اقتباس:
|
طيب ليش تزوير من الدرجة الاولى يعني منظمة الصحة معصومة من الخطأ ولو ماعتبرناها مرض شو ممكن نعتبرا او شو بتفسرا
|
منظمة الصحة العالمية هي المرجعية العلمية الطبية الكبرى في العالم, و تعاريفها و بروتوكولاتها مانها حكي واحد أو تنين و انما نتيجة أبحاث عميقة و مطوّلة لمجموعات كبيرة من الباحثين و العلماء... و هي الجهة الدولية الوحيدة المخوّلة بتعريف الأمراض و تصديق بروتوكولات علاجها المختلفة, و بالتالي شي هالمنظمة بتحكي عنو بشكل صريح انو مانو مرض يعني مانو مرض (يعني علمياً مافيك تسميه مرض... الا ازا عنزة و لو طارت هاد صفّى حكي تاني).
شو ممكن تعتبرا.. كل واحد يعتبرها شو ما بدو.. اعتبرا مرض ازا بدك, بس حكيك مو علمي و ما بيحقلك تمشّيه عالعالم و كأنو علمي و تفتي على أساسو ( عم قول "انت" كشخصية اعتبارية ما عم اعنيك كشخص.. عرفت كيف؟)
اقتباس:
|
انا معك انها قديمة جدا والدليل قوم لوط بس كمان هاد مش برهان كافي انو ما نعتبرها مخالفة للطبيعة
|
شلون يعني مش برهان كافي؟ شي موجود عالأرض عينك عينك هاد جزء من الطبيعة.. الطبيعة هي الأشياء الموجودة فيها و لا تصنّف حسب أهوائنا انو الشي اللي ما نحبو هاد مانو من الطبيعة و الشي اللي منحبو هاد من الطبيعة...
اقتباس:
|
كيف ممكن نربط بين لعيون الزرق والمثلية
|
بعتقد شرحي للمثال واضح, ارجع اقراه على مهل و تفهم شو قصدي بخصوص الاستثناء من القاعدة (قصدي انو أنا ما ربطت بين العيون الزرق و المثلية و انما حكيت انو ليش التعريف السطحي تبع الشذوذ يتطبق فقط عالمثليين لما حسب هالتعريف نفسه لازم يتطبّق ع كتير من الحالات الطبية لو كان صحيح)
اقتباس:
|
وبتمنى لو تعطيني تعريف ولو مبسط عن المثلية
|
عزيزي التعريف سهل و واضح و بسيط جداً و ما بعرف ليش التعقيد فيه, من لحظة ما البني آدم تخطى مرحلة معيّنة من مراحل التطوّر (عم احكي عن التطور كصنف حيواني) و صار فيها الجنس ليس فقط للتكاثر ساعتها بتتعدد الأهواء.
المشكلة تكمن انو في جزء كبير من البشرية (و مش فقط لقناعات دينية و لو انها الغالبية العظمى) ترى أن الجنس للتكاثر فقط و فقط جداً, و المتعة الجنسية هي تحصيل حاصل ( و الغريب انها تنفي وظيفة أخرى للجنس غير التكاثر و لكنها تركّز و بشدة على كبت الرغبة الجنسية بوسائل عديدة, يعني مانها موجودة بس نحاربها؟!!).
القضية معقّدة و علمية بحتة من حيث تعريفها, و بدك تدخل بأسس علم النفس الجنسي من جذورو و هالشي ما بيصير بمنتدى أو بمدوّنة أو أو أو....
ما يهم بهالحالة هو الجانب الاجتماعي من المثلية, و أعتقد انو السبب يكمن بانو ما صار في تجربة حياتية ,أو ليش الكذب؟ صارت و كتير و لكن ما بنسمّيها بمسمياتها. و المثلية موجودة بالموروث الشعبي من زمان طويل, و لسبب لا أدركه يتقبّل العقل العربي ثنائي الجنس (و الأدب العربي على ذلك شاهد من التغنّي بالغلمان و كل هالحكي) و يعني يعتبرها هالموروث الشعبي دليل فحولة زايدة انو يكون في أشخاص تطرنب عالسباتي و عالكبّة و لكن لا تتقبّل المثلية
يعني لاحظ انو حتى باللغو و السباب من الشائع جداً انو شب يقول لشب انو و الله لأفعل و أترك فيك كذا و كذا و كذا من الأشياء اللي مافي داعي نذكرها, و هاد شي يعني بعتقد كلنا بنشوفو.
تراكمت على المثليين كتير أفكار مقولبة مسبقة على انهون مجرمين أو متعاطين مخدرات و و و.. لكن هالشي مالو علاقة بالمثلية كميل جنسي و انما بحالة الإقصاء من المجتمع اللي يولّد عند هالإنسان المستبعد من المجتمع "لشذوذه" أمراض نفسية كثيرة لأن الإنسان بالتعريف هو حيوان اجتماعي و عزله عن محيطه و استبعاده عنه يؤدي إلى أعراض نفسيه هائلة. و هالأعراض هي نتيجة اجتماعية بحتة و ليست عضوية.
لاحظ انو أغلب من لا يتقبّل الفكرة في مجتمع لا يتقبّل فكرة المثلية لما يروح لبلاد برا يمكن ما يبطل هالرفض و لكن تتغير النظرة, لأنو بالخبرة الحياتية رح تلتقي مع ناس مثليين و تشوف انهون ناس طبيعيين مية بالمية و ما عندون مشكلة لما المجتمع متقبّلهون, و يعني معاملتو معك عادية متل أي شخص و بيظل هواه الجنسي هو حياته الخاصة اللي ما تشوفها, و حتى يمكن تتعامل معو سنوات طويلة و ما تحس عيه انو مثلي. و هاد الجانب اللي يجب العمل عليه من ناحية انو يا أخي طالما هو انسان ملتزم بنمط علاقات اجتماعية مع الغير طبيعي و صحيح شو بدي فيه شو يعمل داخل بيتو؟ حتى لو ما كنت متقبّل المثلية للسبب اللي هوي...
بعترف انو هاد من المواضيع اللي ما بحب ناقش فيه بنوب, لأنو يمكن لخبرة حياتية و علمية بشوف طبيعي و بديهي شغلات يمكن غيري لا يمكن حتى يتخيلها, و ليس لعلّة فيه البتة و لكن لأنو ما كان عندو فرصة الخبرة بهالنواحي
أي و هكذا
مع الشكر
