[أم الجود]

مرحبا للجميع ... الموضوع جلو و مهم حتى لو كان منحكى فيه كتير لأنه لهلأ ما قدر المنطق البشري يكوّن صورة واضحة موحّدة و مفهومة عن المثلية ... ناس بتهاجم و بتدعي للقضاء على هالسلوك و محاربة مرتكبينه ، ناس بتوقف عالحياد و بتقول ما دخلنا لا بيآذوني ولا بآذيهن و الهن رب بيحاسبهن (سلبية ضمنية) و ناس بتداقع و بتقول انو معلش و شو عليه و حتى بتروح للتفكير انو حتى تبني المثليين للأطفال مو كارثي للدرجة اللي بيصورها البعض و انو شفنا بدايع التربية تبع الكوبلات النظامية و بالتالي الشغلة متعلقة بالشخص نفسو و أخلاقو مو بميولو الجنسية و توفر الموديل الروتيني للعائلة : أب و أم و أطفال..
و في مين حكى برأي الطب و علم النفس بالموضوع لأنو هالأساس منبني نظرتنا للموضوع و بالتالي منختار كيف نتعامل مع هالأشخاص (انو اذا المثلية مرض نفسي أو اضطراب هرموني أو اختيار شخصي) و أنا حابة بعد كل هالحكي قول شغلة صغيرة و هي من وحي تجربة شخصية .. أنا يمكن كنت من جماعة التصنيف الأولاني و كنت أعتبر (و السبب كان جهل بالموضوع) المثلية شي معيب و المثليين ناس سيئين و لازم نبذهن و إشعارهن بالعار من اللي عم يعملوه .. بعدين مع شوية اطلاع و قراية و مناقشات و تفكير توصلت لأنو المثلية مو اختيار شخصي مدرك و مسؤول : يعني ما بظن في حدا بيكون بإيدو يكون طبيعي و يعمل عيلة و يحب من الجنس الآخر و بيقول لأ خليني أطلع عن المألوف و أعمل حركة اوريجينال و جرب شي جديد ، خاصة انو رح يلاقي معارضة من كل محيطو من أهله و جر هاد إذا ما قلنا اضطهاد .. تاني شي إذا سلمنا انو المثلية مرض و في بعض منكن حكي عن العلاج .. شو ممكن يكون العلاج ؟ أو بالأحرى هل فعلاً في علاج ؟؟ يعني أنا لهلأ ما سمعت عن مثلي كان مثلي و طاب و صار متلنا متلو .. يمكن يكون هلأ ما في علاج واضح .. طيب انشالله نوصل بيوم من الأيام لحل و نخلص من هالمعضلة بس من هون لوقتا شو منعمل ؟؟ بظن اللي طرح الموضوع كان قصدو نحكي أكتر بالنظرة الانسانية تجاه هالأشخاص .. هنن ناس ممكن يكون حولنا و حوالينا من دون ما نحنا يكون معنا و عم يعانوا بصمت من خوفن من الرفض و المقاطعة .. ممكن يكونوا ناس من عيلتنا مو شرط انو بس نسمع عنن أو نشوفن بالأفلام .. و ع فكرة أنا لليوم مو مع المثلية و ضد انو نروح للتطرف التاني و نقول للمثليين تعوا حبيباتي و ساووا شو ما بدكن و تجوزوا و ربوا ولاد ، و أصلاً هالشي مو وارد ببلادنا بنوب ، طيب بس عالقليلة نحاول نكون متفهمين لهالأشخاص و في حال فشلنا في مساعدتن ليطلعوا من اللي هنن فيه ، ما نكون سلبيين تجاهن و ننسى أنه هنن بشر و ناس عاديين الهن أحاسيسن و مشاعرن و بحاجة للتواصل الانساني ...

شكراً