[The morning]

صـرلي فتره عم شوف الموضوع و مش عارفه من وين بلـّش شارك فيه ..
أنا رأي فـيه تحـيز للمدارس الخـاصه كوني ربيت بمدارس خاصه على طول الطريق و كان عندي تجربه وحيـده مع المدارس الحكوميه لفـتره الـكم شـهر فـقط و اللي لمست فيهم فرق كبير بستغرب اني ما زلت بزكره ..
بدي احكي بعيدا عن المنهاج لانو وضع المنهاج ما عم يكون بايد الاداره المدرسيه للمدارس الخاصه و بذلك هالـشي ما بحس فيّ اطرق اله ..

اذا بدنا نجي بدايه للعنايه اللي بتقدمها المدارس الخاصه دون عن الحكوميه فهي واضـحه يعني أذكـر تماما خلال الفتره القصيره جدا اللي قعدت فيها بمدرسه حكوميه نهائيا ما حـسيت بـوجود اهتمام من أي شـخص لاي شـي .. حتى في حال ما عملت الوظيفه او ما عرفت تسمع او علاماتك ما كانت جيده فهي شغلات ثانويه بالنسبه للاساتذه طالما عم يوصلهم راتبهم بأخر الشـهر ... و هون ما عم قول مافي عنايه نهائيا انما مقارنه بالعنايه المقدمه بالمدارس الخاصه فهي بتحسس الطالب تماما باللي ذكرته سابقا من لا مبالاه الاساتذه و هون انا عم احكي عن تجربتي بـصف الاوّل كنـت فما بعرف اذا بـيكبر الاهتمام مع العمر او شو الوضع تمام .. لكن المدارس الحكوميه أقل اهتماما و لازم الطالب يعـتمد على جـهده بـكتير كتـير احيان ليـقدر يوصـل لكتير معلومات المفروض تكون متوافره اله عبر الاساتذه .. اضافه لانو هلـئ لسا دارجه موضه الدروس الخاصه اللي يمكن حتى اساتذه بعض المدارس الخاصه بيلجأو لذات الاسلوب بالتقصير بالشـرح في الصف للوصول للدروس الخصوصيه ..

نقطه تانيه ايضا هي العنف المدرسي .. ايام ما كنت انا بالمدرسه طلع القانون اللي بيمنع ضرب الطلاب و لكن ضل فتره كبيره ما يـستخدم بالمدارس الحكوميه تحديدا و لليوم أعتقد في أساتذه بقوموا باستخدام العنف ضد طلاب المدارس و الاهل بتخاف تشتكي و بتخاف تحكي .. و يمكن القصص تحتاج لعائله جريئه واحده لتكشف الموضوع .. أمـّا المدارس الخاصه فالضرب فيها هو تخويف و حسـب .. يعني للتخويف و فـقط عنـف نفـسي اذا صح التعبير و ما عم انفـي بهالحاله خطوره هالموضوع و لكنه ليس كالعنف النفسي و الجسدي معا ..

اضافه لهيك النقطه الاهم اللي حابه اتطرق الها حيال المدارس الخاصه هوّ اختلاط الجنـسين .. يعني يا عمـّي هي الشغله لحالها بـتجعل المدارس الخاصه متفوقه بنـظري بـشكل كبير عن المدارس الحكوميه .. بحيث اني أعتقد صـار فينا نـقول انو اذا كان في داعي لـهالنـظام بالامس فاليوم أكـيد ما عاد اله لازم في ظل الانفتاح اللي عم يـصير عند الصبايا و الشـباب في سـن مبكره .. فبرأي ما عاد في داعي نعمل هالفـصل و الجـدار اللي بيخـلق حاجز بالتعامل و بنظره الشـب و البنت لبعضهم .. يعني اللي بـصير انو الشباب و الصبايا بتصير نظرتهم لبعضهم ليست كأشخاص متفردين بقدر ما هي جنـسيه و تنطلق من الحرمان اللي بيمرو فيه من التعامل مع بعضهم بالعمر اللي بيحتاجو فيه ليكونو اصدقاء و شركاء و حتى احباء و هالـشي اللي بخلي الهدف الأوّل اللي ببالهم هو كـيفيه التحدث مع صـبيه و بشـوفو كل صبيه هيّ ماده للتطبيق و الصبيه كل ما بتشوف شب بيحكيها كلمتين بتدوب حب و احلام ورديه و المشكله انو هالقصه هي قد ترافق الشب و الصبيه الى الجامعه ثم الى مكان العمل و يمكن حتى تضلها معهم للقبر

الفـساد موجود موجود مدارس حكوميه او خاصه و لكن اعتقد الفرق يأتي من أنو المدارس الخاصه بتعرف انو منيتها على حالها و الاهل و الطلاب و اسم المدرسه هو الممول الرئيسي الها لذلك بتـسعى جاهده من الاداره الى كل المسـؤولين المهتمين بهالامر لمراقبه الموضوع عن كـثب و التأكد من اللي عم يصـير بينما هالـشي غايب في المدارس الحكوميه و بذلك غاب القط العب يا فار .. المراقبه هي اللي بتتحكم بمقدار اللي بيطلع من الفـساد الداخلي ..
أطفالي أنا بالمـستقبل أكـيد أكـيد مدارس خـاصه في حال كـنت بسـوريا و أشـجع بشـدّه الانـتشار للمدارس الخـاصه بالبلد ..

كاتب النص الأصلي : sweetbaby

فهالشي كتير مزعج...يعني المدارس الخاصة ماعم توفر شي زيادة كتيير لحتى الطالب يدفع الاقساط اللي ممكن خيالية..وعنجد بدون سبب...انو بس لينقال انو ابن او بنت المدرسة الفلانية...ماشفت حدا من طلاب المدارس الخاصة بصراحة كتير تميز باي شي...
غير بشوفة الحال وانو هني احسن من الكل...

لا يا عزيزتي أختلف معك بالرأي وبشـدّه .. المدارس الخاصه توفر أشـياء ابعد من المنهاج اللي هي مش قادره اساسا تسـيطر عليه و أعتقـد في عدد من المدارس هلئ بلّـش يضيف منهاجه الخاص الى المناهج الحكوميه و بذلك عم تطلع براس الطالب اي نـعم و لـكن في نـاس لازم تضحكي كرمال بالنتيجه نـوصل لحق تمكن المدارس الخاصه من امتلاك منهاج خاص بها .. و لـكن النقطين اللي لفتوني بردك هـنن المعلمين بالاحمر - الاولى - و بالاورنج - التانيه - ..
يعني بالنسبه لحمل اسـم المدرسه فـهي أعتقد بتـرجع للنـقص اللي بشـخصيه الطالب لحتى يعتمد على مـدرسه لـتكونله كيانه .. أنـا شـخصيا من خـبرتي ما بيوم فكـرت او انتبهت لاحد من أصـدقائي المـقربين أنـو يـسعى وراء هالـهدف فقط لينقال انو ابن او بنت المدرسه لفلانيه بل على العكس كانت هي جزء من المـسؤوليه حيال انـو هنن يـرفعو اسـم مدرستهم و ليـس العكس !!
النقطه التانيه و هي انك ما شفتي حدا من طلاب المدارس الخاصه تميز باي شي .. صراحه صدمتيني ! في كل سنه عدد لا بأس به من أوائل سـوريا هنن مـن المدارس الخاصه و بمجاميع خيـاليه أيـضا .. هون بيناتنا بالمجتمع بالمحيط اللي هنن فيه .. شـلون مش متميزين بأي شي غير شوفه الحال ؟!