجمة العربية غلط
بس اذا اجيت للواقع, الحوار بين مين ومين بدو يصير؟؟
بين اميركا من جهة و العرب, طيب مين هني العرب؟؟ حسني مبارك و لا عبد الله و لا بشار الاسد ولا القذافي؟؟
هدا حوار اعرج لانو اولا مافي تكافؤ بين الطرفين , والطرف التاني بالحوار ما بيمثل الشعوب العربية و طالما الشعوب العربية مغيبة عن الحوار رح تلاقي ناس كتير لساتن عم يسمعوا لخطابات بن لادن وغيرو
الاميركيين بالنهاية بتهمن مصالحن وبس ومصالحن ما بتمشي الا مع حلفائن الديكتاتوريين العرب , وطالما هالمعادلة عم تحكم العلاقة بين الطرفين رح تبقى الامور متل ما هي.
منجي للشغلات التانية بخطابو,
قضية الدولتين مو من عندو حتى بوش نفسو وعد فيها كتير ما رح قلك رح يعمل متل بوش بس خلينا نستنى ونشوف
الاعتراف بمعاناة الفلسطينيين مو جديد , قبلو رؤوساء امريكيين اعترفوا بهالشي, وهدا انا بسمي ربع اعتراف لانو ما حكى الحقيقة الكاملة ولا حكى عن المسبب لهيك معاناة
الاعتراف باخطاء بوش, وين هالاعتراف اذا قال انو العراق صار احسن بعد صدام
الاعتراف بشرعية حماس تم تحت شرط واحد وهو اعترافها باسرائيل وهالشي كمان ورثو عن بوش بس اعاد صياغتو, ومن المستحيل الامريكيين يحاوروا حماس او يدخلوا باي تفاوض رح يصير الا اذا عملت حماس متل ما عمل ياسر عرفات قبل اوسلو.
عدم شرعية الاستيطان الاسرائيلي, هي بعترف انها شي مختلف تماما عن سياسات بوش, بس انا بقول انو هو عم يستغل نوع من الانقسام بين مواقف اللوبي الصهيوني المدافع عن اسرائيل باميركا و بين مواقف نتنياهو ومشان هيك عم يقدر يستخدم لهجة قوية مع الاسرائيليين بخصوص هالموضوع, بس كمان بقلك هون بدك تستنى وتشوف شو رح ياخد من العرب تنازلات اضافية على اعتبار انو هو رح يضغط على اسرائيل.
عدم الاعتراف بالقدس عاصمة لاسرائيل, هالشي مو دقيق لانو الاعتراف موجود من زمان الشغلة كلها انو موعد نقل السفارة للقدس بيد الرئيس الاميركي وهالشي من ايام كلينتون اظن, ولاحظ انو بوش طوال 8 سنين ما عملها واوباما كمان هون مشي على خطاه.