[Nirvana]

ما بعرف شو قصة العالم اللي ضد الحشيش!
اللي عم يحضر تلفزيون مؤخراً عم تطلع دعاية من مؤسسات الوليد بن طلال للعمل الانساني ما بعرف العمل الخيري .. بعنوان لا تلف ... الدنيا فيك.. وهي عبارة ع تحريض متعمد ومع سبق الاصرار والترصد لمنع التحشيش!
أول شي تفاجأت أنو الوليد بن طلال عامل فيها شيخ وما ركبت بمخي! يعني أنا ما بعرفو لهالشخص .. الشي الوحيد اللي بعرفو انو واحد معو مصاري وأنو صاحب الروتانات... وأنو صاحب الروتانات وما بيشرب "كمان تفاجأت انو في إعلان يحرض على عدم الشرب.. طبعاً مو شرب المي!" ولا بحشش .. ولا بيتعاطى! جد.. تفاجأت! لسببين أولاً، هل يا ترى هالبني آدم ملتزم جداً انو لا يقرب من متع الدنيا والتي لا يمكن إنكار إنو هذه المواد التي "تذهب العقل" منها.. يعني عمرو ما شرب كاس ولا دخنلو سيجارة ملغومة ولا شمّلو شي خط أو أخد حبةً ما.. خصوصاً واحد في متل وضعو وإمكانياتو...
ثانياً، صاحب الروتانات.. بظن لو إنو شخص ملتزم دينياً أو أخلاقياً حسب ما تفسر مجتمعاتنا "الأخلاق".. ما بكون صاحب الروتانات أساساً... بالإضافة للجو اللي بيفرضو ذلك الوسط بشكل عام وليس على وجه التخصيص!

وبعيداً عن ما ذكر أعلاه، وكونو سعدو وحدو اللي بيعلم ما في النفوس! ولأنو نحنا عايشين في عالم غرقان بالحرية لشوشتو عقولة المصريين.. ونظراً لفوائد التحشيش التي لا تنضب.. والتي سنذكر بعضها ليس على سبيل الحصر بل التكرار .. لانو التكرار .. بعلم الـ... شطار!
1. يُذهب العقل .. بظن أنو في هيك عالم أحسن شي أنو عقلنا يذهب بلا رجعة .. مع انو ولا مرّة ذهب عقلي .. يمكن العالم بتحشش غير نوع!!!!
2. يريح من كافة الأوجاع .. السايكولوجية والفسيولوجية!
3. يقوم بمفعول الكحول من دون أعراض الكحول الجانبية... "يا لطيف!".
4. ترى العالم بمنظار آخر .. أوسع أجمل وأكثر إبداعاً.

وبما أنو فوائد التحشيش لا تعد ولا تحصى ... رح نحاول نكمل الفوائد فيما بعد!

وحيث أنّ هذا الموضوع محشش .. وقررت -حضرتي - حط راسي براس المسيو وليد وأعمل حملة مضادة للحملة المضادة للتحشيش!
بصراحة ما بقدر أعمل غير هالشي! يعني كيف يكون أبو حشيشة أطال سعدو في عمرو راعي ومؤسس جريدة يوريكا الخاصة جداً وكون ضد التحشيش! حاشا ذلك ثمّ حاشا...

ولذا... ومن هذا المنبر السقيفي وليس الحر ... أعلن شعار جديد ... مضاد لـ"لا تلف ... الدنيا فيك"... وهو "خلي الدنيا تلف فيك"...
وفي مقولة أخرى "لف الدنيا قبل ما تلفّك".. وأخرى "لف خلي الدنيا تلف معك"... ولفّا بقى أحسنلك .. يا "شيخ"!