[خيالات واوهام]

كاتب النص الأصلي : بنفسجة

ياريت تخليك بحالك واذا ماعجبك ابقا لاتقرا ردودي واذا عندك تعليق تعلق بشوية احترام لراي صاحب المشاركة وبعدين ياريت تخففولي تقيمكون للاعضاء شوي ولو يارجل روق علينا وخدنا بطول بالك شوي
مع شكري لقراءتك الرد

رفيقة بنفسجة، نحن هون بمنتدى حوار وبمجرد ارسالك لرد انا بحقلي عقب عليه واذا مو عاجبك الموضوع بتقدري ما ترسلي اي رد او تبعتي رسالة لمشرفي الموقع لإيقافي بحال وجود اساءة او اتقولي لرفقاتك اللي اعتقلوا طارق ورفقاتوا انو يعتقلوني وهيك بتخلصي من لساني الطويل.

انا بالنسبة إلك كإنسانة بحترمك وبحترم كل إنسان بهل الكون انا كان تعقبي بس ضد ظاهرة الكولكة والنفاق. هون بالمنتدى في على الأقل عشر رفاق حزبيين ومخابرات مهمتون تبييض صفحة النظام وكتابة تقارير بالمشاركين بالمنتدى وتهدد الأعضاء لتخويفون وانت بتكتبي هون كرفيقة مكلفة بالرد بهذا المنتدى كمهمة حزبية.

اسمعي هي القصة انا من عيلة مسيحية (أنا الآن لا ديني وليبيرالي علماني حتى النخاع) وكنت عايش بسوريا لا اللي اهتمام لا سياسي ولا ثقافي من حوالي اكتر من 20 سنة كنت لسى يادوب مخلص بكالوريا وبليلة ما فيها ضو قمر اجوا عبيتنا زوار الفجر واخدوني على مكان ما بتمنى انو حدا يزوروا. واسبوع كامل من الضرب المستمر بدون حتى ما يسئلوني شو اسمي. بعد حوالي اسبوع بعد ما صار جسمي مثلي المصفاية من كتر ما ما عم بينزف. اخدوني لعند المعلم وبكتشف من التحقيق انو احد اعز اصدقائي معتقل بالانتماء لتنظيم اسلامي محظور بهداك الوقت كانوا يدقوا بالمشتبه به وكل رفقاتوا يكن هلق الوضع تحسن شوي. المهم كانت تهمتي انو انا وفلان بننتمي لنفس التنظيم ولانو اسمي واسم ابي وامي واسم العيلة كلها اسماء عربية ما بتدل على دين ما قدر يلاحظ انو انا مو ممكن كون اسلامي لاني مو مسلم. وبعد ما عرف المعلم بالموضوع بعتني عالزنزانة من جديد ورجع جابني تاني يوم وسائلني كل صغيرة وكبيرة عن صديقي وسألني بتعجب شلون انا بصادق واحد متلوا. الزلمة كان رفيقي بالمدرسة بنلعب طابة مع بعض ومندرس احيانا سوى بيتعشي عندي احيانا وانا احيانا بيتوا ما كان في شي بدل على انو اسلامي لانو بحياتنا ما حكينا بالدين. المهم افرجوا عني بعد تهديد واضح بتدميري اذا بفتح تمي بحرف عن اللي صار معي. طبعاً بعج اللي صار اهلي خلوا احد القرايبيين بدول العالم الحر يعملي قبول بالجامعة وهيك تركت سوريا بس بتضل بالقلب.

اذا بدي احكيلك عن الفرق بين العالم الحر اللي عايش فيه وسوريا يمكن تبكي طبعاً الفرق مو بس اقتصادي الموضوع اكبر بكتير، انا هون بحياتي ما حسيت بالخوف لا من شرطي ولا مخابرات ولا مرة وطيت صوتي وانا عن بحكي مع رفقاتي منشان ما يسمعوني المخابرات ولا اطلعت مسيرة غصب عني مشان قول بالروح بالدم لكن بس فوت عمطار دمشق بلش اعرق وبسأل حالي 1000 سؤال اذا كنت رح اعتقل ولا لأ، مع اني ما بنتمي لاي حزب او جماعة سورية لا محظورة ولا مسموحة ومالي اي نشاط سياسي إلا اذا كانت التعليق على خبر او الكتابة بمنتدى يعتبر سياسة عندكون.

انا هون انسان محترم اللي حقوقي الواضحة والمحفوظة اللي ما بيقدر حتى رئيس الحكومة يقرب عليها الا وفك القانون وهنيك عندكون اي شرطي او عنصر أمن بيقدر يسلبني كل انسانيتي اذا ضربت براسوا الحيونة. سمعة سوريا بمجال حقوق الإنسان والحريات العامة عنجد بخجل وبخليني اخجل بس اتناقش مع اي انسان مثقف من هون حول الأوضاع هنيك.

طولت بالحكي بس بدي الك انو كل مرة برجع عسوريا بشوف البلد كلمالا لورا والناس عايفة حالة وجهل تخلف مو معقول. اسمحلي من 10 سنين لهلق عطيني اي شغلة تحسنت بسوريا. فقر وبطالة ومشافي متل المسالخ وتعليم بخجل واعلام بضحك وفساد بيخجل اول كلمة بسمعا بسوريا شو جايبلنا معك - مين انت حتى جبلك معي شي وليش؟ - طبعاً عدا مليون شغلة من علنوع بكل مرة. لا تفكري انو انا شمتان ما حدا بيشمت بحالوا بس هادا اللي عم بيصير نتيجة للديكتاتورية اللي انت عم دافعي عنا.

برجع بقلك الموضوع مو شخصي وانا ما هم هاجمك اللك انا عم هاجم نهج الدفاع عن النظام ان كان على حق وان كان على باطل وعم هاجم تمسيح الجوخ اللي وصلنا لهل الحالة.

وتحية الك وآسف عالإزعاج