[شب الكوبة]

المزمور السابع عشر

ـ1ـ
لَيْش خْلِقْنا وِالآثَامْ
عَم تحْصُدْنا بْمِنْجِلْها
وْلَذِّتْنا.. نْسَخِّرْ أَرْحامْ
تا نِتْجَمَّعْ دَاخِلْها؟
ـ2ـ
تِسْع شْهُورْ مْنِبْقَى جُوَّا
أَكْل وْشُرْب وْحُلْم بْعِيدْ
وْكلّ ما نْوَدِّعْ جَنِّةْ حَوَّا
بْتِرْجَعْ تِحْمِلْنا مْنِ جْدِيد
ـ3ـ
جَنِّه.. لا شَمْس وْلا نْجُومْ
النّاس الْـ فيها ضُجْرانِه
بْتِتْلَبَّدْ عَ شْطُوطَا غْيُومْ
مْنِ "حْمُولِتْها" تِعْبانِه
ـ4ـ
ما مْنِلْحَقْ نُوعَى تا نْنامْ
السَّاعات بْتِدْفُش سَاعاتْ
بْتِتْفَشْكَلْ فِينا الإِيّامْ
وِبْتِفْرَحْ فِينا الْوَقْعاتْ
ـ5ـ
نْهايِتْنا.. ما مْنَعْرِفْ وَيْنْ؟
وِبْدَايِتْنا نْسيناها
وْكلّ ما نَفَّضْ حَالُو الْبَيْنْ
بْيِلْغِي دْرُوبْ مْشيناها
ـ6ـ
مُشْ مَسْمُوح نْعِيش كْتِيرْ
يَوْمَيْن، تْلاتِه.. وْمِنْمُوتْ
مِينْ مَحَّى خَوْف التّفْكِيرْ؟
مِينْ حَبَّبْنا بالتّابُوتْ؟
ـ7ـ
هَـ الدّنْيِي.. الْـ ما مْنَعْرِفْ غَيْرَا
جِيناها وْبِالْعين دْمُوعْ
مُشْ مُمْكِنْ نِشْبَعْ مِنْ خَيْرَا
وْمِتْمَلَّكْ بِالْبَطْن.. الْجُوعْ
ـ8ـ
ساعِدْني.. إِفْهَمْ أَسْرارُو
وْإِرْضَى بْحِكْمُو عَنْ إِيمانْ
يا عَلي.. عَقْلاتي احْتَارُوا
لَيْش تْكَوَّنْ هَـ الإِنْسَانْ؟؟
**
المزمور الثامن عشر

ـ1ـ
كلّ الْخَوف الْـ جَمَّعْ حَالُو
تا يْفَرِّقْ دَرْبي عَنْ دَرْبَكْ
مْجالي رَحْ بِيغَطِّي مْجالُو
وِجْناحي.. كِلْمات بْكتْبَكْ
مُشْ خايِفْ يِطْفيني خْيالو
خايِفْ إخْسَرْ نعمة حُبَّكْ
ـ2ـ
أَشْعاري، وَمْضَه مِنْ نُورَكْ
ما بْتُحْرُقْ.. بِتْنَوِّرْ كَوْنْ
عطَّرْتا بْرِيحِةْ بَخُّورَكْ
لُوَّنْتا.. وِارْتاح اللَّوْنْ
حبَّيْت بْأَفْكارِي زُورَكْ
يا الْـ عايِشْ هَوْنِيك وْهَوْنْ
ـ3ـ
قْرِفْت مْنِ النَّظْرات الطَّرْشا
مْنِ الحُقْد الْـ أَتْقَلْ مِنْ دَمُّنْ
مْنِ الْكِذْبات الْـ بِنْيِتْ عَرْشـا
بِالرِّيق الطايِرْ مِنْ تِمُّنْ
لْسَاناتُنْ عَمْ تُفْرُشْ فَرْشا
وْتهْديدُن عَمْ يِنْفُخْ سَمُّنْ
ـ4ـ
مُشْ خايِفْ مِينْ بَدّي إِهْوَى
وْإِنْشُرْ كِلْماتو المضْوِيِّه
مُشْ خايِفْ.. إِيـماني أَقْوَى
بْوحْدِةْ أَدْيانْ سْمَاوِيِّه
بْوحْدِةْ أَللَّه.. الْـ خَلَّى التَّقْوَى
تْجَمِّعْنا بْهَـ الأَرْض سْوِيِّه
ـ5ـ
الْمَوْت حْكايِه.. حْكِيتَا قَبْلِي
يا عَلِي، وْسَامَحْت الْقاتِلْ
جُرْح وْجُرْح زْرَعْتَا بْعَقْلِي
وْضُوَّيْت مْنِ حْرُوفا مْشَاعِلْ
ما فْزعْت مْنِ الْـ نادوا بْقَتْلِي
فْزِعْت يْشَوِّهْ فِكْرَكْ.. جَاهِلْ
**