قصة ما قبل النوم .. الملك و بناته الثلاثة
كان يا ما كان في قديم الزمان. ملك عنده ثلاث بنات حب في يوم من الأيام انه يختبر حبهم اله.
جاب الكبيرة (وجه البكسة). وقالها: بابا يا حبيبتي قديش بتحبي أبوكي الملك؟
البنت من غير تفكير : بحبك قد ما السمك بحب البحر
الملك فكر وقال في باله : اي السمك ما بقدر يعيش بدون بحر هاي البنت بتحبني كتير.
وقالها: أنا كنت عارف انك بتحبيني بس مش لهدرجة.
وقام اعطاها قصر كبير ومجوهرات.
بعدين جاب البنت التانية ( الوسطانيه ) وسألها نفس السؤال؟
فقالتله : بحبك قد ما الطير بحب السما.
انبسط الزلمة وكيف, وأعطاها قصر جنب أختها ومجوهرات وميمعة.
وبعدين جاب البنت الصغيرة ( اخر العنقود اللي بموت فيها ) وسألها نفس السؤال؟
قامت جاوبته : بحبك قد ما الدقة بتحب الشطة
الزلمة زعل وعصب وقام لفحها كف خلا أيديها فوق و رجيلها تحت ومسكها من شعرها وزتها برة القصر.
وما رضي يسمع منها ولا نص كلمة.
البنت دارت بالحواري والشوارع, وتسمع كلمة من هاد وكلمتين من هداك.
لغاية ما ربنا حن عليها و أجاها مزارع مسكين على باب الله حبها وحبته وتجوزو وراحوا سكنو بالكوخ تبعه اللي بنص الغابة.
ودارت الأيام ومرت الأيام ما بين بعاد وخصام
وفي يوم من الأيام كان الملك قاعد بتصيد بالغابة ونسي حاله وسرح وضاع بالغابة. دور على المرافقين. ولا هم هون .
طيب الحرس وين؟ فص ملح و داب
ختفو الشباب, بح, لا حياة لمن تنادي.
ضل الملك يمشي ويمشي, سري مري, رايح جاي,
لغاية ما لقي كوخ صغير قال يلا بفوت برتاح وباكلي لقمة.
دق على الباب وفتحلوا صاحب البيت وهو مش عارفه.
دخلوا جوا وهو شايفه تعبان... وصار يحكي مع الزلمة.
مرته مش غريب عليها الصوت. عرفتو بسرعه لانها بنتو للملك
قام الزلمة بيقول للمرة اذبحيلنا جاجتين خلينا نتعشى ونعشي الضيف.
بدت المره تشتغل بالجاجات وخطر على بالها فكرة.
نادت جوزها وقالتله خود شوية الدقة هاي مع صحن زيت سلكو فيهم لغاية ما يخلص الاكل شكله الزلمة ميت من الجوع.
والله الزلمة عجبته الفكرة وقام حط الزيت والدقة قدام الملك وقاله: اتفضل يا عمي على بين ما يجهز الاكل .
الملك ميت جوع وهو بحب الدقة كتير. ما بلع اول لقمة ولا صار بده يستفرغ
وصاح بالزلمة : ولكو شو هاظ دقة من غير شطة ؟
كيف بتاكلوها هاي؟
وفجأة اتذكر بنته الصغيرة وصار الملك يعيّط زي الهبايل.
قاله الزلمة: ول، شو مالك يا زلمة انت العاقل . كل هاظ مشان شوية دقة هسة الجاج بخلص, روق.
راح الملك حكى للزلمة القصة, من طق طق للسلام عليكم
وهو خلص من هون نطت البنت من هون
وقالت : بخخخخخخخخخ ،،، كيفك بابا؟ هلا عرفت قديش بحبك يا اهبل ؟
وهيك عرف الملك قديش بتحبه بنته.
وجابتله دقة بشطة . طبعا ما أكل منها ولا لقمة لأنه نزل بالجاج جرد
و أعطاها قصرين و مجوهرات و سوبر ماركت و كروز دخان علشان هي بتأرجل، وشغل جوزها زبال بالبلدية, وتوتا توتا خلصة الحتوته