اقتباس:
|
طيب في شي اسمو مصالحة وطنية ..يعني الأطراف كلها بعد الحرب قعدو مع بعض و اتفقو على انو يتركو افرازات النزاع الداخلي عاجنب ..و لاحظ من خريطة التحالفات بالوقت الراهن انو بالفعل الحرب اللبنانية انتست ..سؤالي ليش نحنا مصرين نذكر هديك الحقبة دايما و دايما منجعلها سبب للتشكيك بأي انجاز لبناني ...و من موضوع الأنجاز حبب احكي بنقطة تانية هي الألهام ...او الملهم ,,! ..انا كسوري ,,و عم قول انا بس يعني ما حدا غيري مطالب انو ياخد الفكرة هي ...انا ما بشوف ابدا اي عيب بأعتبار تجربة المجتمع اللبناني بال 2005 كمصدر ألهام ,,و لو مشيت معك انو قادة التحرك هاد كانو دمويين و ديكتاتوريين اكتر من الديكتاتور نفسو ...بس ما بيمنع انو كانت الحركة السلمية بال 2005 يلي عطت للبناني "استقلالو" من دون ضربة كف مصدر الهام ! ,,,,يمكن الشي الأول يلي بيتبادر بذهن البعض هو التشكيك بوطنية شخص بيعتبر حركة لبنانية كمصدر الهام ( من باب انو ما في ملهمين بسوريا يلي هني الأولى اعتبارون ملهمين للمجتمع السوري ) ..في كتير ابطال بسوريا ناضلت و دفعت عمرها مشان حرية مجتمعنا ...بس لما بتكون حالات فردية معزولة ما فيني اعتبرها كألهام ,,,,الألهام بشوفو وقت الشعب بيوقف وقفة وحدة ...
|
منحكي تاريخ؟ طيب متل ما بتحب
ليش انتهت الحرب اللبنانية؟ لأنو أفلاطونات الميليشيات صحيو ع حالون انو صرلون خمسطعش سنة عم يمزقو بلدهون لحساب فلان و علتان من الدول؟ طبعاً لأ... الحرب اللبنانية انتهت لأنو كان لازم تنتهي, دولياً كان لازم تخمد لحتى تنفتح جبهة تانية بالعراق بعد ما اجتاح الكويت.... و على هالأساس صار في اجماع عربي و دولي انو يا سوريا فوتي احسمي و انهيلنا هالقصة, و كل الأفلاطونات عرفو يقرأو هالشي و عرفو انو مستقبل لبنان على المدى المنظور بإيد سوريا, فقعدو مع بعض و قعدو مع سوريا... كل الأفلاطونات ما عدا عون اللي كان طموحو الرئاسي عامي ع قلبو و ما عرف يقرا الواقع و راح ناطح سوريا و قعد يقول انو بدو يفوت بالجيش اللبناني عالشام
زبطو مصالحهون الجماعة, و صارو حبايب مع مندوبي سوريا بلبنان من طراز كنعان و عبد الحليم "يورانيو" خدّام, و فاتو بمشاريع كتير متناسبة مع رواتبهون (متل صفقة فرانس تيليكوم بين جمال خدام و الحريري), و جعجع بعد 3 سنين كمان عمى ع قلبو و نسي حالو وين عايش و حاول يطلع من الطائف.. فتحولو ملف و بطريقهون فتحولو باب السجن...
كبرو الولاد و صار بدهون يستقلو.... و منهون عبد الحليم خدام... و صارت قصة اغتيال الحريري (اللي سياسياً لا يمكن عدم التفكير بشكل بديهي انو نفذّها حدا بدو سوريا تطلع) و لقوها فرصة.. و طلّعو سوريا من لبنان ( هلأ لا تفهم من هالحكي انو أنا كنت مع الوجود السوري بلبنان, أكيد لأ, بس ببساطة اعتبر هالموميائات هي جزء من هالوجود كانت)... و صار الحكي و الزعبرة...
كانت حركة مدنية؟ أي و الله كانت... بس شي مالو علاقة بشي تاني... الناس هجّت لأنو كانت تشعر بالغبن و الظلم, مش انتصاراً لفلان من الناس.. و بعدها رجع كل واحد تمترس ورا علمو (بقصد علم الحزب و \أو علم الطائفة)
نجي ع مصطلح "مصالحة وطنية" ....
لو هالأفلاطونات كتير قلبون طيّوب... بيعملو مصالحة وطنية... بس هل يا ترى هلأ في مصالحة وطنية حقيقية؟ أنا شايف ذات الروس اللي تغيّرت تحالفاتا مليون مرة خلال الحرب اللبنانية متحالفة هلأ بخندقين... و ما في شي يؤكد انو التحالفات ما راح تتغيّر خلال الشهور القادمة...
حدا كان متوقع ميشيل عون يصير حليف حزب الله من 4 سنين وقت رجع؟ حدا كان متوقع يصير يهاجم الامبريالية و الغرب بعد ما كان يبعت خطابات للكونغرس وقت اجتاحو العراق انو بطريقكون اعملولكون فتلة ع سوريا؟
لو بدي العب عالمضمون أنا ما براهن ع انو هالتحالفات رح تظل قائمة بعد سنة سنتين... الزمن قلاّب جداً و بسرعة
ما شفت عاليوتيوب جنبلاط و هو عم يحكي كيف جعجع كان عم يعمللو كمين ليعلق مع الشيعة و هو ملص من هالعلقة؟ ما سمعتو عم يقول عن المسيحيين انو "الجنس العاطل بيظل عاطل"؟
هاد اسمو يا ترى مصالحة وطنية؟
رأيي البسيط و الشخصي يقول انو لو هدول السياسيين قلبون ع بلدون, بيجتمعو جميعاً و يقولو يا جماعة نحنا النا تاريخ مش كتير ناصع, ذاتاً بنوب مش ناصع ( و أغلبهون معترفين بانو عملو العمايل)... تعو هلأ نعمل اتفاق وطني, و كلنا مع بعض نطلع تقاعد و يجي جيل جديد ايدو ما ملطخة بالدم... جيل سياسي بحق مو ميليشياوي انحط عند الصوّاج شهرين و طلع سياسي... جيل من طراز وزير الداخلية الحالي... يشيل هالبلد لقدّام... و نحنا "أخلاقياً" بنحكم على حالنا بالخروج قبل ما يحاكمنا التاريخ.... ساعتها فعلاً فينا نقول إلى حد ما "عفا الله عما سلف" و نقول فعلاً انو في رجال دولة... مش مرتزقة
اقتباس:
|
عزيزي ياس ..بتمنى تاخد كلامي بسعة صدر ,,ما القصد من كلامي زد قنابل بالمنتدى هاد ...بس انا سوري متلي متلك ...طيب اذا انت ما بتعتبر اللبنانين كفؤ لدرجة اعتبارون ملهمين ,,,طيب ..فكر ليش في سوري تاني عم يعتبرون هيك !! ...بكل بساطة قادر تقول انو السوري متل هاد عم يقبض حقها للقصة !! ..بس انا كلمتك بالصراحة هي لأنو بعرفك تماما انو انت ابعد ما يكون عن هيك عقلية ...
|
أخي أنا ما بحاكم حدا, و لا بحكم على حدا... أنا بقول رأيي, و يجوز يحكي حدا شغلة بقلو هالشغلة بمنظوري غلط أو صح أو شو ما كان... بس ما بحكم على حدا و ما بقيّم عقليتو... ما بيحقلي
كموقف شخصي أنا ما بشوف بلبنان "سياسياً" الهام... بشوفها الهام مدنياً (كحرية مدنية و فكرية) اذا حبيت.. ثقافياً, موسيقيا... هندسياً حتى اذا حبيت, لكن سياسياً ما بشوفها بنوب الهام لألنا.. لسببين:
الأول: حكيت سلفاً انو ع مستوى القيم اللي أؤمن بها من حرّية سياسية و ديمقراطية ما بشوف سياسيي لبنان ممكن يكونو قدوة لحدا, و مافي داعي لنرجع نعيد الكلام
الثاني: حتى لو تركنا القيم الفكرية أو الفلسفية و نزلنا ع سياسية "أرض الواقع" (سياسة الدهاليز كما أحب تسميتها).. لبنان مانا قدوة لألنا بهالشي.. لبنان قائم أساساً على الطائفية و التوزيع الطائفي, و سياستهون ماشية بهالاتجاه... تبع بدنا تمثيل طائفتنا هون و هون, بدنا وزير هون و وزير هنيك...
بتوزيع المناصب تأتي الطائفة ثم الحزب ثم الكفاءة.... و هاد شي لا يمكن انو شخصياً استسيغو...
تلت رباع خطابهون السياسي قائم ع تخويف الطوائف بين بعض, ع اللعب عالهاجس الوجودي تبع الناس, و أنا هاد شي مش بس ما بستسيغو انما بشوف من منظوري انو شي واجب المحاربة...
مابدي عون سوري, و لا بدي جعجع سوري, و لا بدي بري سوري... أنا بدي السياسي السوري يكون سوري و كفى, من دون إضافات....
أي و هكذا...