[أم الجود]

وعينا على فكرة انو الأديان هي مصدر شريعة الحياة السوية .. لهيك ارتبط بمفهومنا الدين بالأخلاق و هالشي طبعاً مو دايماً صحيح ..

- عندك الناس اللي بتمارس تعاليم الدين و مرات بتبالغ بهالشي لأنو إما بتكون عليها العين متل رجال السياسة و الفن و هيك بتكسب شعبية و تأييد و إما بيكون الها مصالح و بدها تحافظ عليها ، متل التاجر اللي بدو يورجي زباينو انو بيخاف الله و ما بياكول حرام (و هون بتذكر من فلم عمارة يعقوبيان شخصية نور الشريف لما بيكون تاجر متدّين و مكتّر و بيطلع بالأخير تاجر مخدرات !) طبعاً كلامي ما بيعني انو كل سياسي أو فنان متديّن ّهو منافق ولا كل تاجر متدّين هو حرامي أو تاجر مخدرات بس الفكرة اللي حابة وصلها انو في كتير ناس بتتغطى بستار الدين لتعمل أشيا مو مقبولة بولا دين أو شريعة ...

- و بالمقابل عندك ناس ما عندها دين بنوب بس عندها مثل و قيم عليا بتلتزم فيها و بتعيشها .. هدول الناس ممكن يكونوا صالحين أكتر بكتير من ناس مو فهمانة شي من دينها و متدينة هيك عالبيعة كرمال تمشي مع التيار و تنفد من انتقادات المجتمع اللي مرات بيكون عبارة عن أقرب المقربين : أهلنا و قرايبينا و جيراننا و رفقاتنا ...

و مو سهل علينا نحن الشرقيين نطلع من هي النظرة : بلا دين = بلا أخلاق ، و ما بنكر انو عيشتي بأوروبا ساعدتني أتقبل هالموضوع ...