[VivaSyria]

كاتب النص الأصلي : ayhamm26

خيو انا شايف انك معلق امال كبيرة على اوباما , بس انا عندي رأي تاني

اول شي قضية الحوار اللي هو طرحها والتودد للعرب والاسلام طيب حكي كتير حلو وانا معك انو اول مرة بيصدر من رئيس امريكي وانا نفسي اتفاجأت بهالحكي ورحت قريتو بالانكليزي لاني فكرت الترجمة العربية غلط

بس اذا اجيت للواقع, الحوار بين مين ومين بدو يصير؟؟
بين اميركا من جهة و العرب, طيب مين هني العرب؟؟ حسني مبارك و لا عبد الله و لا بشار الاسد ولا القذافي؟؟

هدا حوار اعرج لانو اولا مافي تكافؤ بين الطرفين , والطرف التاني بالحوار ما بيمثل الشعوب العربية و طالما الشعوب العربية مغيبة عن الحوار رح تلاقي ناس كتير لساتن عم يسمعوا لخطابات بن لادن وغيرو

الاميركيين بالنهاية بتهمن مصالحن وبس ومصالحن ما بتمشي الا مع حلفائن الديكتاتوريين العرب , وطالما هالمعادلة عم تحكم العلاقة بين الطرفين رح تبقى الامور متل ما هي.


منجي للشغلات التانية بخطابو,

قضية الدولتين مو من عندو حتى بوش نفسو وعد فيها كتير ما رح قلك رح يعمل متل بوش بس خلينا نستنى ونشوف

الاعتراف بمعاناة الفلسطينيين مو جديد , قبلو رؤوساء امريكيين اعترفوا بهالشي, وهدا انا بسمي ربع اعتراف لانو ما حكى الحقيقة الكاملة ولا حكى عن المسبب لهيك معاناة

الاعتراف باخطاء بوش, وين هالاعتراف اذا قال انو العراق صار احسن بعد صدام

الاعتراف بشرعية حماس تم تحت شرط واحد وهو اعترافها باسرائيل وهالشي كمان ورثو عن بوش بس اعاد صياغتو, ومن المستحيل الامريكيين يحاوروا حماس او يدخلوا باي تفاوض رح يصير الا اذا عملت حماس متل ما عمل ياسر عرفات قبل اوسلو.

عدم شرعية الاستيطان الاسرائيلي, هي بعترف انها شي مختلف تماما عن سياسات بوش, بس انا بقول انو هو عم يستغل نوع من الانقسام بين مواقف اللوبي الصهيوني المدافع عن اسرائيل باميركا و بين مواقف نتنياهو ومشان هيك عم يقدر يستخدم لهجة قوية مع الاسرائيليين بخصوص هالموضوع, بس كمان بقلك هون بدك تستنى وتشوف شو رح ياخد من العرب تنازلات اضافية على اعتبار انو هو رح يضغط على اسرائيل.
.

أيهم أنا بهالموضوع تحديداً حابب إطلع على النص المليان من الكاسة وعندي قناعة اذا حكام العرب بيكون عندون شرف وبيشتغلو صح بهالوضع ومع هالإدارة بيغيرو كتير من المعادلة القائمة...

عدم الاعتراف بالقدس عاصمة لاسرائيل, هالشي مو دقيق لانو الاعتراف موجود من زمان الشغلة كلها انو موعد نقل السفارة للقدس بيد الرئيس الاميركي وهالشي من ايام كلينتون اظن, ولاحظ انو بوش طوال 8 سنين ما عملها واوباما كمان هون مشي على خطاه

له ياحبيب أنا إيمت شفتني عم قول شي مو دقيق "بكل تواضع يعني " ... سيدي ماعلينا

هي النص الحرفي لفقرة القدس من الخطاب بالعربي:

لقد تدفقت دموع الكثيرين وسالت دماء الكثيرين وعلينا جميعا تقع مسئولية العمل من أجل ذلك اليوم الذي تستطيع فيه أمهات الإسرائيليين والفلسطينيين مشاهدة أبنائهم يتقدمون في حياتهم دون خوف وعندما تصبح الأرض المقدسة التي نشأت فيها الأديان الثلاثة العظيمة مكانا للسلام الذي أراده الله لها، وعندما تصبح مدينة القدس وطنا دائما لليهود والمسيحيين والمسلمين المكان الذي يستطيع فيه أبناء سيدنا إبراهيم عليه السلام أن يتعايشوا في سلام تماما كما ورد في قصة الإسراء عندما أقام الأنبياء موسى وعيسىومحمد سلام الله عليهم الصلاة معا.

وهي النص الحرفي بالإنكليزي:

Too many tears have flowed. Too much blood has been shed. All of us have a responsibility to work for the day when the mothers of Israelis and Palestinians can see their children grow up without fear; when the Holy Land of three great faiths is the place of peace that God intended it to be; when Jerusalem is a secure and lasting home for Jews and Christians and Muslims, and a place for all of the children of Abraham to mingle peacefully together as in the story of Isra, when Moses, Jesus, and Mohammed (peace be upon them) joined in prayer

.

طبعاً المصدر كل وكالات الأنباء وموقع البيت الأبيض...

فأيهم هاد الكلام جديد كلياً وفيه نص كاسة مليان فينا نتطلع عليه ونشتغل عليه ونطلع فيه خطوة خطوة.. بس برجع بقلك بدو شرفا يشتغلو عليه..
وبرجع بقول أكيد مانك متأمل يجي رئيس لأميركا وبوضع لسا العلاقات فيه مادخلت مرحلة استراتيجية انو يقلك من أول يوم القدس عاصمة إسرائيل وبدي اتدخل عسكرياً لطلع إسرائيل...

اعتذر عن اتهامي بعدم الدقة لشوف