[krimbow]

مرحبا يا جماعة الخير ...

هلأ شغلة الطائفية بشكل عام .. بمنظور التعصب ... موجودة وين ما كان .. وين ما كان، بفرنسا في طائفية، بانكلترا، بالمانيا، بمصر بالخليج باميركا بالصين ..الخ الخ...

طبيعة الانسان انو بيسعى للتفرد من جهة .. و للاجتماع من جهة تانية ...
و هالشي بيتغذا او بيتم اشباعو من خلال الانتماء لشي زغير، متل الطايفة او العرق او او ..الخ

ما فينا نقول عن الطائفي حمار، هاد مخلوق عندو حاجة متل الجوع متل العطش .. الخ .. بدو يغذيها من خلال شعورو بالانتماء لشي متميز .. مو بالضرورة يكون متفوق، او متميز بشكل ايجابي

ازا انت عندك القدرة انك تصوم عن هالحاجة، هاد مو معناه انو غيرك بيقدر، و لا بيعني انو هوي صار حمار

المهم...

انو ببلاد برا، عندهم مشاكل بسبب التعصب، مو ما عندهم، بس عنا بتكون كتير كتير واضحة + كتير كتير متفجرة، بينما عندهم بتظهر من قبيل كسر الروتين، زوبعة بفنجان و خلصنا، و بتظهر بفترات متباعدة جدا، و بتموت بارضها.
بينما عنا.. بتطول كتير كتير، و بيصير الها ايدين و رجلين، و ما بتعود بتعرف المبتدأ من الخبر،

هلأ الفرق بيننا و بين غيرنا ... انو هنن وصلوا لمعادلة مهمة جدا .. و هي التالية:

"انا بكرهك و هاد حقي، انت بتكرهني و هاد حقك، بس بالمقابل، انا بحترم حقك بالوجود و الحياة، و انت بتحترم حقي بالوجود و الحياة"

برا وصولوا لتطبيق هالمعادلة، و انطلاقا منها، بلشوا "يحاولوا" يلغوا الحواجز بين بعضهم، و مستندين على شعور بالراحة انو الكل متفق على حق الجميع بالوجود و الحياة

بينما عنا...
ناس بدها تهجر طوايف بحالها، ناس بدها تبيد طوايف بحالها، ناس بدها تقمع طوايف بحالها

ما فينا نلغي الطائفية من بلادنا، كل طائفة بشكل عام عندها مخزون ثقافي و غير ثقافي بيخليها تحيا الفين سنة لقدام...
عم احكيكم هالحكي بشواهد تاريخية، ما حدا قدر ينجح بالغاء الطائفية، مع انهم اشطر مننا
يعني انطوان سعادة كان اشطر مننا، و كذلك ميشيل عفلق، و كذلك حافظ الاسد
و جربوا كل الوسائل المتاحة .. ناس سايروا و ناس كولكوا و ناس تحاوروا و قيل لهم على ألسنة شيوخ حماه "لو ادعيت النبوءة لتبعناك"
و في ناس متل رفعت هدوا مدن متل ما هيي...
و في ناس لحتى يخلصوا من الطائفية، انكروا كل الطوايف بما فيها طوايفهم، فصاروا طايفة لوحدهم، شي ملحدين، شي شيوعيين، شي ...
بالمختصر ازدادوا الـ 70 طايفة يهودية، و الـ 71 طايفة مسيحية، و الـ 72 طايفة مسلمة .. شي عشرين تلاتين طايفة موديرن

و مع ذلك ... ازدادت الطين بلة

بدكم نوصل لنتيجة؟؟؟
"إذا أردت ان تطاع .. اطلب المستطاع"
خلونا نتفق على معادلة بسيطة

انا رح اكره كل واحد مش من طايفتي، بس رح احترم حقو بالوجود و الحياة.
و بطالب كل واحد بيكرهني لأني مش من طايفتو، انو يحترم حقي بالوجود و الحياة...

و دمتم