[saman]

كاتب النص الأصلي : أم الجود

يعني لما اخترعوا التدخين كان جاية بالكتالوج تبعو انو بس للرجال ؟؟ ولا في بآلية عملية التدخين ما يناسب التكوين الفيزيولوجي للرجال و يتعارض مع تكوين المرأة ؟؟
التدخين تدخين إن كان المدخن رجال أو مرا أو كان الدخان سيكارة أو أركيلة أو بايب أو سيكار ...
بس نحنا كشرقيين مننظر للسيكارة بإيد المرأة (و الصبية خصوصاً) على أنها شكل من أشكال الإغراء -متل اللبس الجريء- يعني مرتبط بالسمعة و الأخلاق .. لهيك الرجال عموماً بيمنعوا زوجاتن (أو بناتن أو أخواتن) من التدخين ، مو خوفاً على صحتن لأنوا هالرجال غالباً هنن نفسن بيدخنوا .. بس حرصاً على صورتن قدام المجتمع و تأكيداً لوجود سلطتن على نسائن (انو أنا ماشالله حولي ضابب نسواني و ما حدا بيطلعلو يحكي معي كلمة هالقد) ...



طيب ليش الأركيلة عادي و طبيعي و السيكارة لأ ؟!!
إذا بدنا نحكي من الناحية الجمالية و إذا التدخين فيو انتقاص من أنوثة المرأة ولا لأ .. فأنا بشوف السيكارة بإيد المرأة أشيك بمية مرة من خرطوم الأركيلة و الولد أبو النارة عم يخفّق رايح جاية لعندا على غيّر فحمة و الراس عم يحرق و عيشلي ياها ماتت - متل صورة المعلّيمة بالأفلام و المسلسلات المصرية -

اكيد ما اخترعوا التدخين بس للرجال
بس انتي قلتيها بلسانك .. عندنا الشرقيين منظر السيجارة بايد الصبية من اشكال الاغراء .... مع العلم انو انا كـ رجل شرقي .. بشوف السيجارة بايد (الصبية خصوصاً ) محاولة استرجال ...
اما لما شوفها بايد المرأة يلي فوق الـ 28 ع القليلة .. بلاقيها كتير امر طبيعي وعادي

كاتب النص الأصلي : Nay

وانت شو دخلك اذا دخنت المراة ولا لأ..
ياسيدي انا ما بدخن وبكره التدخين والمدخنين وببيتي ما في صحون سكاير وممنوع التدخين حتى على البلكون..
بس شو حشرني اذا حدا بدو يدخن..

انا ما دخلني بـ شي
وماني ممتعض وولا متدايق ومو فارقة معي ..
بس انو انا مجرد مستغرب ... من تكاثر هالظاهرة .. يعني سابقاً من شي تلت سنين .. ازا كنا نشوف بنت عم تدخن بالشارع امر غريب عجيب ... هلأ صرت وين ما عم روح عم شوف بنات عم تدخن ... طبعاً وهالشي بينطبق ع الرجال ... يعني انا بالنسبة الي من زمان لما كنت شوف شب صغير عم بيدخن بنص الشارع لاقيه امر غريب .. ولما شفت هالشغلة عم بتزيد كمان غريب .... ومن جديد صرت استغرب من كترة الناس يلي عم اتأركل .. وين ما بدير وجي بلاقي اركيلة بنص الشارع وعم يأركلو العالم !

كاتب النص الأصلي : أم الجود

و ع فكرة أصلاً أنا ما بدخن .. بس انو يعني إذا كنت سهرانة بشي مطرح و القعدة ظريفة و حبيت نفخلي سيكارة لازم أشربا تحت الطاولة ؟ ولا على قولة سعيد صالح روح اشربها بالحمام ؟!!