طيب ..
وائل 76
1_ أخي حسام كتير مواضيع من السنة الماضية لهلاء تحدثت عن أخوية و عن المشاكل يلي بتصير بأخوية لفتتني جملة كتير كنت تتكررها بكذا موقف ( أخوية مانها تجمع نخبوي .. ) لاحظت انو كتير معني بأخوية إنعكاس للواقع الحقيقي بكل تناقضاته .. سؤالي أخي حسام .. يعني المفروض كصاحب موقع على الشبكة أنو تهتم بمستوى معين أو أنو تطمح لمستوى معين من الناس الموجودة حتى ينعكس هالشي على مستوى الموقع بقصد هون مستواه بين المواقع أو المنتديات الحوارية العربية .. شو الدافع يلي خلا حسام يتنازل عن ريادة كان ممكن تكون سهلة بوجود مجموعة كبيرة من الناس هون و تكون قمة الأماني عند حسام هو تجمع غير نخبوي بكل تناقضاته و همومه و مشاكله ؟
اخوية Project مشروع .. اخوية بالنسبة إلنا مش منتدى على النت .. بو لا وقت قارناه بغير مواقع ، بولا وقت حسينا بأي نوع من المنافسة مع غير مواقع (وهون احنا منتمنى من كل قلبنا يكون في حدى عم ينافسنا على .. فبالنهاي احنا هون لتحقيق اهداف معينة لا اكتر و لا اقل فالي رح بينافسنا على تحقيقها ما رح غير نحنيلو القبعات .. ونتشكرو كمنافس و كشريك بالطريق او حتى لو حب حدى بيقدر يسميه يشريك بهال النضال ..)
كمشروع بنائي (بأهداف بنائية اجتماعية او البناء في الصعيد الإجتماعي) المستهدف والمستقطب مش النخبوي بنوب وانما على النقيض احنا هدفنا الا نبخوين، او للدقة ساحة عملنا ، هيي الانخبويين، الأشخاص الي على النقيد تماما .. الاشخاص هدول هني الي بحاجة لمساعدتنا (اذا صحلنا نقول هيك جملة) ،..
يعني من غير ما كتير ادخل بتفاصيل، اليوم النخبوي بشو هوي لمساعدة ، بشو هوي بحاجة لبناء؟؟ ما هوي سواء ساعد حالو سواء لقى بوقت ما مين يساعدو .. هوي مش بحاجة لأخوية بشي..
الي على الطرف الآخر هني الي بحاجة لأخوية و هني الي كرمالهم اخوية موجودة كهدف اول .. او الي هوي مساعدتهم تيساعدو حالهم ، مساعتدهم ليكونو اوعى بالقضايا الحساسة اكتر ولو بس شوي .. (ما عم نقول بدنا نخلي البشرية كلها نخبويين، ولا بيهمنا هذا بشيئ .. ولا عم نقول بدنا نقلبهم فوقاني تحتاني .. ) بالنسبة لانا الموضوع بسيط كتير، في شريحة واسعة واسعة واسعة.. هيي الأوسع ، صارت الا مبالات جزء من إرثها و تاريخها وزهنيتها .. شريحة واسعة جدا (ان لم تكن الأوسع ) ضلت جيل ورا جيل عم تقول انا مالي علاقة بالسياسية .. لغاية ما وصلها البل على الدقن ، ضلت جيل ورا جيل تقول ليش معقول صوتي بالإنتخابات يغير شي .. انا مالي علاقة ، لغاية ما صار ممثليهم بالنيابة والمجالس ابواق متراصة .. ضل يقول انا مالي علاقة بالإرهاب انا الحيط الحيط ما دخلني .. لحتى انفجر فيه ولا بعائلته سيارة مفخخة او مبنى او غيرو ..
هاي الشريحة الواسعة جدا بدنا نقلهم بس انو يا جماعة خلو بالكم هون التجاهل رح يضر كتير، وهون الصمت رح يودي لنتائج اقصى من انكم تستحملوها ، وهيك .. بس هيك ..
شغلة حكينا بجوز عنها قبل ومنرجع مناسبة هون منقولها ، احنا مانا هون بنزعة طوباوية.. احنا بنوب مش طوباويين .. ولا احنا هون بميولات ملائكية .. ابدا ابدا ما هيك .. هو النقيض تماما ..
احنا لمن عم نقول بدنا نساعد الآخر كرمال يساعد نفسه ، لمن عم نقول بدنا نعمل شيئ بنائي بالمجتمع .. هو انطلاقا من مصالحنا الخاصة .. انا كفرد مصلحتي الخاصة والفردية اني عيش مرتاح بمجتمع آمن صحي ، انا وابنائي واحفادي وعائلتي .. بس للأسف صوتي بطل الو صدى لإني لحالي .. فكان الحل انو تساعد باقي الناس يساعدو حالون يوعو اكتر لحجم المشكلة و قوتهم وقوة صوتهم وتأثيرهم ، و يوعو اكتر لإنو نمط الحياة الي هني فيه ماهوي قضاء وقدر وانما هوي ما أثمت ايدي اجدادهم من تخازل ما .. او انهزامية ما .. لمن بلش الفساد وسكت جدي وجدك انتشر الفساد مش لإنو احنا مجتمع فاسد ابدا .. وانما لإنو ما لقا مين يردعو .. ولمن بلشت النزعات الإصولية بالأديان على دور جدي وجدك وما لقو مين يوعيهم انو الحياة مش هيك ، الحياة ليست بالموت ، فتفاقمت ازمتهم وصارو كتار وصارو يبشرو بحالهم .. لإنو ما حدى حطلهم حد ..
وهذا الحال اليوم .. اذا المشاكل الي بين ايدينا ما بنحطلها حد بإيدنا .. فاولا رح نعيش من سيئ لأسوء وثانيا رح نورث لأبنائنا ما نعتب على اجدادنا انهم ورثونا اياه من حال متردي .. (واصدي بإنو نحطلها حد بنوب ما هوي تحمل بارودي ، ولا تنزل مظاهرة .. اصديى على الحد البسيط .. على تعامل الآخر على انتخابات ، على رشوي ما تدفعها بمطرح .. على اسعار عم ترتفع والناس عم تضرب عن الشراء للمواد المرتفعة السعر فوق الطبيعي .. عن مقاطعة سلمية للبضائع الإحتكاريي بالسوق .. بس هيك .. اشياء كتير بسيطة ..)
الحديث ذو شجون فخلينا نوقف هون افضل ...
2_ أخي حسام و أرجو ما تعتبر سؤالي هدا عبارة عن نقاش في وجهة نظرك يلي كتبتها بأحد الردود لأنو السؤال كنت ناوي أسئله قبل لشوف إجابتك .. سؤالي هل تعتقد أنو الصراع بين سوريا و الكيان الصهيوني يتعلق أساساً بالجولان أم أن الجولان لا تمثل في المعادلة سوى " قميص عثمان " و أن الصراع مع الكيان الصهيوني بالأساس هو صراع وجود .. بمعنى هل تعتقد أنو الكيان الصهيوني من الممكن أن يقبل بقيام دولة " ديمقراطية " منتعشة إقتصادياً قرارها السياسي مستقل .. تولي إهتمام بالغ بالعلم و الأبحاث و التكنلوجيا و التطور على حدود الشمالية ؟
حلو.. رح اجي معك من الآخر، خلينا نعتبر ان الصراع بالفعل ليس حول الجولان .. (مع اني ابدا ابدا لا أومن بنظريات المؤامرة ..) طيب معناها المشكلة بالنسبة لإسرائيل هيي وجود دولة ديمقراطية منتعشة على حدودها ..
طيب شو الحل .. هل الحل نقول خلص بطلنا ديمقراطية؟؟ هل الحل نقول طيب ماهو اسرائيل ما بتخلينا نعمل انتعاش اقتصادي .. اعزرونا على الوضع المتردي؟؟؟ هل هذا بحل .. لاء اكيد لاء
منرجع للحلول.. احنا (سوريا) جربنا الحل تبع "الممانعة" والصمود ، والنضال، و تارة كنا محور الشر، واخرى محور الدول المارقة .. جربنا على مدى 40 سنة من هذه الحلول حتى انقطاع النفس.. وحتى انقطع النفس بالفعل .......
الي عم نقولو اليوم ، انو اخي احنا جربنا الحلول النطاحية .. و ما حدى ما حدى قدنا جربها ، معلش.. ما حدى بالعرب كلهم مارس بالنضال العروبي والممانعة والصمود وما اليه مما يستحدثون من اصطلاحات قدنا .. و النتائج اليوم بعد 40 سنة بهال الخط سلبيي .. يعني بعد ال 40 سنة ما حصلنا شي .. لا حصلنا الجولان .. ولا حصلنا انتعاش بالبلد ، ولا حصلنا نظام ديمقراطي فيه تعددية وحريات .. ولا حصلنا وضع اقتصادي منيح .. ما حصلنا اي شي.... ما حصلنا غير حصار دولي ، مقاطعة من كل الدول لينا ، كره و حقد و ضغينة .. تارة من اللبنانيين ولبنان ، وتارة مع العراقيين والعراق، وتارة مع السعودية .. وتارة وتارة وتارة ..
كل الي عم نقولو ان هذا الإسلوب ختمناه وما نفع ، ليش ما منجرب اسلوب تاني .؟؟؟ فقط هيك .. ماهوي في استراتيجيتين ، يا المناطحة يا المحابات..
جربنا المناطحة على طريقة كوريداااااا الإسبانيي.. 40 سنة ( صح) ..
خلونا نجرب المحابات .. ل 4 سنين بس .. بس .. خلونا نجرب اسلوب آخر .. معقول طيب نضل الى الأبد عم نجرب بإسلوب قلنا 4 عقود عم نلوص فيه وما نفع .. ونضل عم نجرب فيه للأبد ؟؟؟؟؟
وبعدين .. !!!
3_ بيحزنك غياب عضو عندك بأخوية أو إنقطاعه من الناس يلي بتعتبرها أعمدة أخوية .. كريم مفتقده ! يمكن قبل لتجاوب في شغلة مهمة المفروض نتفق عليها .. بتؤمن بشي إسمه أعمدة أخوية ولا نظرتك للجميع متساوية و الكل هون بيمثل عمود بهدا الصرح في الشي يلي بيبدع فيه ؟
بالنسبة للجزء الأول ما عندي رغبة احكي عنه..
بالنسبة للجزء الثاني .. احنا منقول انه في ما يسمى ب "أدبيات اخوية" الي هيي الخبرة التراكمية لهال المجموعة مع بعض ، متبلورة بما اسهم بيه فريق العمل في تطوير و تعزيز هال الفلسفة اذا بدك تسميها هيك ، او هال النهج ككل بكل ايجابياته وهفواته .. في افراد كان ليهم دور اكبر من غير افراد .. وهذا امر طبيعي ..
فعن الإصطلاح اعمدة اخوية ، انا بشوف انو بيصح الإصطلاح و بأيده اذا كنا عم نحكي عن اعمدة بالعشرات (من اعضاء و مشرفين و غيرهم).. بس لو عم نحكي عن عامودين تلاتي .. فما حدى من الي عم ينوصفو بهذا بيرضى هال الشيئ.. لا كريم بيرضى يكون عماد من ثلاث او اربع او اثنين .. بعدم وجوده قد يتداعى البنيان .. ولا انا برضى كون بهيك موقع او مكان بأي وقت .. ولا اي من الأمناء الحاليين والسابقين ..
و منعتقد بالمقولة تبع "مش مهم مين الي عم يرفع الراية بقدر ما هو مهم ان تبقى مرفوعة" هذا هدفنا كلنا الأول ..
طبعا غياب كريم ترك فجوة واسعة .. واولا ثم اولا بقلوبنا .. قبل اخوية وقبل المنبر وقبل المشروع كلو ..
الله يردو سالم بالقريب العاجل..
4_ شو أكتر كتاب قرأته أثر فيك .. آخر كتاب قرأته .. كتاب شدك عنوانه أو إسم الكاتب و لقيته ليس بالمستوى اللي كنت متخيله .. في كاتب معين بتحب تقرأ إله أو بتابعه .. مصادر ثقافة حسام على شو مرتكزة بالأساس ؟
عن اكتر كتاب اثر فيي ، هوي مافي كتاب معين .. (بكل حقبة صغيرة 8شهور لسني ) في كتاب او مقال ما او حدث على هال الصعيد بيكون ليه اليد العليا.. او بيستحوذ من التفكير اكتر من غيرو ..
عن كتاب انغشيت فيه هوي كمان بالكتب او (عامة بأي شيئ بدي استثمر فيه وقت ما سواء كتاب او فلم بدي احضرو او مهمة معينة او هيك) بعمل دراسة قبل .. يعني بالأفلام قبل ما احضر فلم لازم اتأكد من موقع IMDb عن مستواه والمراجعات ليه بالإنترنت ، بالكتب لازم يكون مرشحه حدى إلى او بقائمة Best seller لمراجع بعتقد بصدقيتها .. (طبعا بالنمط الي بقرا فيه ) .. وهيك اصدي ما كتير بنغش بالكتب لإني بقراها بعد بحث عنها او بترشيح و مراجعات قريها عنها .. (صعب صار الواحد يغامر بموضوع الوقت، صعب تخصص وقت ما لإسبوع لتقرا كتاب ويطع بعدين فافوش.. انا اصدي كل الكتب مهمة ، وكل الكتب فيها كم من الإفادة حتى الكتب الي بتنباع على الأرصفة بس الي عم قولو انو بدو يكون كم الإفادة منها يوازي لكم الوقت المصروف على قرائتها .. بواقع زحمة الحياة الحالية ) .. بس على العموم آخر كتاب انخدعت فيه _نتيجة تسرع_ كان The Great War For Civilization _الحرب العظمى لأجل الحضارة او لأجل المدنيي_ هوي لروبرت فيسك ، جورناليست بريطاني مهم .. بيكتب بال independent و ال sunday times _اذا ما خانتني الذاكرة_.. هوي كصحفي انو منيح كتير و مهني جدا ، بس عنو شوي كم استشراقي زيادي حبتين ، يعني متل ما تقول من النمط الي بيعتقد انو العرب مافي احسن منون بالكون ، بس لو بيتركوهم من المؤامة الكبرة بس لو بيبطل الغرب يتآمر عليهم ويكسر مقاديفون شوف شقدون مناح .. بس الغرب هوي الحق عليه .. _اصدي هوي هيك نظرتو بشكل عام_ بس كان الكتاب آخد بيست سيلر بمكتبة مرموقة بالقاهرة ، و غامرنا وقريناه (1500 صفحة  فصفقة خاسرة طلعت) .. يعني حتى العنوان صاير متل سخرية مش واقع ، اصدي بتعتقد انو هوي بدو يحكيك عن النبض العالمي العام لهال الحرب غير المعلنة لأجل المدنية والحضارة الي بكل بقعة من الكون بكل المجالات صارت قائمة من السينما للمال والأعمال للسياسة للتعليم .. بتلاقي انو لاء هوي عم يسخر من المفهوم هذا ، وحت ىالعنوان صاير متل سخرية من هالشيئ .. (طبعا انا ما عم قول انو الكتاب مش منيح هوي كمرجع مهني لرؤية عن كثب للأحداث ميدانيا بيعطيك صورة كتير حقيقية عن شو عم بيصر على أرض الواقع كان بالمناطق الصراعات بالحقبة الأخيرة 20-30 سنة الي كان عم بيغطيها كصحفي ميداني .. عموما بدون حكي اكتر (كتاب منيح ليلي بآمنو بالمستشرقين، و بيتسمتع فيه جدا الي بيعتقد بنظرية المؤامرة وشقد العرب ناس فظيعين لو بينتركو لحالهم ) بس انا ما كتير بعتقد بهال المفاهيم . _وخاصة المؤوامرات هاي.._
آخر كتاب قريتو بيضحك .. اسمو Powerful Sleep .. عن النوم و الأرق وكيف تقدر تنام متل الخلق وهيك مسائل، _بحيث عندي شوية مشاكل مع النوم دائما ، و ارق مزعز وهيك شغلات .._
اما عن كاتب فأيضا مافي كاتب بعينه متابع ليه ، الي متابع ليه اكتر هوي مجموعات معينة، سواء صحف او اماكن خاصة .. يعني عندك newsweek مجلة مهمة والكتاب الي فيها بشكل عام جدا مناح ، في عندك بال New York Times بال op-ed العامود الموازي في كتاب مهمين كتير كتير .. او اذا صح التعبير منظرين تخااان و محللين مهمين جدا ... وهيك يعني ..
بس بيفضلا طبعا في كتاب ما ممكن يعفسو صعب يعكو ... ومافيك تتجاهلهم حرف انحط .. شخص متل بوب ودورد ما ممكن ينزلو كتاب فيه عكك او تعفيس .. شخص متل توماس فريدمان ما فيك تتجاهلو كتاب او مقال حتى ..
(طبعا انا عم بحكي عن جانب ضيق من القراءة الي هوي المجال الإجتماعي السياسي.. والحديث يطول لو بدنا نمر ابعد من هيك على غير جوانب ..)
اخيرا عن مصادر الثقافة .. (الثقافة بمعنى المعلومات فهيي اكيد G .. جوجل احسن مرجع .. ) بس اذا ثقافة اصدك من نوع تكوين الراي وبلورة الفكر .. فبعتقد هيي بتعود مش للقراءة وانما هي للإستقراء.. (ما بعرف كيف اشرح هاي ؟؟) او كيف هوي شغلة تبع التفكير منيح بس الأهم والأحسن اعادة التفكير بالأفكار، او كيف تترك الأفكار حتى ما بلورته منها على الطاولة دائما، بمعنى ما تثب شيئ، لازم بكل وقت يفضل كل شيئ من افكراك من رواك مطروح و موجود على الطاولة ، مافي جزء مُثبت ببينس او بسمار، وهذا خط احمر، بدو على الصعيد الفكري الواحد يضل تارك فسحة للتفكير وفسحة اكبر لإعادة التفكير بالأفكار و ما كان قد ثبته منها ، او بلوره منها و اعتقد انو هاي خلص صارت قناعة ثابتة ما بدو يمر نيحها .. عموما صعب اشرح اكتر ما بعرف كيف بدي وضح بس هيي هيك الإستقراء و إعادة التفكير بالأفكار و تعويد العقل على النظر من الزاوية المعاكسة، يعني عارف اذا _العفو_ ضربتك كف رح اوتوماتيك تضربني كف .. (وهيك الفكر متعود على ردة فعل طبيعية .. العقل بيقوم بالتحليل وفق منظومة متعود عليها بحكم المجتمع الثقافة الزهنية الخ..)
هلق لو ضربتك كف و انت كنت سلفا مجهز حالك انو بدك تعد للعشرة و تفكر وبعدين تضربني كف، باول مرة بتاني مرة بتواجه صعوبة ، بعد شوي بتلاقي حالك لمن عم تاكل كف ما عم بترد بكف وانما عم بترد بطريقة اخرى قد تكون اكثر ايلاما وانجع هدفا ..
وهيك بالفكر، احنا متعودين ننظر من نفس المنظار من نفس الزاوية دائما ، لمن الواحد بيدرب عقلو لينظر من الزاوية المضادة المخالفة .. او الأخرى .. بياخد مشهد اشمل بكتيييير.. (فهو بسهولةبيقدر ينظر من الزاوية التقليدية، بس لمن يخلي النظرة الأولى تكون من الزاوية غير التقليدية، ويلحقها بنظرة من الزاوية التقليدية الرويتينية الي متعودين الكل ينظرو منها ) بيتفاجئ بمشهد مختلف تماما ، و بيحصل على نتائج بتفاجئه هو اول شي .. وجدا .. و مع الممارسة بيتعود العقل ينظر بهال الإسلوب (متل موضوع الكف وردة الفعل الطبيعية) ، فبتلاقي شوي شوي صار في افق جديدة عم تتفتح .. هوي ما عمل شيئ اكتر من انو درب عقلو للنظر من عدة زوايا كردة فعل .. بدل الزاوية الواحدة الي كان العقل متعود ينظر منها ..
ما بعرف بيجوز حكيي كلو ما مفهوم بشي ولا قدر وضح شي بس اي كان .. هذا الي بهال الوقت القصير طلع معي ..
بتمنى ما تكون أسئلتي تقيلة عليك
تحياتي و إحترامي لك أخ حسام و أمنياتي إلك بدوام التقدم و النجاح ..
شكرا الك كمان
العين الي قاومت المخرز امبارح .. وبعدها عم بتقاومو لليوم .. بكرا بدها تقلعو !
|