[شب الكوبة]

ألمزمور السابع
ـ1ـ
دينَكْ دِيني، دين الْحُبّ
الْحُبّ اللّي بْيِجْمَعْ أَكْوانْ
ما بْيِظْلُمْ مَخْلُوق الرَّبّ
اللّي بْيِظْلُمْ هُوِّي الشَّيْطانْ
ـ2ـ
مينْ غَيْرَكْ.. خَلاّنا نْحِسّ
بْقِيمِتْنا الإِنْسانِيِّه
وْوَحَّدْنا بْكِلْماتو بَسّ
بْشَخْصِيتو الرّبّانِيِّه؟
ـ3ـ
مِنْ وَحْيُو: غِذَّيْت الرُّوحْ
وْمِنْ قُرْآنو: حْصَدْت الْخَيْرْ
يا عَلِي.. وْمَطْرَحْ ما تْروحْ
يْسَهِّلْ بِالآياتِ السَّيْرْ
ـ4ـ
دينَكْ ديني.. مَحِّي اللَّيْلْ
بْنِجْماتْ حْروفَكْ يا مِيرْ
وْخَلِّصْنا مْنِ جْنون الْوَيْلْ
مْنِ الْكُتْبِ الْـ كِلاّ تِزْويرْ
ـ5ـ
إِسْلامَكْ.. هُوِّي الإِسْلامْ
الْحَقّ.. الْـ ما تْشَوَّهْ وِجُّو
فِسَّرْتُو.. جْبَرْت الأَحْلامْ
عَ الْكَعْبِه يْروحوا يْحِجُّوا
ـ6ـ
مِنَّكْ كانْ الْـ بَدُّو يْكونْ
وْمِنْ دونَكْ ما كان الْـ كانْ
مِحَّيْت بْإِيدَيْكْ ظْنُونْ
مَدِّتْ إِيدا عَ الْقُرْآنْ
ـ7ـ
يا عَلِي.. الْـ عَلَّيْت بْراجْ
الْكِلْمِه، الْـ بِتْدافِعْ عَنْ دينْ
لِعْبِتْ فِيه فْواجِ فْواجْ
وْتاهِتْ عَنْ دَرْبُو مْلايينْ
ـ8ـ
رَجِّعْنا.. تْعِبْنا مْنِ النَّطْرَه
عَ مْفارِقْ إِيَّام جْدادْ
يا شَايِفْ بِعْيُونَكْ.. بُكْرا
بْماضِيكْ "الْبُكْرا" بْتِنْعادْ
**
ألمزمور الثَامن

ـ1ـ
بِفْتَحْ قَلْبي تا حَاكيكْ
بْلاقيكْ بْقَلْبي مَوْجُودْ
بْأَسْهَلْ كِلْماتْ بْناجِيكْ
تا يِحْفَظْ كِلْماتي وْجُودْ
ـ2ـ
قَبْلي.. اللّي غَنُّوكْ كْتارْ
جْمَعْت غْنانيهُنْ كِلاَّ
بِكْتابي.. باقِةْ أَشْعارْ
بَرْكي بْيِرْحَمْني أَللَّه
ـ3ـ
يَسُوع الْـ عَلَّمْني حِبّ
يا عَلِي.. مِتْجَسَّدْ فِيكْ
شَارَكْتُو بْآلام الصَّلْبْ
وْخِفَّفْت عْذابُو يا شْريكْ
ـ4ـ
مُشْ رَحْ فَسِّرْ.. حَكْيي مْفَسَّرْ
سَيِّدْنا مْحَمَّدْ شُو قالْ؟
إِنْتَ بْتِشْبَهْ عِيسى أَكْتَرْ
بَيْنو وْبَيْنَكْ وِحْدِةْ حالْ
ـ5ـ
بِالْقَناعَهْ.. غْلِبْت الفَقْرْ
وْما انْذِلَّيْت لْسِحْر الْمالْ
تْرَقِّعْ بِالصِّرْمايِه العُقْرْ
تا تْعَلِّمْ كلّ الأَجْيالْ
ـ6ـ
هْنِيَّال الْـ شافَكْ عَنْ قُرْبْ
هْنِيَّال الْماشي بْدَرْبَكْ
قلتْ: الشَّرْق بْيِسْمَعْ غَرْبْ
وْبيشُوفُو.. صْدَقْت بْكتْبَكْ
ـ7ـ
ما خِفْت يْلاقيكْ الْمَوْتْ
لاقَيْتو.. وْسَيْفَكْ لامِعْ
أَللّه أَكْبَرْ.. صار الصَّوْتْ
يْأَدِّنْ.. وِتْرِدّ جْوامِعْ
ـ8ـ
يا فارِسْ جَنَّات الْخُلْدْ
مْلايِكْتَكْ كانوا يْحِبُّوكْ
غَزْلُولَكْ مِنْ نُورُنْ جِلْدْ
وْجُوَّاتْ عْيُونُنْ خَبُّوكْ
**

ألمزمور التاسع

ـ1ـ
ذاكِرْتي.. عَمْ تِمْحي الإِشْيا
عَمْ تِطْفي وَهْج التِّفْكيرْ
جَدِّدْ ذاكِرْتي.. تا إِحْيا
وْعَ شْفافي يِحْيا التِّبْشِيرْ
ـ2ـ
شُو ما قالوا.. يْقولوا عَنِّي
الْمَذْهَبْ ما بْيِعْمِلْ تَغْييرْ
ماروني، شيعي، أَوْ سِنِّي
الإِسْم زْغِيرْ.. وْأَللّه كْبيرْ
ـ3ـ
أَللَّه.. الْـ باعُوه التِّجّارْ
عَ مْنابِرْ كَرْتُونِيِّه
ما بْيِرْضى بْكلّ اللّي صارْ
بِشْعايِرْنا الدِّينِيِّه
ـ4ـ
سُبْحانو.. الْـ رَسْمَكْ مَخْلوقْ
ما بْتِخْلَقْ مِتْلو الأَزْمانْ
وَدّاكْ لْعالَمْ مَخْنوقْ
بْإِجْرامُو.. وْناسي الدَّيّانْ
ـ5ـ
يا عَلِي.. الْعالَمْ مَغْرورْ
كذّاب، مْنافِقْ، محْتالْ
ساعِدْني إِقْضي عَ شْرورْ
تْنَفَّسْها عَبْر الأَجْيالْ
ـ6ـ
جْنون الْعالَمْ عَم يِتْعِبْني
حُرِّيتو: مَوْجات ذْنُوبْ
خايِفْ لا تِجْرِفْلي إِبْني
وِتْزِتُّو عَ شْطُوط حْروبْ
ـ7ـ
مِدِّلِّي إِيدَكْ، ساعِدْني
صَلِيـبِي تْقِيلْ وْفزْعانْ
أُوقَعْ.. وِالْوَقْعَه تْبَعِّدْني
وْيِسْرِقْني غْبار النّسْيانْ
ـ8ـ
لازِمْ إِخْلَقْ عالَمْ تاني
يِفْهَمْ كِلْماتَكْ كِلاَّ
يْوَحِّدْ أَدْيانو بِدْيانِه
بْتِرْفُضْ نِتْقاسَمْ أَللَّه
**