[قرصان الأدرياتيك]

كاتب النص الأصلي : Miss Petals

اسئلة عاديه وطبيعية إذا كنت طبيعي

والله مو مبيّن أنّو أسئلة عاديّة وطبيعيّة، أنا شفت فيها قلّة عقلانيّة، ومن خلال الأجوبة رح نشوف كيف!!!

عندما تكون بطارية (الريموت كونترول) ضعيفة نقوم بالضغط بقوة على الأزرار؟؟ يعني بنشحن البطارية!!؟؟
الموضوع ما بيتعلّق بس بالبطّاريّة... أحياناً الأزرار تعلّق وأحياناً موضع الزرّ الإلكتروني بحاجة لضغط معيّن... (عم نحكي عن الأجهزة الصينيّة) والأهمّ من كل شي أنّو الإنسان بطبعو بيلجأ للقوّة إذا ما مشي معو بالسهل.


ـ لماذا نخفض صوت المسجل أو (الراديو) في السيارة عندما نشعر بأننا دخلنا بالطريق الخطأ؟؟؟ يعني كذا بنصير نعرف الطريق الصحيح!!؟؟
إي يا ستّي، لأن معروف أنّو الموسيقى الصّاخبة تضعف التركيز على التفكير، ومن هيك توطاية الصّوت بتخلي الواحد يشوف عرواق وين الله حاطّو!!! ولا لازم يفكّر وهيفا عم تصيح بوس الواوا... إي شلون بدّو يفكّر شلون؟!

ـ لماذا نقول هدية مجانية؟؟ وهل يوجد هدية غير مجانية!!؟؟
إي عيوني في هديّة غير مجّانيّة، الهديّة غير المجانيّة هيّ اللي نقابل فيها هديّة أخرى... يعني متل ما تعوّدوا البشر هديّة مقابل هديّة، إي شلون بدك ياها تكون مجانيّة؟! هلا إذا قلتيلي أنّو "الهديّة" بحد ذاتها مجانيّة فرح قلّك: إي بس مو بعالم اليوم... كلمة "هديّة" صارت مجرّد عادة مو أكتر!

ـ لماذا عندما نكون داخل المنزل والسماء تُمطر نتسائل : هل السماء تُمطر برا؟؟ يعني بحياتها أمطرت جوا مو برا!!؟؟
والله أنا بعمري ما طرحت هيك سؤال غبي!!!

ـ لماذا عندما نقرأ على الحائط 'احترس من الدهان!' لا نصدق بل نجرب ذلك بأصبعنا؟؟ يعني اللي دهن الحائط لازم يحلف!!؟؟
"أنا أشكّ إذاً أنا موجود"... القضيّة وجوديّة وتنبع من الشكّ بكل شي حول الإنسان وحتّى وجودو بذاتو.

ـ لماذا عندما توقف سيارتك في موقف خالي من السيارات يأتي واحد بعدك ويوقف سيارته بجانب سيارتك؟؟ يعني يترك الموقف كله ويوقف جنبك!!؟؟
لأ خيتو بس الإنسان اجتماعي بطبعو وبيشعر بالأمان بقرب إنسان تاني بموقف فاضي طويل عريض... ينبع من شعور الإنسان وحاجتو لهالشي.

ـ لماذا عندما يتأخر المصعد نضغط عدة مرات على الزر؟؟يعني هكذا بيستحي على دمه ويجي بسرعة!!؟؟
أنا واحد ماللي يعملوها لأن لما بكون مستعجل ما فيّ وقف بلا ما أعمل شي فبقضّيها بكبس الأزرار... قلق يا أختي قلق!!!


ـ لماذا عندما تكون منتظراً المصعد ويأتي شخص آخر تجده يضغط الزر أيضاً لطلبه؟؟ يعني مو شايفك بالمرة!!؟؟
لأ بس بشان فرجيه أنّو أنا كمان موجود وطالع بالمصعد معك فدير بالك عحالك .

ـ لماذا نفتح فمنا عندما نقوم بإطعام الطفل الصغير؟؟يعني إحنا اللي ناكل وإلا هو!!؟؟
لأنّ الطفل يكون مثل الحيوان يحتاج إلى التقليد أكثر من التفكير... وفتح الفم لتعليمه هذه الحركة... يعني عن جد هاد أغبى سؤال بين الأسئلة!!!

ـ لماذا نشعر دوماً بأننا بحاجة إلى 10 دقائق نوم إضافية كلما استيقظنا صباحاً؟؟
لأن عيوني بحسب أسرار النوم (الطب) نوم عميق لخمس دقائق أو عشرة ممكن تعوّض ساعتين من نوم قلق ومقلّب! وعادةً ما يعبّر الإنسان عن رفضو النهوض فتكون هالدقائق متل تحدّي ورفض وبيشعر أنّو حقّق شي وبعدها بيقوم متل الحمار عالشغل!

ـ لماذا يكون الشخص الذي يشخر ليلاً أول من تغمض عينيه؟؟يعني ما يكفي شخير وينام بدري!!؟؟
أنتِ بتحسّي هيك لأنّك لسّاتك فايقة بسبب شخيرو ... بس بيكون راح وقت منيح!

ـ ليش بعد ما نشرب بيالة الشاهي كلها نطالع فيها إذا فيها شي ولا خلص…؟؟ يعني ما نصدق حتى نشوف!!؟؟
شو هاد؟!!! .

ـ ليش لما تكون قاعد في مكان عام وتسمع رنة هاتف جوال على طول تطلع جوالك..؟؟ليه أنت حضرتك مهم كثير حتى يرن (موبايلك) بين كل هالبشر!!؟؟
لأن البركة بالبشر كل يوم رنّة شكل... فالواح عَ قد ما عم يغيّر رنّات صاير عم ينسى أنو رنّة حط آخر شي فيطالع الموبايل ليتأكّد مو أكتر...


ـ ليش وأنت تقرأ الحين هذا (الإيميل) تبتسم...؟؟ يعني اللي أرسله لك بيشوفك..!!؟
أوّل شي أنا ما ابتسمت... أنا ضحكت أنّو لسّا في بشر بتفكّر تطرح هيك أسئلة أجوبتا انعرفت بعد كل هالعلوم الحديثة... وتاني شي الإنسان لما يبتسم أو يضحك ما بيعمل هالشي كرمال حدا يشوفو... بينبع منّو وبس، ولما يفرح بيعبّر عن فرحو كم ذاتو!

ـ لماذا يصعب علينا قول الحقيقة بينما لا يوجد أسهل من قول الباطل...؟؟؟
مو صحيح... أسهل من قول الحقيقة ما في! والمو عاجبو يدق راسو بستين حيط!!!

ـ لماذا نشعر بالنعاس ونحن نُصلي.. ولكننا نستيقظ فجأة ونشعر بالنشاط فور انتهائنا من الصلاة ؟؟؟؟؟
لأن الحكي مع الربّ أحياناً بينعّس . عم أمزح! لأن الاستمرار على فعل شيء روحي وبنفس الوتيرة بيبعد الجسد عن النشاط والحركة، وهالشي بيعرضو بشكل طبيعي للنعاس! الاسترخاء سبب رئيسي!

ـ لماذا نسهر الليل كل يوم من أجل مباراة في كرة قدم أو مشاهدة فيلم أو مجالسة صديق ولا نسهر بقراءة القرآن أو الصلاة؟
هلا كرمال القرآن... أنا ماني مسلم! وكرمال الصّلاة الله ما خلقني كرمال قضّي ليلي ونهاري وأنا عم صلّيلو، الله خلق البشر لتتمتّع بفرح بالحياة وتشارك الآخرين بفرح الحياة والصّلاة هي عنصر من المشاركة مو كل شيء يعني! بظنّ محبّة الرب والآخرين بتغني الإنسان عن مليون ساعة صلاة، لأن ما بتنفع الصلاة والزكاة والصوم إذا كان الإنسان فاسد من جوا وإذا كان تعاملو مع البشر فاسد متلو!!!

ـ لماذا نستيقظ باكراً من أجل العمل ولا نستيقظ من أجل صلاة الفجر؟
والله لأن صلاة الفجر ما رح تطعميني خبز!!! وبعدين الصّلاة مقبولة من الرب بالحق والروح وحاجة شرائع وتوقيت وما بعرف شو... لك الله روح وبيحب عبادة الروح مو الجسد! افهموها بقا!

ـ لماذا نخشى مراقبة الناس لنا ولا نخشى مراقبة الله؟
لأن نعرف أنّو الله بيحبنا وغفور ورحيم، ومتأكدين بنفس الوقت أنو البشر ما رح ترحمنا إذا شافتنا أو مسكتنا...

ـ لماذا نُنفق الأموال الكثيرة للمتع والرحلات مع أنها زائلة، ونبخل بالصدقات على الفقراء مع أنها باقية؟
ما عندي هالأموال ولو موجودة كنت أنفقت هون شوي وهونيك شوي!

ـ لماذا يصعب علينا الكلام عن الله تعالى وأمور الدين... ويسهل علينا الكلام عن باقي الأشياء؟؟؟؟؟
لأن عالم اليوم عالم مادّي متعلّق بشكل رئيسي بالمادّة ويرفض بشكل قاطع أي شيء عن الروح والله...

ـ لماذا نقول أننا نُحب الله ونحن نعصيه..؟؟ ونقول أننا نكره الشيطان ونحن مطيعين له ومطأطئين رؤوسنا لجنده؟
ياما عصيت أهلي وهالشي ما بيتعلق بمحبتي ألهن! الموضوع بيتعلق باختباري الحياتي أنا، ومن طبيعة الإنسان أنو ما بيتعلم إلا إذا جرب (من كيسو) بشرفي هالسؤال طلع أغبى من اللي قلت عنّو أنّو أغبى سؤال!!!

ـ لماذا نحس بالملل عند قراءة مقال ديني... ونشعر بالفضول عند قراءة مقال عن أي شيء آخر؟؟؟
لأن المقال الديني علش بعلش... وشي بيوجع الراس... وبيخلق نزاعات وكراهية وعقد ومسخرة!

ـ لماذا نمسح الرسائل الإلكترونية التي تتحدث عن الأمور الدينية... ونقوم بإعادة إرسال الرسائل العادية؟؟؟
لأنَّ الرسائل الدينيّة للأسف بتحمل لينكات ودعايات ومدفوع حقها سلفاً، بس متل ما سبق وقلت كتيرين هن اللي بينضحك عليهن بسهولة بس حطلن اسم الله بالإيميل!

ـ لماذا نُحب سماع الأغاني بسياراتنا...؟؟ ونكره سماع القرآن فيها .
هاد اللي كان ناقصنا!!! أصلاً مصر مو محتاجة لهالنصيحة... ما في تكسي يخلى من الموضوع!

ـ لماذا نرى أن المساجد أصبحت شبه مهجورة... وأن المقاهي والاستراحات والملاهي أصبحت عامرة؟؟؟
لأن بالمساجد ما عاد تسمع غير التحريض على كره الآخر والعنصريّة، وأي خطبة من خطب الجمعة بتأكّد هالكلام!!! واللي عندو عقل للفهم فليفهم.

ـ لماذا لا نُحب من ينصحنا ويُريد لنا الجنة...!!؟؟ ونبتعد عنه ونُحب من يقودنا إلى الهلاك ونتقرب منه وإذا افتقدناه نبحث عنه؟؟؟
الجنّة؟!!! لك يا عمّي الجنّة بتبدا عالأرض وعيش مع البشر بسلام وحب كأنّك عايش بالجنّة!

ـ لماذا نذكر عيوب الناس دائماً وننسى عيوبنا؟
لأن الإنسان متعوّد يبرر أخطاءه بأخطاء الآخرين... وطبعاً هالشي خاطئ وما عندي اعتراض على هالقول!

ـ لماذا نبكي من أغنية صد وهجر ولوعة ولا نبكي من خشية الله؟
لأن الله جمال وفرح مو بكاء وحزن وندب!!!

ـ لماذا نغضب إذا انتُهكت حرماتنا ولو بكلمة..؟؟ ولا نغضب من انتهاكنا لحرمات الله...؟؟
لأن الله مو بحاجة لأحد يدافع عنّو وخاصّة إنسان ضعيف فقير متلي... الله محتاج لبشر تحبّو وتنشر اسمو بسلام بين البشر مو بالسيف والحرق والقتل والرجم وقطع الروس والإيدين... يكفي تشويه لصورة الله يكفي دخيل الله أنا.

فكر بالأمر، هل ستفكر فيما قرأت ملياً؟؟
فكرت وجاوبت والأدرينالين وصل لعند الله سبحانو وتعالى... شي بيكفّر بالعبري وبالسرياني كرمال ما يفهم الله لأن لغتو بس عربي!!!

هل ستحاول أن تغيّر حالك؟؟
إي عم حاول بس مو باتباع أساليب الشؤم السابقة...

أم ستكون إمعة وتقف كببغاء تُردد وتتبع غيرك ولا تعرف أن تقود أحداً حتى نفسك . وهل سترسل هذه الرسالة لأصدقائك؟؟؟
والله ماني عرفان بعد كل هالحكي مين هو الببغاء والـ ... (إمعة)... وحرام أصدقائي إذا بعتلن هيك رسالة رح يكرهوني كره العمى... رح خلين بسلام وغض الطرف عن القضيّة!

أم أنك ستتجاهلها وتعاملها كأي رسالة دينية أخرى؟؟؟
بالطبع ما في شكّ... لأن متل ما سبق وقلت محبّة الله بالحق والروح ونشر السلام بين البشر مو بالعلش والمعلشة كما سبق وقرأنا هون!

خلّصت... بس قبل ما روح رح أدعي على (مو لـ) كل واحد يبعت هيك رسائل لأن عم تستهزئوا بالعقل أجمل صنائع الله!
.