[الفنانة سارة شمة]

yass -سوريه :
هناك تباين في وجهات النظر حول العلاقة ما بين المبدع و المجتمع المحيط به, ففي حين يقول البعض أنه من واجب أي مبدع أن يكون ملتزما بقضايا المجتمع و أن يكون ابداعه وسيلة و أداة عمل لبلورة هذ الالتزام على أرض الواقع, يقول البعض الآخر أنه يحق للمبدع أحيان كثيرة أن يكون بعيدا عن مواقع الصراع و أن يخلق لنفسه برجا عاجيا يصنع فيه واقعا جديدا بعيدا عن الحقيقي.. بل و حتى هناك من يعيب على المبدعين من فنانين و كتاب و مثقفين تدخّلهم في قضايا كثيرة.. فنسمع عبارات مثل "الفن يجب أن يبقى بعيدا عن السياسة".. ما هو رأي الفنانة بهذا الأمر؟

الفن هو متل ما قلت اله حالات كتيره فبعض الفنانين هنن ملتزمين كتير اذا بنسميها بقضايا المجتمع و همهم يعملو فن مشان يغيرو من مؤسسه و يرفعو من شأن مؤسسه تانيه و يدافعو عن العمال او الخ هاد نوع و في نوع تاني متل ما قلت بكون شخصي اكتر بخص التعرّف على منابع الابداع الموجوده جوات الانسان و هاد نوع تاني فانا مافيني قول هاد صح ولا هاد صح في اختلاف بالنتيجه و كل حدا اله طريقته بالتعبير عن حاله انا ممكن كون من النوع اللي ما كتير بيهني أعمل صراعات ما هاد همي , همي انو عبر عن حالي متل ما انا و بعتقد انو بهي الطريقه بيقدر يقدم شي جديد لتاريخ الفن وقت بكون عم يعبر عن حاله بشكل كتير عفوي و غريب بيكون عم يقدّم شي جديد لتاريخ الفن اكتر من انو يعطي رأيه بقصه لانو بالنهايه آرائنا كلها بتشبه بعضها لانو العالم كلو ضد العنف و ضد ..

Hus -سوريه :
على مر العصور والأزمان ، كان دائما في شريحة نخبوية تحمل على عاتقها هامش من المسؤولية للنهوض بالمجتمع ، و على ما يعتقد الجموع مقدار المسؤولية التي اخدتها هال الشريحة على عاتقها بمجتمعاتها سابقا اتجلت اليوم بصورة امم اكثر مدنية من امم اخرى و شعوب اكثر رقيي من شعوب اخرى ، اين تجد سارة نفسها من هذا ، وهل تتفقين ومن يعتقدون بأن الملكات لا بد لها ان تقترن بالمسؤولية

برجع بقول ما ضروري هي تقترن بالمسؤوليه و ما ضروري ما تقترن بالمسؤوليه مافي شي ضروري هو موضوع شخصي بيختلف من شخص لاخر و من فنان لاخر و الفن بالنهايه هو انعكاس للحاله المعاشه سواء السياسيه او الاقتصاديه و الاجتماعيه ما بعتقد الفن قادر يغير بالمجتمع او قادر يوقف حرب هاد شي ما بعتقده هو انعكاس لشي موجود ..

سؤال ضمني# 1 Hus - ما بيقدر يسرع بعجله التغير؟

والله ما بعتقد ما بيقدر الفنان ما يعبر عن حالو بدو يعبر اجباري و بدو يحس انو هو بدو يغير الدنيا بس التاريخ اثبت هيك في فنان قدر يوقف حرب؟ يعني موضوع التغير و الصراع بدو محاربه و بدو جهات مسؤوله تقدر تحارب الجهات اللي عم تخرب. الفنان هو بعبر هو بحاكي مشاعر العالم هو بيحكي مع الاشخاص بشكل رسمي بس ما بيقدر يوقف او يغير الا كتير كتير نادر. في تجارب موجوده باوربا ,يعني انا عم قول اوربا كمثال لتجارب اكتر بس مشان هيك و شو قدرو يغيرو شي ما كتير شي محرز يعني شي كتير بسيط و قليل.

سؤال ضمني #2 The morning - يعني ما ممكن للفن ينقل صوره اللي عم يصير بطريقه معينه لحتى تساعد على نهوض المجتمع و تغير بعض الاوضاع ؟

ما بعتقد ! بس هيك بامن الفنان لحتى يقدر يستمر بس ما بعتقد انو بيقدر و هاد شي بنلمسه عالواقع و بنشوف تجارب غيرنا شو عملو و بنشوف قدر يغيرو ولا ما قدرو يغيرو و متل ما قلت الفن بيعكس كل شي و بيعمل رده فعل تجاه وضع معين و صعب و الى اخره و بحرك مشاعر العالم ليتعاطو معو.
العنف بدو عنف !

سارة.. كفنانة بمجتمع -بمصطلح او بآخر- واحدنا فيه محاصر بعشرات الخطوط الحمراء ، الا تشعرين بالقرف ؟ ما صار وشعرت ولا مرة بالقرف ؟ وان كان ذلك فعلا بيصير معك، وين تحديدا وعند اي من الخطوط الحمراء بتشعر سارة بالقرف؟؟

كتير شغلات بشعر بالقرف منها متل الكذب و النفاق و كل هالقصص لانو كبت الحريه هو كذب و كتير شغلات بترجع من الكذب و النفاق و الشجع كمان اذا بدك, فاكيد بشعر بالقرف بكتير مواقف بيطلع هالشي بتعبير وجه او حركه ايد او كل هاد التعبير اللي باللاوعي ... بس بدك الحقيقه يعني انا ما كتير بحس حالي محاصره, ماني حاسه هاد الشي! هي الحقيقه .
ماني شايفه في شي محرز لاني حس هيك او بركي ما تقيدت او عشت حياه ,الى حد ما, حلوه او هيك بس ما مسني هاد الشي ولا مره طبعا بقدر شوفو بكتير شغلات, بقدر شوفه بالعالم اللي بتأذي غيرها بس ماني معتبره انو انا مهمتي اني قاتل هالشي . انا بعتقد اني اذا عبرت عن حالي بشكل , اذا بدنا نقول , بريئ و حقيقي هالشي بخلي العالم تتواصل مع لوحتي و مجرد انو العالم قدرت تتواصل مع لوحتي انا بعتبره تحقيق للموجود.
انو انا بدي قاتل او اني ارفع مستوى المجتمع او اني غير و اني اعمل حريه او الى اخره بعتبر انو طريقتي هي بنقل المشاعر بشكل حلو او متل ما قال واحد من الاسئله هون باني حرك مشاعر العالم و انا بعتقد انو هاد الطريق اللي بيعمل شي زياده بالمجتمع .

و بس و شكرا لالكم و شكرا لانكم فخورين
اخيرا شكرا كتير يا سارة ، شكرا لإنك مرقت بحياتنا ، شكرا لإنك بنت بلدنا ، ما تسدقي شقد احنا فخورين وشايفين حالنا فيكي ...

و انا سعيده فيكم ..