[krimbow]

>>> يا سلام كبرت المظاهرة، شكر كبير للجميع<<<



طارق: خود اشحطلك شحطة

راغب: بتعرفني متدين، ما بحشش، الحشيش حرام، و فوق هيك مخالف للقانون. الله يغنيك عنها.

طارق: هلأ من كل عقلك عم تحكي؟، اذا حششت بتخالف القانون؟

راغب: طبعا، تعاطي المخدرات فيها سجن

طارق: طيب شو رأيك انو عيسى بن مريم و محمد بن عبدلله كانوا مخالفين للقوانين؟

راغب: هاه!!! اعربلي ياها بالله!

طارق: عيسى خالف قانون الجاذبية و مشي ع المي، و محمد خالف قانون "مقاطعة اسرائيل" و اسرى للقدس

راغب: لك يا حشاش، هدول انبيا، يعني هي الشغلات عجايب، بعدين ع ايام الرسول ما كان في شي اسمو اسرائيل ليقاطعوها

طارق: اي مزبوط، بس كمان ما كان عندهم حشيش ليحرموه، بدك نمشي ع قوانين اليوم و اللا قوانين مبارح؟؟ ع قوانين اليوم، التحشيش جريمة و الرسول طبع مع اسرائيل، ع قوانين مبارح الحشيش مباح، و الرسول اسرى للقدس، شو قلت؟
بعدين ع سيرة العجايب، اي شحطة وحدة رح تخليك تشوف ما لم تره عين، و تسمع ما لم تسمع به اذن

راغب: في وجهة نظر بكلامك، بس بدي افهم شو قصدك انو ما كان في حشيش ليحرموه؟؟ الله يللي بيحرم، شو قصدك انو الله ما كان بيعرف انو رح يدخنوا الحشيش؟؟ و اللا برأيك انو بيعرف بس الحشيش حلال؟؟

طارق: لا خيو، ما بحب حدا يكفر على يدي، انت ليش هيك فسرتها؟ اخي اعتبر انو الله بيعرف كل شي بما فيو التحشيش، بس نحنا يللي ما كنا منعرفو و ما حب يدلنا عليه...
يعني شو كان بدك ياه يقول حرمت عليكم الميسر و المنكر و الحشيش؟؟؟
و يحط الرسول بموقف حرج يقعد يشرحلون لقريش شو قصدو بالحشيش! ما بيعملها، أصلا ما بيلبقلنا، ازا حكالنا كلمتين عن الجنة الناس صارت تتفنن كيف بدا تفجر حالا بافغانستان و العراق... انت خدها بروح رياضية

راغب: والله اقنعتني، بس يا زلمة بلكي صار معي صرطان او خرفت ع بكير؟؟

طارق: يا رجل عم تدخن متل الببور كل يوم 3 بكيتات حمرا و خايف ع صحتك ؟؟؟ بعدين دخلك عقلك شو نفعك ؟؟، صرلك 3 سنين متخرج من الجامعة و بعدك عاطل عن العمل، و بيتكم أد هاد العقربة و ارخص بيت حقو مليون ما معك منهم الف ليرة ع بعضا، يعني زواز.. انسى، انو ع شو خايف بالله؟؟ ع مستقبلك الباهر؟ و اللا مجدك المروم؟؟

راغب: خليها بالقلب يا مواطن احسن ما تطلع لبرا و تفضح

طارق: ولي على قلبي عليك شو مفحم، خدلك شحطة خود... لك هي الشيغارة دوا، مسا الخير

راغب: مية مسا