هلئ شغلة أنو التجربة الديمقراطية اللبنانية مبنية على أسس وقواعد غير صحية متل المحاصصة الطائفية , هادا الشي الغلط لا يختلف عليه اثنان , ولكن وقت نشوف ونسمع واحد سوري عم يتمسخر على اللبنانيين وتجربتهن الحالية بالمطلق فهادا شي بخلي الواحد يشعر بالغثيان عنجد.
على الأقل المواطن اللبناني العادي وجد أمامو كم هائل من المرشحين وانتخب المرشح اللي هو بدو اياه بدون ما حدا يجبروا بالقوة على ذلك سواء اندفعلوا مصاري او لا المهم الشغلة بالنهاية راجعة لالو, اما عنا هون عندك مرشح واحد لا غير, وبدو ينجح سواء قلت نعم او ما صوتت حتى.
بالانتخابات اللبنانية حتى لحظة اغلاق صناديق الاقتراع ما كان معروف مين رح يفوز, بينما عنا هون في ما يسمى بانتخابات مجلس الشعب مثلا الاسماء الفائزة بتكون معروفة سلفا, وباستفتاء الرئاسة مافي غيرو.
بلبنان في اعلام موالي واعلام معارض بينما عنا هون في اعلام موالي ثم اعلام موالي ثم اعلام موالي.
الشباب الجامعي اللبناني منخرط بشكل فعال في الحياة الحزبية في جامعاتهم حيث يعقدون الندوات ويقومون بالمظاهرات ..
بينما الشباب الجامعي السوري يعيش حالة لا توصف من الرعب السياسي الذي بتخلي تمو دائما مسكر وفقط يحضر محاضرات ويدرس وينجح بدون اي نشاط اخر
وبالأخير يعني نحن كشعب سوري لازم على الاقل نشعر بالغيرة ونحسد اللبنانيين على الحرية اللي هن عايشين فيها بحيث الواحد بحكي اللي بدو اياه بدونما يلاقي الامن فوق راسو.
ولكن ان نستورد التجربة اللبنانية الطائفية الى سورية فهادا شيئ مرفوض برأيي الشخصي والاحرى بنا ان ننظر الى الديمقراطيات الاخرى المبنية على اسس صحيحة تماما
|