اقتباس:
كاتب النص الأصلي : VivaSyria
طيب اذا قسمنا هالفقرة يلي عم تحكي فيها لقسمين : أول قسم بيعني انك انت مقتنع انو الأزمة الاقتصادية العالمية الحالية هي خارج السيطرة بالنسبة لامريكا؟؟ يعني برأيك انو أمريكا متل بقية الدول يلي بتتعرض لازمات داخلية فبتنجبر انو تقلل من تداخلاتها الخارجية؟؟ طيب شو رأيك بالأزمات الداخلية التاريخية يلي تعرضتلها أمريكا و كانت بقمة تدخلاتها ( العسكرية تحديداً).. يعني من يومين كانت أزمة الرهن العقاري و ماشفنا أمريكا تغيير عليها شي.. طيب و فضييحة ووتر غيت و الزلزال الداخلي يلي سببتو شو غير من خططها يلي كانت ماشية عليها؟؟ يعني باختصار بدي قلك انو هنن مارح يتغيرو معنا اذا نحنا ما تغيرنا أو غيرنا.. بيشرفني مرورك ياس
|
فضيحة ووتر غيت كانت فضيحة سياسية بحتة .. و ما كان ع أساسها لازم يأثر شي, و مع ذلك سببت لخبطة سياسية
بالنسبة للاقتصاد.. أميركا قبلة الرأسمالية, و على هالأساس ما رح تقوم بشي ضد مصلحتها الاقتصادية ككيان.. و كل حروبها و معاركها و مغامراتها كانت لدواعي اقتصادية أو استراتيجية محددة و واضحة.. و الربط الاقتصادي فيها جدا مهم. و خلال فترات عديدة من الصعوبات الاقتصادية أميركا انحسرت خارجيا بتدخلاتها العسكرية .. شو طالعها من فيتنام غير انو التكلفة الاقتصادية كانت باهضة جدا و بهداك الوقت كان شبح الحرب بالشرق الأوسط يجبرها تحسب حساب أزمة اقتصادية.. و اذا رجعت للخلف كمان... شو اللي خلى أميركا تتردد بالمشاركة بالحرب العالمية الثانية لحد ما انضربو من قبل اليابانيين غير لأنو كانت خارجة من فترة انحسار اقتصادي.. حرب الكوريتين أميركا فاتت و طلعت متل التوتو لأنو كانت لسى عم تدفع فواتير الحرب العالمية... الخ
لاحظ كيف لو تابعت أخبار الحملة الانتخابية... ما حدا يراهن عالحرب.. لأنو بأميركا صار في قناعة انو الحرب تكلّف مصاري و بالفترة الحالية ما خرجنا نصرف مصاري.. و ربح أوباما على هيلاري لأنو هاجمها من ناحية انو هيي دعمت الحرب ببدايتها و هو كان ضد حرب العراق من أول لحظة.. حتى ماكين نفسو ما بيحكي عن حروب, فقط يجيب سيرة خروج مشّرف من العراق.
أما بالنسبة للأزمة الاقتصادية.. نحنا على أبوابها.. لسى ما دخلناها.. أزمة القروض العقارية لحد الآن ما تخطت القنبلة الاعلامية... لسى ما بديت الأزمة اللي رح تجبر الحكومة الأميركية, و اغلب الحكومات الغربية, باتباع سياسة تقشّف عميق جدا, و ما رح يكون في مصاري لأي مغامرة عسكرية... في جبهة راح تنفتح قريبا (مو بس القروض العقارية... سعر النفط و الحديد و المواد الغذائية الاساسية كمان) راح تجبر أوباما يغلق جبهات الخارج .. و لهالسبب طلع, لأنو الناس بدها رئيس يصلحلهون اقتصادهون