بدي أول شي أشكر أبو نهلة ع هالدرس.. و ما عم اعطي اطراء... بالعكس من وجهة نظري المتواضعة بعتقد لخّص بردّين... المشكلة كلها, بشكل بديع
ع راسي أب نهلة
منجي عالتعقيبات
اقتباس:
|
أول شي بدي وجه تحياتي لوفوكوياما ..و أهديه أغنية وائل كفوري ( كذابة عرفتك كذابة )
|
أنا بدي العن أبوه ع أبو اللي جابو و عملو نبي هذا الزمان.. بس مالقيت أغنية تحوي هالكلام
اقتباس:
تاني شي بدي أشكر ياس لأنو عم يحكي ع موضوع لازم ينحكي فيه يعني ..أقل منها أنو نحكي بموضوع انهيار النظام الرأسمالي بأمركيا !!! و بشكل عام يعني
هلأ بدون شك و بوضوح و بدون تحليلات يعني ..الشباب فرطوا ..اي و الله ..و أكلين هوا بالمعلقة ..و اللايف ستايل الغربية كلياتها واقفة على شفير الهاوية ..أو شفير الوزان .ما بعرف بدقة يعني , و واقعين بحيرة محتارين كتير يعني ..و فايتين بالحيط , ما عرفانين شو يعملوا , أنو ياخدو مصاري من الشعب المسكين يعطوها لاصحاب البنوك الدلافين و يمشوا الحال , ولا يتركوا اصحاب البنوك الدلافين يغرقوا و يغرقوا معن الشعب المسكين !!!!
انو حلين لا ثالث لهما يعني ..و التنين عوفاً للتعبير ..أخرا من بعض !!!
|
هلأ شو بدي قول..
أنا ما بعتقد الرأسمالية انهارت.. و لا رح قول انو بلشت تنهار.. لأنو بعتقد انو بلشت تنهار من لحظة اخترعوها.. و مو حكي يساري يعني.. لكن صرلي من وعيت عالدنيي بسمع ناس بتفهم بتقلك انو الرأسمالية هو تخمة بعض الناس اليوم.. مقابل انو نجوع كلنا بكرا, و فعلا هيك يعني, و شرح أبو نهلة بالقسم التحتاني بشكل بارع جدا, شو صار و شو عم يصير.. و كل مين عايش بدولة غربية, على اختلاف و تفاوت درجة وحشية الرأسمالية فيها.. بيشوف هالحكي
بعتقد رح يطلعو من هالأزمة.. بحل ترقيعي.. و رح تتكرر و تتكرر و تتكرر... لحد ما يوصل الأمر الى انو مافي حتى حل ترقيعي.. ساعتا البشرية تعبّي ببعضا.. ان كان بحرب عسكرية أو بصراع من نوع آخر...
و نقطة من أول... الخراب
اقتباس:
هلأ هاي بخصوص الأزمة ...بس شو صار لحتى صارت هالأزمة ؟؟ ولا شي والله , سلامتكن يعني الجماعة كانو عاملين سوق حر ...حرية ع كيف كيفكن ..اسواق و اسهم و سندات و بيع و اشتري و دين هاد و اتدين من هداك و اشتري و قسط و بفوائد رمزية ..شغلة 8% شهرياً يعني !!! و صناعة و تجارة و تكنولوجيا و بورصات و سياحة و نقل جوي و نقل بحري و نفط و دهب و غاز و الله و ملايكة !! يعني كلو عادي , مافي شي غريب ...الغريب هو انو كيف كانو هيك عاملين , و لشو ليعملوا هيك من اساسو . انو لعنوا ابو ابسط قوانين السوق !!, العرض و الطلب مثلاً ..مين فيكن ما سمعان بالعرض و الطلب ؟ ...هاي اسهل شي مثلاً ..انو فري عرض كتير و طلب قليل انخفضت الاسعار , العرض قليل الطلب كتير ارتفع الاسعار ..كتير سهلة ..و كتير صحيحة كانت ...رأسمالياً يعني ...اي هاي لغوها ..ما عاد وفت معن ...أنو شو يعني اذافي عرض كتير بترخص الاسعار !! ..لاء بدها تضل تطلع الأسعار ....حتى لو اضطروا انو يزيدو القوة الشرائية للمستهلك بدون أساس ...بدك تشتري بالدين و بالتقسيط و بدك تشتري حتى بدون تقسيط لانو بيلتعن ربك اذا ما اشتريت ...انو معقولة فينك تعيش بدون ايبود !!!! أو بدون لابتوب مثلاً ...مثلاً و ما كتير تدققوا
انو النفط يا عمي ....اذا في عرض قد ما بدك ..و اذا بتنتج النفط الاحتياطي كلو بيوم واحد ..بدو يغلا ..و ليش غير ربك ما بيعرف !!
أنو مثلاً المتر المربع للأرض حقوا هديك الحسبة ..ما هاي ..التانية الكبيرة ..شفتها ؟ ..اي هديك الحسبة حقو !!! يا أخي ليك قديش في أراضي !!..لك أصلاً ما حدا بدو يشتري !!...والله هيك حقو..و بدك تشتري !!!!
اذا بدك تفوت لعند دكتور و ما معك تأمين بتكون عم تكفر ..مشان يشتغل التأمين الله وكيلك ..و اذا فتت معك تأمين بدك تطلع عم تكفر ..مشان يربحوا جماعة التأمين ..كمان الله وكيلك !
منخترع مبيدات مشان نبيعها و نربح فيها , و بعدين منروج للمنتجات العضوية و منربح فيها !!
|
هاد تلخيص الأزمة...
بيحكو بحرية السوق, لكن حتى قواعد السوق (انو أخي اللي بتعلموهون بالجامعات.. انو عرض و طلب و هدولي.. شو مشان؟؟ )
و نقطة هامة كتير حكاها أبو نهلة انو بيحاولو يرفعولك قوتك الشرائية (حتى لو ما رفعوها عمليا.. بس يضحكو عليك و يوهموك هالشي مشان تشتري.. و تشتري شي محدد بدهون ياه يمشي) و هاد اللي صار بأميركا و عمل هالأزمة..
رح احكي عن تجربة شخصية.. شو بيعملو البنوك...
أنا طالب مأنشح عايف ربي (انو مستورة و الحمد لله و ألله يخليلنا الأهل لبين ما نخلّص جامعة, لكن قصدي انو موارد... ما عندي, شخصيا) ..
رحت مرة عالبنك, من شي سنتين, انو عندي حساب بحط فيه مدخراتي و مشان حوالات و شراء عالنت و هيك أمور.. .. فأنا دخلت مشان اسحب مصاري
المهم عم وقّع أمر السحب و للا أجى واحد من اداريي الفرع.. و صار يتطلع فيني.. و ضربت عينو عالكمبيوتر اللي كانت تشتغل فيه الصبية و شاف بحسابي حركة كتيرة (لأنو كان وقت عم جمّع مصاري سفرة كوبا و كنت بحط كل سنت بدبرو بهالحساب) و رأسا ضرب الجرس براسو.. ما بشوف الا دعاني ع مكتبو و قال بدو يحكيلي مدري شو... و بدو يستفسر عن درجة الرضى عن خدماتون و هيك قصص
المهم رحت معو .. و هدول حرابيق يقدر بسؤالين مدروسات يعرف عنك كل شي يلزمو.. فعن طريق سؤالي عرف انو مسافر بعد فترة سياحة.. و بلش يقدملي عروض قرض تسهيلي مشان كاميرات معينة بشرط شرائها بالمحل الفلاني, و كلهون طبعا كاميرات من الألف يورو فما فوق (شغل بروفيشنال).. و عندون قدرة اقناع رهيبة.. لك حتى أنا, اللي كل ما واحد يقلي مرحبا بشك فيه... أوشكت اوقع..
انو السؤال.. واحد ما عندو موارد متل حكايتي.. ليش لتورطو بقرض لا انت و لا هو بيعرف ازا بيقدر يدفعو.. يعني على مدى سنة أو سنتين... المهم تضحك عليي أتورط و آخد منك قرض بألف يورو مشان حس حالي غني و اروح اشتري كاميرا أغلى من كل السفرة اللي رح سافرها؟ طبعا هو ما خسران شي.. ازا عجزت عن الدفع بيطالعو المصاري من عيوني... بس رايحة عليي...
على مدى أوسع.. نفس القصة صارت بأميركا... شغلة القروض العقارية "السوبرايم" .. انو واحد مأنشح انضرب ع قلبو و راح عالبنك يسأل شو ممكن تعطوه قروض ليشتري بيت ينضب فيه هو و عيلتو.. بيروحو بدل ما يعطوه شي يتناسب مع دخلو, أو حتى انو ما يعطوه لأنو دخلو و راتبو ما خرج قرض.. بيروحو يعطوه حق قصر يلدز.. و خود يا حبيبي مو بيناتنا هلأ.. روح اشتري بيت و انبسط ... بعدين بنمص دمك...
طبعا الشخص وقت يعطوه حق بيت ما حلم فيه بحياتو... بيصير يبوس رب الرأسمالية ع رب اللي اخترعا...
لكن وقت يجي وقت السداد.. و مافي مصاري ليسدد... بيصير يلعن رب الرأسمالية ع رب اللي اخترعا
الناس ما عندون مصاري يدفعو للبنوك.. البنوك تصادر البيوت و تحجز عليها.. بس كمية البيوت المحجوزة كبيرة بشكل انو ما حدا بيشتريها بالمزادات .. و البنك يخسر
سيولة لأنو ما بيوفوه... بس البنك مانو زعلان.. ليش؟ لأنو الا ما تجي الدولة هلأ تدفع قروض هالمساكين اللي انضحك عليهون..
الناتج:
- الدولة (عن طريق الضرائب).. دفّعت الشعب ضريبة جشع البنوك (2500 دولار مقابل كل مواطن أميركي من كل الأعمار)
- اللي اشترى البيت هلأ بالشارع لأنو البيت صادرو البنك
- البنك قبض حق البيت من الدولة, و فوقها هالبيت ملكو لأنو كان مصادرو من المسكين اللي اشتراه
رح يرجعو يعملو هالقصص.. بحجة السوق الحر.. ينصبو عالكون, بدون حسيب و رقيب, و دون مراعاة أدنى شروط المنطق و الأخلاق.. و تعي يا حكومة انقذينا من أزماتنا, بمصاري شعبك...
يتبع ...