[شب الكوبة]

المزمور التّاسع عشر
ـ1ـ
شَلْحُوا عَ بْوابي التّهْديدْ
ضَافِيرُو: خْناجِرْ مَسْمُومِه
افْتَكْرُوا فِيهُنْ يِطْفُوا الْعِيدْ
الزَّارِعْ خَيْرَاتُو بِهْمُومِي
يا "هْمُومي" رِشِّي مْوَاعِيد
للحُلْم الْجايِي مْنِ بْعِيدْ
وْقُومِي يا أَحْلامِي.. قُومِي
ـ2ـ
قالُولِي: شَاعِرْ مَجْنُونْ
قَلْمَكْ عَم بِينَقِّطْ عهرْ
زَتّ بْعَقْل النَّاس ظْنُونْ
بَدْلِتْ إِيمانُنْ بِالْكفرْ
يَا بْتِخْنُقْ نَبْرات الصَّوت
يَا مْنخْنقْ صَوْتَكْ بِالْمَوتْ
ـ3ـ
وْقَالُولِي: هِنْت الأَدْيَانْ
الْـ نَزَّلْهَا أَللـه عَ الأَرْضْ
جْبَلْتَا بْبَعْضَا كِيف مَا كَانْ
عكَّرْت مْزَاج الإِنْسَانْ
الْـ حَيَّكْ عمْرُو بِالإِيمانْ
وْعَم يفرُض إِيمانُو فَرْضْ
.. غمَّضْت عْيُونُو بِالْبُغْضْ
ـ4ـ
وْقَالُولِي: سِدُّو.. وِسْكُوتْ
لْسانَكْ حَيِّه وْحَكْيَكْ سَمّْ
أَشْعارَكْ ضدّ اللاهُوتْ
وْضدّ الْخَيْر، وْضدّ السّلْمْ
وْنَاقِصْهَا المَنطِقْ والعِلْمْ
ما بْتِلْحَقْ تِخْلَقْ تَا تْمُوتْ
.. قْبِرْهَا فِيكْ بْلا تَابُوتْ
ـ5ـ
وْقالُوا.. وْقالُوا إِشْيَا كْتِيرْ
وْنَكْرُوا كلْمَاتِي كِلاَّ
كِيف بْخَلِّي النَّاس تْصِيرْ
يا عَلِي.. تْدُوب بْأَللـه
بْشَخْصِيَّاتُو الدِّينِيِّه
الْـ زّارِتْ هَـ الإِنْسانِيِّه
وْطَبْعِت بِالْقَلْب مْشاويرْ
تا تْبَشِّرْنا بْعرس كْبيرْ
بِالْجَنِّه الإِلهِيِّه
**
المزمور العشرون
ـ1ـ
آخرْ مَزْمُور بْصَفْحَاتِي
كْتَبْتُو بْدَمْعَاتِي الْعطْشانِه
عَ الْمَلْقَى.. مَرْهُونِه حْيَاتِي
يَا عَلِي.. فكِّلِّي رْهَانِي
ـ2ـ
اشْتَقْتِلَّكْ.. نَاوِلْنِي إِيدَكْ
لاقِينِي.. بَلْسِمْلِي جْرُوحِي
وْضَوِّينِي بِلْيَالِي عِيدَكْ
شَمْعَه، بْتِسْهَرْ مَعْهَا رُوحِي
ـ3ـ
كلّ الْـ قلتُو.. قلْتُو بْفَرْحَه
زْرَعْتُو بْدَفْتَرْ عُمْري.. عُمْرْ
حيَّكْت مْنِ حْرُوفُو طَرْحَه
لبَّسْتَا لِمْرُوجْ الزَّهْرْ
ـ4ـ
نصْرَانِي.. وْنادِرْ غَنِّيلَكْ
غِنِّيِّه، لَحْنَا مَعْرُوفْ
غَنُّوها الْكلّ مْقَابيلَكْ
دَقُّوا كِلْماتَا عَ دْفُوفْ
عَ الزَّقْفِه، الْـ صَارِتْ تِحْكِيلَكْ
كِيفْ طَارِتْ مِنْ بَيْن كْفُوفْ
نَغْمِه، تَـ النَّغْمِه تْصَلِّيلَكْ
وِبْمَعْبَدْ عِينَيْك تْطُوفْ
ـ5ـ
بْحِبُّنْ كلُّنْ، كلُّنْ، كلُّنْ..
يهُود، نْصَارَى، وْإِسْلامْ
بْحبُّنْ كلُّنْ، كلُّنْ، كلُّنْ
مَهْما تْفَرِّقْنَا الإِيَّامْ
عَ مْطَلِّي مَرْسُومْ مْطَلُّنْ
يَا عَلِي.. وْأَللّـه الرّسّامْ
إِيمانِي.. خَلاّنِي جِلُّنْ
وْإِتْكِي عَ مْزَامِيري وْنَامْ
وْوَزِّعْ عَ النَّاسْ.. الأَحْلامْ
**