اقتباس:
كاتب النص الأصلي : kosayka2
هلق الفكرة انو العلماء ما عندهون جواب شافي
|
موضوع جميل بس و الله لاحكيلك شو بيصير بهيك حالات...
الصحافة الصفراء مفهوم لنوع من الصحافة تبحث دائما عن الاثارة و الفضيحة و البلبلة... و في "صحافة صفراء" علمية بدون شك... و هاد نوع من الأنواع... و بتلاحظ كيف يصير تحوير للحكي انو بيقللولك (ما عم قول انو قاصد حضرتك هالشي طبعا لكن احكي حالة عامة بتشوفها بكتير حالات) انو و الله العلماء ما لقو تفسير... 99% من الحالات بتكون لأنو العلماء مالقو سبب يتحمّل أدنى درجات الموضوعية لحتى يقعدو يدورو تفسير لهالسبب.. و حالة متل هالحالات بتلاحظ الها هبات و مواسم... عن جد...
مثلا هالحالة بالذات قريت من فترة انو بعد عرض فيلم the exorcist سنة 1973 صار في كومة كبيرة من الحالات هاي (الفيلم لمن لم يحضره يحكي قصة بنت يفترض انو ركبها الشيطان و يجي راهب بدو يطالع الشيطان منها, فيفترض, حسب الأساطير أو الحكايات القديمة, انو الشخص اللي يركبو الشيطان يصير يتكلم بلغات منقرضة)... و بعدها لما طلعت فترة أفلام الخيال العلمي بمنتصف السبعينات فجأة صارت الناس كلها تشوف صحون طائرة (يا للصدفة
).
من فترة كمان قريت دراسة من جامعة هولندية عن السيكولوجيا "القيادية" لدى الناس و كيف في ناس تحاول تعمل حالها لسبب ما "مختارة" مشان يكون عندها هيبة و مكانة... و كمثال جابو حالات الـ "estigma" اللي هي حالات تظهر بشكل عرضي أو مفاجئ "نظريا" جروح بالمناطق من الجسم اللي يفترض انو اندقت فيها المسامير لما انصلب المسيح... فجابو أمثلة عديدة عن كيف ممكن الناس تسبب هالجروح بطرق تقول سحر (خلطات كيميائية... الخ) و كمان جابو مثال انو خلال فترة بداية الثمانينات صارت دراسات حول انو المسيح عليه السلام لما انصلب اندق المسمار براحة يدو أو بمكان تاني.. و عملو تجارب الثقل و التوازن و طلع معهون انو من غير المنطقي انو يكون اندق المسمار براحة يدو انما لازم يكون اندق بالرسغ, قبل مفصل اليد.. و انتشرت الدراسة بعدة دوريات .... شو رأيك انو قبل هالدراسة كانت 100% من حالات الستيغما المزعومة تطلع الجروح براحة اليد, و بعد نشر الدراسة بسنة عملو جرد مرة تانية و طلعو أكثر من 70% من الحالات عم تطلع هلأ الستيغما بمنطقة الرسغ... (طبعا كان من السهل عليهم الجرد كون أغلب الناس اللي يفترض صارت معهم حالات الستيغما يحاولو انو الفاتيكان يعترف بحالتهون مشان يكسبو تقديس اضافي, و على حد علمي الفاتيكان ما اعترف بأي حالة ستيغما بالقرن العشرين)
قصدي من الحكي انو في جانب كبير .. كبير جدا من النصب و الاحتيال.. و بالحالة اللي حضرتك عرضتها مشكورا يستحيل الواحد يأكل مية بالمية انو الشخص ما عم يمثّل.. مستحيل جدا
و مشكور عالموضوع مرة تانية
تحية و عذرا للاطالة