جمهورية البوكمال الصديقة تحت النار... سورية تشجب وتستنكر
سألني أحد الأصدقاء البارحة ما هي حدود سوريا من الشرق فأجبت العراق... قال لي لا انها البوكمال... لم أفهم أولاً مقصده لكنني استوعبت فيما بعد... أن حكومتنا تعاملت مع الأمر وكأن البوكمال جمهورية مستقله وليست أرضاً سورية...
لو لم تكن البوكمال أرضاً سورية بل كانت دولة مجاورة تعرضت لضربة عسكرية أمريكية ماذا سوف تكون ردة فعل حكومتنا العتيده... سوف تكون الشجب والاستنكار أيضاً... هل باتت أرضنا ودمائنا مستباحه لهذه الدرجة بفضل سياسة الصمود والتصدي المواجهة والممانعة؟
ماعلينا قلنا لنتابع الخبر والوضع الطبيعي لنتابع خبر بهالحجم هاد وجريمة بهالحقارة انك تحط على الفضائية السورية... حطينا على فضائيتنا المغوارة وبلشت تابع شريط الأخبار من أوله... أول خبر عن زيارة مولر "وزير خارجية الدنمارك" ...تاني خبر عن مولر .. تالت خبر عن مولر... الرابع عن مولر .. اتصورت للحظه انو مولر هو طارق بن زياد بعدين اتزكرت انو اهتمامات حكومتنا البطله بالسياسة الخارجية أولاً والشأن الداخلي يأتي في المرتبه التسعين..
المهم وأخيراً طلع خبر العدوان على أرضي ويلي راح ضحيتوا 8 شهداء منون طفلين ومرأه... صيغة الخبر وبكل وقاحه مصدر مسؤول يستنكر الاعتداء ويحمل أميركا المسؤولية... لأول وهلة انصدمت معقول هيك بس؟؟ استنكار ومصدر.. بس مصدر وبس استنكار.. وتحميل أميركا المسؤولية؟؟ ما أحلاكون والله مثلاً تحملو الشعب المسؤولية...
انو وين الـ15 ألف عسكري يلي على حدود العراق.. ليكونو بس عم يحمو الحدود من اتجاه سوريا العراق ومحطوطين بس مشان ترضى أميركا "بحكم انو نحنا دولة الممانعه الوحيده بالمنطقه"... وين الشعور القومي ياشباب وين الكرامة والشرف... وين المضادرات الأرضية وين السلاح يلي صرلو عم ينشرا من أربعين سنة.. لك وين الأمن الحارق الخارق؟؟ أه عفواً هاد الأمن مهمتو بس رصد المتأمرين والعملاء في الداخل أما هيك قصص صغيرة مابيتدخل فيها...
قبل ماحدا يقلي هي أميركا شوفينا نعمل... ضربتنا اسرائيل بعين الصاحب وخرسنا واحتفظنا بحق الرد وضربتنا بالكبر بالجزيرة السنة الماضية وخرسنا واحتفظنا بخق الرد والطيران الاسرائيلي وصل لفوق القصر الجمهوري باللادقية ونحنا محتفظين بحق الرد.... انو وبعدين؟؟ شو فرقنا عن أي دولة من دول الانهزام... الفرق الوحيد انو هدوليك مابينضربو نحنا مننضرب ومنخرس...
المهم مافي ضرر لحق بأبراج سيريتل ولا بأبار النفط... الباقي عادي...
مقترحات مشان ماحدا يقلي شو منقدر نعمل:
التصدي لهالطيران يلي اخترق أجوائنا وللإنزل يلي صار.. تحديداً انو الطائرات كانت طائرات عامودية... خطين تحت عامودية يعني هيلكوبتر يعني مو F16 ولا F22 حتى نقول انو مضاداتنا مابتجيبا... والرد على أرضنا بتكفلو كل المواثيق والأعرفا الدولية... بس أكيد في سبب وجيه عند الشباب انو مانرد...
قطع العلاقات الدبلوماسية مع أميركا وطرد القائم بالأعمال...
الرد على الغارات الاسرائيلية المتواصلة ويلي استباحت أرضنا وشعبنا... الرد بدو يفتح جبهة؟ اي عمي تنفتح هالجبهة بقا.. صرلنا 40 سنة عم نستعد للمواجهة.. ما حلنا نجهز بقا؟؟
أو اذا مابدنا نعمل كل هدول نكون صادقين شوي مع شعبنا ومع حالنا... ونقول شو حجمنا وشوإمكانياتنا ونقول انو نحنا جماعه علاكين وكذابين ولافي مواجهة ولافي مسخرة... انما الموضوع مجرد أداة لترويع الشعب وقمعو...
أمنية وطنية:
كتير كنت حابب انو على القليلة يعلنو الحداد الوطني على الشهداء... عن جد لو يلي ماتو صوماليين بس على ارضنا كانو أعلنو الحداد الوطني... بس يبدو انو دم المواطن السوري صار مستباح داخلياً وخارجياً... وليش لنعتب عليون اذا نحنا مو فارقة معنا..
عين الصاحب الكبر اللادقية البوكمال... وبكرا وين الله أعلم ومازلنا نشجب ونستنكر وندين...
عاش الصمود.. عاشت الممانعه... عاشت قلعة الصمود والتصدي... عاش جيشنا الباسل المغلوب على أمره...
الرحمة على الشهداء... الرحمة على الوطنية... الرحمة على الشرف
الحرية لكل أسرى الحرية في سوريا...
العربي الذي لايجرأ من الذل والخوف على رفع رأسه لرؤية القمر !!!
كيف سينتصر على غزاة القمر؟؟!!
|