اديش بتشوفي انو الاعلام الاميركي بيعكس واقع المجتمع؟؟
الاعلام الاميركي هو بنقدر نعتبره الحلقه الأضعف بايد الشعب .. و الحلقة الاقوى بايد الحكومة .. و بعتقد هي الديكتاتوريه الذكية .. انك تخلي الشعب يعمل اللي الحكومة بدها ياه بدون شوشرة بدون ما يحس حاله مضغوط من قبلها .. هيك تسالي ..
شو هي اكتر عادي واجهتي صعوبي بتغييرها عند انتقالك لاميركا؟
سماع فيروز الصبح بالراديو يمكن و نظام المدارس .. صراحة ما بتذكر هلأ لما برجع بفكر لورا بحس انو كل شي صار فجأه و بسرعة و ما لحقت حتّى واجه صعوبات
ضمن المجتمع السوري قليلي العائلات يلي بتسمح بسهولي لبناتها يدرسوا بالخارج وحدهن..
هلئ انتي حمصية فهالشي ساعدك اكيد..لكن هل كان في اعتراضات؟ وهل واجهتي مشاكل بهالخصوص؟
للصراحة أنا عيلتي اوبن مايند
بس أنا ما اجيت لحالي لهون عاميركا .. الوالد كان هون و اجيت انا و اخي .. اضافه لأنو كل العيلة الكريمه من عموم و عمات كانو هون مع عيلهم .. لكن المشكلة بلشت وقت اجيت لهون و كل ما بدي قول للمشوار الو .. لازم اخي و ابي و عمي وولاد الجيران كلهم يجوا معي
.. بعدين شوي شوي بلش يمشي الحال و هلأ كنـّا عم نحضّر لانو ننتقل عالسكن الجامعي لحالي عغير منطقة لكن كونه طلع غالي جدا جدا جزيلا ً فتغير المشروع ..
كيف تعرفتي عأخوية؟وهل كنتي متوقعة لما سجلتي تشكل اخوية جزء من تكوينك؟
كتبت كذا مرّه كيف تعرفت عاخويه .. عن طريق الصدفه كانت مسيفة على فلوبي ( ايام الفلوبيز
) اوّل ما زادوا مساحه الهوت ميل كان في شخص بعرفه بكفي نت عاطيني ياه للفلوبي لاتعلّم كيف بزيد مساحه الهوت ميل تبعي .. فبالبيت عم اتصفـّح و جرّب و بتطلع معي اخويه .. ضليت اتصفحها سنتين قبل ما سجّل فيها .. لكن تصفح خفيف (( صالون ، عالطاير ، .. الخ )) هيك مواضيع خفيفة نضيفة ما بتوجع الراس كتير .. هالحكي بتقريبا تموز 2003 أو 2004 ما بتذكر تماما ً بعدها حاولت سجّل مرّه بعد ما انتقلت لهون و لكن كان مسكر باب التسجيل و انا ما اعرف شو عم يصير و فكر حالي عم خبص بشي شغله
بعدين مرّه مدري كيف هيك سجلت و مشي الحال و يا للفرحة و صار الي صار ..
الشق التاني من السؤال .. فلاء صراحة ما كنت متوقعه لكن كنت حس انو في شي غريب بهالمكان ( اذا اعتبرناه مكان ) .. و بتعرف انت كمالة القصـّه
علاقة ذا مورنينغ مع الفن كيف بتوصفيها؟
فنيـّة
هل بتشعر ذا مورنينغ انو قسمها عم بينال التقدير والمتابعة اللي بيستحقا؟
صراحة لاء
.. بيجي اوقات بحس انو مافي غير حديدان ( أنا ) بالميدان .. لكن متل ما ذكرت سابقا ً ما بلوم الناس كتير .. نحنا ما كتير لسـّا متعودين عالفن المرأي ( الرسم و التصوير و النحت ) فما فيّ اطلب من الناس انو يصير عندها اهتمامات بشي نحنا كمجتمع ما كتير يعني متعودين عليه .. لكن هالشي بيحسسني انو لازم ساهم بانو خلي الناس تعرف و ت حب و تشارك و في ناس بتشارك بالقسم اليوم ما كانت تفوت عليه زمان و هالشي بخليني حس بالفخر
..
فيما يخص الكاركتير .. بحس الناس فهمانه الكاركتير غلط يعني انو لازم اي شي يضحك كاركتير و تسالي .. بس بشكل عام انا راضيه جدّا ً عن الاقسام اللي مستلمتها و عن كل اللي فيها ..
وكيف بتشوفي مستوى اعضاء اخوية الفني؟
بعتقد ذكرت هالشي بالرد السابق ..
الاقبال عمسابقة التصوير فاجأك؟وليش؟
فعلا ً فاجأني جدّا ً كنت خايفة ما حدا يشارك .. نظرا ً لانو تاريخ المسابقات بأخويه بعد مسابقة حسام ملحم ما كتير كان مشجع ليخليني اتوقع المشاركة الواسعه للي صارت .. اضافه لانو خفت ما كتير الناس تفهم فكرة المسابقة .. أو تخاف تشارك .. أو تقلل مروه و ما تشارك .. كتير اشيا خطرت عبالي ايام المسابقة لكن كان عندي شويه أمـل و شويه شغل عالمسابقة و صار اللي شفناه ..
لليوم و بعد تسكير المسابقة بقريب الـ 15 يوم نزل مشاركات
( متأخره طبعا ً لكن بتدعوا للسعاده )و هون و من منبري هذا بدي اعيد الشكر لكل مين شارك و بعتذر من الناس اللي ما وصلت صورهم للترشيحات لكن بأكد انو أغلب الصور ترشحت من احد اعضاء اللجنة لكن كان الافضليه للمرشحين الاغلبية ..
و نشكر لجنه التحكيم و ميرسي لالله اللي جمعنا
واديش برأيك لعب جيمي دور بهالاقبال كأول متسابق
؟
هاهاهاها .. لعب بالاربعه
ذا مورنينغ كيفك مع الله؟
شغلة
..
يعني انا بيربطني بالله علاقة كتير حلوه .. بعيدا ً عن الأديان و هالقصص .. الله انضف كتير من اللعب اللي عم يصير بالاديان .. لذلك فينا نقول علاقتي بالله جيده و بالاديان سيئه جدا ً .. " لا تقل الله في قلبي بل قل انا في قلب الله " جبران خليل جبران
كيفك مع سعدو؟
كنت اهضم الفكره أكتر ببداياتها
بشوف موقفك من السعدوية حيادي..طيب شو موقفك منا؟
حيادي
اخوية صبية عانت كتير ولسا عم تعاني..بتوافقي عهالشي وليش؟
بوافق وبشدّه ..
"الانترنيت مجتمع بديل".. في اشخاص بأمنوا بامكانية التعارف وانشاء الصداقات وحتى الحب على الانترنيت..
وفي اشخاص بترفض الفكرة من حيث المبدأ..شو رأيك بكل نوع؟
هلأ هاد السؤال بدّه صفنة .. و بعد الصفنه خلينا نتفق على شغله :
الانترنت لا يمكن يكون بديل عن الواقع ، الواقع لا يمكن يكون بديل عن النت ..
يعني متل دائما ً الغرب بيخترع صابونه يتحمم فيها و نحنا العرب بنجيبها و بنتزحلط فيها و بنوقع عراسنا طخ
..
الانترنت وسيله تواصل .. وسيلة حلوه كتير لكن عنـّا نحنا كل مين عنده عقده بحياته طلعها عالنت
.. اللي بدّه يتضحك عصبايا و مش قادر ياخد راحته بالواقع صارت شغلته عالنت .. و الصبية اللي حلمها تصير سندريلا و ناطره الأمير لاقت حدا يتضحك عليها عالنت .. و طنجره و لقت غطاها .. طبعا ً هالشي ضمن المجتمعات و العائلات المنغلقة ..
فصار في رد فعل عام تجاه النت و علاقاته .. لكن هل النت كله ناس بدها تضحك عبعض و ناس معقده فايته تطلع عقدها عبعض ؟
أكيد لاء .. ببداية دخولي عالم النت كنت متحفظه جدّا ً جدّا ً جدّا ً نظرا ً للفكرة اللي كانت عندي حيال النت و علاقاته و صداقاته .. لكن مع الوقت صار فيّ ميز و اعرف انو مافيك تعمم شي عالنت لانه مليئ بكل انواع البشر ..
الصداقات عالنت حلوه كتير .. لكن منها لازم يضل في سياق النت و منها ممكن ينتقل ليصير على ارض الواقع ..
ً فيما يخص الحب عالنت فأنا كنت ذكرت سابقا ً مرات انو صعب تحب و ما تقدر تشوف عيون اللي بتحبه كل يوم
.. صعب تحب و ما تقدر تشبك ايدك بايد اللي بتحبه .. لكن هل ممكن انو ينشأ بداخلك مشاعر ( حب ) بدون هالتفاصيل ؟ اي ممكن .. تبقى بحاجه للقاء لتاخد ابعاد اكتر و أجمل لكن بامكانها تنشأ و تكون حلوة و مميزة ..
حاجتك هلئ..
