أولا المصطلحات :
سعة المحرك و التي تقاس بال (( سي سي ))CC أو الليتر L
وهيه حجم حجرات الأحتراق في المحرك (( يعني حجم الغرف اللي بيحترق فيها الوقود في المحرك ))
مثال :
2000 سي سي = 2.0 ليتر
ال سي سي يعني سينتيمتر مكعب
عزم المحرك Trouqe: يعني العزم اللي بيولدو المحرك يقاس بالنيوتن ع المتر المربع nm
القوة الحصانية للمحرك : يعني قوة و أستطاعة المحرك تقاس بالحصان البخاري HP
يعني Hourse Power
سرعة المحرك : Rpm يعني سرعة دوران المحرك (( كم دورة بالدقيقة )) Round per minute
أغلب السيارات مزودة بعداد على التابلو تقيس سرعة دوران المحرك
هون هلأ بدنا نشوف شو يعني الأمور اللي كنت أكتبها بالشروحات تبع مواصفات السيارات :
مثلاً لما كنت أكتب محرك أربع أو خمسة أو ست أسطوانات سعة 2000 سي سي يولد قوة مقدارها 150 حصان
Hp 150 @5000 rpm يعني 150 حصان عند 5000 دورة بالدقيقة
و الشي بينطبق ع العزم أيضاُ
هلأ مو ضروري زيادة سعة المحرك تزيد القوة الحصانية معا
يعني في محركات 4 سلندر 2500 سي سي بتعطي 150 حصان
وفي محركات 4 سلندر 2000 سي سي بتعطي 150 حصان أيضاً
هاد الشي بيختلف حسب تقنية التصنيع وحسب خبرة الشركات الصانعة
يعني هون المعلمية بتصنيع المحرك
أحياناً في محركات 6 سلندر أستطاعتها نفس أو أقل من 4 سلندر من نوع تاني
هون بيبين معنا أنو لما لازم نعمل مقارنة بين سيارتين من نفس الفئة تكون المقارنة من عدة نواحي حتى نحكم أي سيارة فيها تقنية أعلى بالتصنيع هي العملية بتتسمى بالمصطلح التقني Compare
لما قول أنو المكابح أقراص مهواة أمامية وخلفية مع ABS
الأقراص يعني بالعامية (( الدسكات )) تبع البريك (( الفرام )) في سيارات بتكون أقراص من قدام ومن ورا وبتكون هالأقراص ألها فتحات بجسما بتسمح بالتبادل الحراري مع الجو ومع الهواء الناتج عن سرعة السيارة ودوران الدواليب
وفي سيارات بتكون أقراص من قدام و ((drumms )) من ورا يعني بالعامية (( طنابير )) وأغلب السيارات بتستخدم هالنظام
هلأ نظام ABS بتوقع أغلبكون سمع عن هالنظام
اللي هوه نظام منع أنغلاق المكابح (( أو منع التزحلق ))
مبدأ هالنظام بشكل بسيط هوه أنو ما يخلي الدواليب لما تضرب فرام تشفط ع الأرض و تزحط عن طريق أعطاء عدة دفعات للسائل الهيدروليكي اللي بالفرام (( فرام متدرج )) يعني بيخلي السيارة تتدرج بالتوقف بدون ما تزحط وتميل يمين وشمال ع السرعة العالية
يعني الفرملة بتصير ع مراحل تفصل بينها زمن أقل من الثانية بل أجزاء من الثانية
وهالعملية بتتم عن طريق ECU معين خاص بهالنظام يعني وحدة ألكترونية (( متل البروسيسر تبع الكومبيوتر )) بتاخود هالوحدة معلومات عن طريق حساسات خاصة بنظام النبضات عند أقراص الفرامل بتقيس سرعة السيارة و عدة أشياء متل أهتزازات الطريق و بتنقلها للوحدة الألكترونية اللي بتعالج هالمعلومات و بتبعتها لنظام ضخ السائل الهيدروليكي (( زيت الفرام )) وبتعطي أمر بالضغط بضغط معين محسوب بهل الوحدة يناسب سرعة السيارة و الأمور التانية
مارح طول أكتر من هيك أحسن ما يوجعكون راسكون
رح كمل بعدين