[mhsen77]

كاتب النص الأصلي : ayhamm26

اسمحلي رد على كلامك من تحت لفوق

هات لشوف جبلي شي مشاركة انا قلت فيها انو النظام علوي واني بكره النظام لانو علوي, اتفضل وانا عم استناك لشوف ايمتى انا قلت انو النظام علوي, ولا الشغلة بس هيك توزيع اتهامات وبس

اول شي بخصوص هي بعتذر منك لانو اختلطت عليي الامور و انا اسف

اي واحد بيكون عندو راي معارض يا ببتهموه انو تكفيري يا انو عم يعارض لانو النظام علوي يا انو بيكره وطنو وعم يبيع وطنيات من برا البلد, بظن عيب هيك ما يعني عيب بنفس القدر اللي لو انا اتهمت واحد فيكن انو مخبر مدسوس بهالمنتدى

اما انو عندي حقد على العلوي, فكمان هي بتركها لكل اللي بيقروا مشاركاتي ليشوفوا انا فعلا عندي حقد على العلوي, ولا اللي بيفكر متلك متخيل انو الطوائف التانية بسوريا حاملين سواطير بدن يقطعولوا راسو وبشار الاسد هو اللي حامي منن.

بشار و ابوه بشكل او بأخر مانعين يوصل الخلاف بين الطوائف ليكون مشابه للبنان

هلق منرجع للموضوع نفسو, منين هي جبتها انو رح ندبح بعضنا لو صار ديمقراطية, باواخر الاربعينات والخمسينات وبعد الانفصال كان في ديمقراطية, على علمك بسوريا كان في حرب اهلية شي بهداك الوقت؟؟
الاقليات بسوريا ما كانوا مشاركين بالحياة السياسية ؟؟

جبتها من التاريخ يلي عاشتو سوريا قبل ال 1970 جبتها من احداث الاخوان المسلمين يلي التفجيرات تبعهون طالت مناطق محدد بطوائف معينة
صح ما كان في حرب اهلية بس الحرب كانت بشكل تاني
الاقليات بسوريا ما كانت مشاركة مشاركة حقيقية بالحياة العادية لحتى تشارك بالحياة السياسية
انا حتى عرف عن حالي من اقلية عانت الامرين قبل استلام حافظ الاسد الحكم و حتى من قبل من لما استلم وزارة الدفاع على عهد امين الحافظ
كان افراد جماعتي \ المرشديين \ يتحاكمو بتهمة الانتماء الى المرشدية و ينحبسو من تلت شهور لسنتين
و ما كان الهن الحق باي وظيفة و حتى يلي يبين انو مرشدي و موظف او متطوع بالجيش كان ينطرد
و طبعا هالحكي بينطبق ع الدروز بنفس الفترة
و كان هالوضع مفروض من اعلى مستويات الحكم بسوريا \ على مستوى رئيس الجمهورية و رئاسة الوزراء و دعم شعبي كمان اذا بدك \

التقاتل الطائفي ما بلش الا بعهد حافظ الاسد الميمون, لما استلم الحكم ب 1970 شفت الشعب طلع شي ثورة علي لانو علوي؟؟ بالعكس انا بقلك انو كتيير من الشعب صدق وعودوا وما حدا فكر بقصة انو علوي او لاء, والاضطرابات اللي بلشت بعد 9 سنين من عهدو كان سببها السياسات اللي اتبعها وليس طائفتو

اذا بتراجع التاريخ مليح بتشوف غير هالحكي


وبرجع بقول اللي قلتو بمشاركة سابقة, ما حدا قال لازم تنبنى بسوريا النموذج اللبناني, بس على الاقل ندرسوا نستفيد من اللي عم صير, يا اخي على الاقل يحرك فينا شي , انو لايمتى رح يضل عنا انتخابات نتيجتها معروفة قبل 7 سنين من بدايتها ؟؟

تحياتي

انا رح كرر اعتذاري منك بس صار اختلاط بينك و بين شخص تاني
انا معك انو الوضع مو صحيح 100% وفي اغلاط بس مو بهالسوء كمان يلي عم تصوروه
بس بالنسبة للنموذج اللبناني يلي عم نحكي فيه شكلو الظاهري ديقراطي بس يعني قشر مو اكتر
يعني بعطيك امثلة عاللي صار بللبنان من ضرب و قتل مشان الانتخابات
خوري من الطائفة السريانية طفشوه من المتن لانو ما قال لجماعتو لاتنتخبو ميشيل المر و بعدين هجمو على بيتو
هي هيي الديقراطية يلي بدنا ناخد منها العبر