اقتباس:
|
يازلمة ماوزعتلك باقة من الاتهامات . انا حكيت رأيي ( يلي حسيتك تحسست منو ) . أنا نقضت كم نقطة . وأساسا فكرتي بالبداية كانت بسيطة . اني لقيت فرق بين ثلاثائيات بتكتبها من وجهة نظر متابع ومحلل . وثلاثائيات حملت وجهة نظر خاصة ( على الأاقل من وجهة نظري )
|
لأ معلم الله يخليك الحكي موجود بالموضوع... انت اتهمتني بعدم الموضوعية و اني عم اجتزئ شغلات مشان مشي كلامي و انو القانون مو متل ما عم قول..
و بخصوص الثلاثائيات, كلو ع بعضو هو موضوع رأي, مانو موضوع اخباري بأي شكل من الأشكال, و بعمر ما ادعيت الحيادية تجاه قضية بعتقد انها تمسني... بالعكس الله يبعدنا عن الحيادية
اقتباس:
|
شايف حساسيتك المفرطة . أنا ماضحكت على كلامك . لأنو ببساطة نقل لكلامهم . انا ضحت على الفكرة وعلى كلامهم . يعني اتحاد الصحفيين او الاتحاد النسائي . اذا بوكرة بيجيه تعميم انهم يدعمو القانون . بتلاقيهم عم يطبلوا فيه ليل نهار . وأنهم على اطلاع تام . وهذا القانون يمثل سورية الحديثة . ويعمل على رفعتها ومكانتها وباقي الأاسطوانة .
سؤال على جنب . رئيسة الاتحاد النسائي مين بتمثل بلا صغرة . ومين اختارها . وقديش نسبة النساء يلي بيعرفو أسمها
|
يا معلمي وين حساسيتي المفرطة؟ لا تحسسني انك ماسك شغلة اني متحسس و مزعوج مشان تقول اني ما عم حاورك من منطلق فكري؟!
انت عم تقلي "ضحّكتني".. سو, أنا ضحّكتك (النص له قداسته ع قوله الهداك) و أنا كمّلت معك الضحك و قلتلك بيسعدني اني ضحّكتك... و ليش رحتلي عالاتحاد النسائي؟ سيبنا منو هادا, أنا عم قلك انو هدول قالو انو ما حدا طلع من عندون (و كان قصدي بالتحديد ممثلي الطوائف), انو هلأ بيقولو العكس... بعتقد انو كلمة الحق سبّاقة لأنو مو معقول يقولو ما انأخد برأينا لما انأخد.. لو بقيو ساكتين كان فهمناها!
اقتباس:
|
لسا بتقلي أني عم كذبك . ممكن تفرجيني وين كذبتك
لاحظ أنو انا ما أتهمت اشخاص . أنا أختلفت واتفقت معك . واختلفت ,اتفقت مع ناي . أ
|
انت اقتبست كلامي عن إحداث النيابة العامة الشرعية (اللي ما كانت موجودة و ما حدا كان عم يطالب فيها...ع حد علمي.. يجوز وسائل الإعلام ما جابت سيرة للمظاهرات العارمة اللي عم تطالب فيها..) و قلتلي انو من وين طالعلك بهالحكي.. رحت جبتلك الفقرة كاملة عن شو صلاحية النائب الشرعي, و بيّنتلك انو بيحقلو يرفع هو الدعوى حتى لو أصحاب العلاقة ما تدخّلو, و لسى في كمالة: المدّعي لدى النائب الشرعي (يعني انت بتشوف ظلم تروح عالمحامي العام تقلو عمي هيك و هيك و المحامي العام يطلب تحريك الدعوى) معفي من رسوم الدعوى... يعني تخيّل انت انسرقت او راحو تسلبطو ع أرضك و بنو عليها و بدك ترفع دعوى لازم تدفع رسوم... بس اذا بتروح عالنائب العام الشرعي تقلو انو جارك عم يقول انو ما بيآمن بألله و معناتا هو مرتد.. انت معفي من رسوم هالدعوى..
للأمانة, وقت بيننالك انو حسب هالقانون المرأة فينا تصير وزيرة بس بيظل أخوها بيؤمر عليها بما يخص الزواج انت حكيت انو هالشي "لازم يوضحوه"...
اقتباس:
|
بالنسبة الك ملاقيه الو طابع اسلامي . وأنا ماعم قول انو جيد من هاد المنطلق . بالنسبة الي مابيفرق كتير عن القديم سوى أنو بيحاول يسد بعض ثغرات القانون القديم (بس هي يلي قلت عنها نقلة ) ومنها منازعات الطلاق يلي كانت تاخد سنين . وانا ماعم قوا انو القانون ناجح 100% . لأنو اي قانون بدو ينعمل فيه لتبين أخطائو .
لما بتلاقي افتتاحية موقع عم تقول بأنو القانون بيشوف المراة موطوئة . براجع القانون بلاقي كلمة موطوئة أجت لتبين حالة معينة بالشرح الدقيق . وتعطي حكمها ( وهاد بشكل طبيعي شغلة القانون ) . بدك ياني شوفو بانو نظرة . دفاعا عن المرأة ؟ . أنا بشوفو اهانة للمرأة . لما بيحاول يستغل شي بيتعلق فيها . يقص منو . ويحاول يصورو بغير مكانو . لأسبابو هو. ممكن غيري يلاقيه دفاعا عن المرأة . أنا شفتو أستغلال للمرأة . اذا بتلاحظ كل هالمواقع بتتشدق بالغرب (من وجهة نظري ) بكلامها عن المرأة , وماشفناهم حاولو يقلدو ويتشدقو بالغرب بماوصلو أليه من علوم وتكنولوجيا واحترام الاخر. وخطابهم لايقل تطرفا عن خطاب المتطرفيين الأسلاميين
|
هلأ شو بدنا بالغرب...
شكلاً القانون مش ملائم لدولة تطمح تكون عصرية (حتى لو ضمن إطار عقائدي ما.. ), يعني فيو مصطلحات كان ممكن التعبير عنها بصيغة أكثر أناقة.. و هالحكي لا يصب في خانة التشدّق كما تقول...
حتى الشكل نتركو... أخي المضمون!
و مو صحيح انو القانون ما تبيّن عيوبو لحتى يتطبّق, لأنو وقت يتطبّق و يبيّن عيبو بالتطبيق لبين ما يتغيّر في حدا تطبّق عليه, و هالحدا مظلوم... و معروفة سوابق قوانين مشابهة متل مصر و كيف تم استخدامها بتحالف السلطة مع مشايخها لمضايقة أناس محددين
اقتباس:
شريك . انت خفف حدتك بالموضوع . حتلاقي نقاشي عادي ومابيحمل يلي أنت شايفو . وسمايل الضحك هو للتعبير عن اني ريلاكس بالنقاش فكون هيك . وموهو للأنتقاص او الاستفزاز . فروء بيبين معك شو بيعني  هامش على جنب
أي ماصدقنا نرجع ننقاشك يازلمة . شبك
|
يا خال أنا ماني محتد... انت ما قابض الناس جد, شي بتقول متشدقين و شي بتقول ماسكيلي ع كلمة... و كنت عم جيبلك أفكار و عم تردلي بوادي تاني.... يعني شو بدي رد أنا؟
اقتباس:
|
حبيب وحتى ولو عدلوه . بالنسبة الي ماعندي مشكلة طالما مابيمس عقيدتي . وأنا مع اي حدا بيشوف انو هالقانون بيمس عقيدتو
|
أنا ما بشوف عالواقع انو كلامك صحيح (قصدي انك مع حدا بيشوف انو هالقانون بيمس عقيدتو)... لأنو عم نورجيك وين هالقانون رح يدعس علينا (كلادينيين و كلا متدينين) و انت عم تقول متشدقين, و عم نورجيك نقاط و ما عم ترد عليها... بتقلي أغلبية اسلامية و هالأغلبية لازم تمشي (هاد كلامك!)
القانون للكل... و أنا ما عندي مانع, بالعكس ادعم و بشدة انو يكون في احتواء قانوني للشرع الإسلامي و لأي طائفة دينية... انو كل واحد يكون فينو يمارس معتقداتو بحرية مطلقة... بس بدي قانون يحتويني أنا كمان لأني مواطن لهالبلد متلي متل غيري.. و هالقانون مش بس ما يحتويني, هالقانون أنا بحسو تهديد لألي! شو يكون في سلطة قانونية لحدا لحتى يقدر يقوم بإجراءات ضدي بناءً على معتقداتي من عدمها؟
القانون ما يمنعني كون ملحد, و ما يمنعني جاهر بإلحادي, و لذلك مش منطقي انو يمنعني من الزواج اذا المحروسة قبلانة! و مش منطقي ما يخليني قرر أنا مين بدو يورثني و كيف! خلي كل واحد يورّث ع كيفو خيو وين المشكلة؟!
اقتباس:
|
من فترة وبعد وفاة ستي الله يرحمها . عملو عمامي حصر الارث مشان الورتة . ماعندي معلومات عن كيف هيك بس الي صار أنو بقانون الدولة (شي الو علاقة بملك زراعي على ما اعتقد ) طلع أنو لازم يورث فيها البنت متل الشب . وهاد ضد عقيدتنا . بالنتيجة الورتة صارت حسب الشرع . وعند الدولة حسب القانون .
|
الله يرحم ستك و يسكنها فسيح جنّاتها... و أنا ما عندي خبرة قانونية لحتى احكم ع الحالة و كمان ما عندي أي مانع أو أي ملاحظة على انو ضمن كل عائلة تمشي الأمور كما يريد أفرادها...
تعا احكيلك قصة تانية... واحد جارنا, شركسي (مسلم يعني)... صرلو عشرين سنة ما يحكي مع أخواتو, متخانقين, توفى (و للامانة توفى بين إيدين أبوي - طبيبو-).. و الزلمة عندو 3 بنات و كان عندو ولد من جيلي توفى بالسحايا و هو صغير...
اجو الأعمام رفعو دعوى انو مات و ما عندو ورثة ذكور, يعني الأعمام الهون حق بوراثة أخوهون, و أكلو قسم منيح من ورثة بناتو كون مرتو كمان ما ورثت لأنها ليست مسلمة (هو راح ع يوغسلافيا درس هندسة كهربا و تزوج هنيك)..
طيب بهالحالة شو مشان؟ هو لو يعرف انو رح يموت كان ما رضي اخواتو يورثوه.. كان التف عالقانون و عمل عقود بيع وهمية لبناتو ( و هالعقود كمان مشكلة... اسألني لألي, عيلتي لليوم في مشاكل بيناتهون بسببها).
أنا متأكد انو هو كرغبة كان بدو مرتو تورثو.. و من مرتو لبناتو... مو تروح لأخوتو! طيب ليش ما فيو؟ مع العلم انو مرتو نالت الجنسية السورية و تعمل (أو كانت تعمل) لدى الحكومة السورية.
ليش مافي احتواء قانوني لهالشخص انو خلال حياتو يقرر مين بدو يورثو؟ أو في قانون أحوال شخصية مدني بجانب قوانين الطوائف و المذاهب؟ بتروح بتسجّل بالمحكمة أو بالنفوس أو بشو ما كان انو انت شخص بدك تحتكم للقانون المدنى الوضعي, و اللي حابب يبقى عالمحكمة الشرعية الخاصة بمذهبو يبقى...
انت خسران شي اذا أنا تزوجت مدني و ورثت أو ورّثت مدني؟ قانون محتويني و انت عندك قانون يحتويك.. وين المشكلة بالضبط؟
بستغرب هالتمسّك بقانون الأحوال الشخصية لما هو قانون من اسمو يخص الشخص! شو ما عمل بحالو ما يأثر على غيرو!
و الله مو صعبة يحتوو الكل... بس بدها رغبة, مش أكتر, و هالمشروع عم يحكيلي انو هالرغبة غير موجودة... فقط لا غير