فتح عيونك شوف حدق بالصور______وقلي شو ناطر بعد يا رب البشر
قالو بتمهل ما بتهمل كيف________بعد اللي شفتو اليوم بتغض النظر
شفت الطفال منتفة بين الركام_______شفت الدموم مشرشرة فوق الحجر؟
نتاتيف لحم مغطية كل المكان______ع الارض ع الحيطان او فوق الشجر
هودي يا الله نتف من هيكل ملاك_____عضامو يا الله منتفة متل الابر
يمكن بيحلم كان بي طلة العيد______بيحلم لامو كيف بيقطف قمر
شوفو عيونو شاخصة صوب السما______يمكن بيصلي كان تاترد القدر
هوني يا الله كان لظهور المسيح _____واول عجيبة بدنيتك كل الاثر
انو هدول الناس مو صنعة ايديك_______حتى تركت عليهن وحوش التتر
انو هدولي كان معدنهن تراب _______وغيرن يا الله كان معدنهن درر
قلي شو ناطر بعد يا رب البشر