sadooka
1- شو بتحس باللحظة يللي بتصلك فيها خبرية تهكير المنتدى ... وشو بتعتقد الأسباب يللي بتدفع هالأشخاص لمتل هيك عمل تخريبي .... وبصراحة ... في شي مرة تهكر فيها المنتدى وقلت لحالك ما رح ارجع افتحو وبلا وجعة هالراس
انو بتدايق و كتير كتير .. الهدم دائما اسهل من البناء.. مش اسهل ، وانا اسهل بكتيييييييييير .. اما الأسباب والدوافع ، فبعذرهم انا .. يعني كل مين ليه اسلوبه بالتعبير، هوي كشخص مكبوت بالمجتمع ، ما عم بيلاقي متنفس يعبر عن حاله ، يقول فكره ، يصرح عن مكنونات نفسه ، فبيلجئ لهال الأساليب .. ليسمع الناس صوته ، متله متل الي بيعمل تفجير بمبنى ، او بيعمل عملية انتحارية .. هوي ما هدفو يموت هدول العائلة او هال كام شخص، هدفو كان يسمع صوتو ، يعبر عن فكرو ، يقول رأيو .. بس نتيجة الكبت الإجتماعي وكبت الحرياة .. ما عم بيلاقي منصة يحكي فيها ن يعبر فيها عن مكنونات نفسه غير بهذا .. فمعذورين .. اصدي انا بفهمهم .. و بفهم دوافعهم .. بس اكيد ما ابررلهم وبأكد انو هذا ما بيبرر تصرفاتهم ..
اما عن انو ما نرجع نفتح .. اي بالفعل بالإختراق الأخير بفترة الشهر الأول من السنة فكرت بالفعل انو خلص .. في احتمال ما عاد نفتح .. لإنو بوقتها كان انحزفت كلشي كلشي .. وماكانفي نسخ احتياطية وما كان في شيئ.. كانت العودة تعني العودة من الصفر، وفتح المنتدى من الصفر، بدون مشاركات بدون اعضاء، بتاريخ مغيّب .. بإرث جماعي محزوف ...... .. فكان شغلة لا تطاق .. وخاصة ان هالعمل هون مانو ملك لحدى ، لو موقع شخصي لو ملكية فردية بتتحكم فيها على راحتك وعلى هواك .. بس المشاركات والعمل بأخوية ، والتفاعل تبع الأعضاء ، وهال الخط الطويل ، هوي عهدة بزمتي .. ما بيحقلك اتصرف فيها ..!!
كان الموضوع صعب كتير ومؤلم جدا .. بس نشكر الله اتجاوزناه ..
2- كيف بتشوف أخوية اليوم مقارنة مع أخيوية في بدايتها ... (يعني لما كنتو شلة وحدة) (لما كان اسمو أخوية سيدة السلام حسب معلوماتي)
جاوبت على هذا السؤوال من احد آخر ..
3- كونك مدير منتدى ... والأعضاء كلون بيشحدو (ما لقيت غير هالتعبير) منك شي رد على مواضيعون والكل وبدون استثناء بيعتبروك قدوة وانسان مثقف على مستوى ... بتشعر بالسعادة ؟؟ بالغرور ؟؟ بالثقة بالنفس ؟؟ ... أو ما بتشعر بشي؟؟
بشعر بحمل كبير كتير .. بشعر عم بيحطوني بغير مكاني .. (لا بدي قول اعلى و لا اخفض) بس بغير مطرحي ..
بشعر بالمسؤولية اكتر ، اصدي كل ما زاد ثقة الناس فيك او تعويلهم عليك (اذا بدك) فبتحس بحمل اكبر، و مسؤولية اكبر تجاههم وتجاه نفسك وتجاه المشروع ككل ...
اما الغرور .. (فبزعمي وادعائي ) بعتقد اني بعدي جدا عن هذا ، بعيد كل البعد .. الحقيقة انو كل ما الشخص عرف اكتر بيحس بالفعل شقد هوي صغير ببحر المعرفة ، وكل ما اتعلم اكتر بيحس شقد هوي ولا شي ببحر العلوم ، وكل ما شاف اكتر بيكتشف انه لسا في اكتر بكتير .. وكل ما اكتشف اكتر بيدرك انو ياااااه شقد فيه اشياء بالحياة نحنا ولا شي امامها ..
وكل مرة كل مرة بتروح على Google ُEarth وبتشوف الكوكب الأرض، (الي حبة رمل بهال المجرة ما بيجي حبة رمل .. ) ، وبتقعد بتعمل زوم زوم زوم زوم زوم .. لتلاقي مطرحك على هال الخريطة .. بتعرف شقد احنا صغااااار.. وشقد الكون شاسع ، وشقد النسبة متباينة ، وشقد الحياة ممكن تكون حلوي لمن توصل لهال المعرفة .. شقد حلو تعرف انك كتير صغير ، لدرجة الولا شي .. لدرجة انك اذا ما التفتت لنفسك ، ما حدى رح يلتفتلك .. ولمن اتدوق لزة صغرك ، بهال الإبتسامة تبع (ياخخخ شقدني ولا شي) .. ما عاد بيغريك لزة اخرى ..
اخيرا بهذا ، بدي قول الغرور او ما اليه ما لو علاقة بالثقة بالنفس بشيئ .. او انا بقول (عن نفسي) هيي بيجوز معرفة نفس ما او اكتر للدقة هيي موضوع رضا مااا ، عن النفس..
بالنسبة ألي هذا خط مختلف عن اخوية وعن العمل عامة وعن علاقاتي ككل ، اصدي تلحفي بعبائة من الرضى عن النفس قد لا ينفذ منهى شيئ .. هوي ما نتيجة انعكاس لتقييم الآخر لإلي او اي شيئ من الخارج، هوي شوي نابع من مصالحة ما (جزئية جدا ، وما حدى بيقدر يكون _برأيي_ متصالح مع نفسو تماما ، وانما لا بد يتصالح الشخص مع نفسو مع زاتو كما هوي بقدر طاقته ، وبفضل هذا الخط _المصالحة مع الذات_ خط دائم ) بس طبعا الواحد لازم دائما ينزع عبائة الرضى عن النفس (مهما كان نوعها) هاي .. من حين للآخر تيقدر يهوي الأجواء 
او الي هيي يعني ليقدر يحس بتأنيب ضمير محفز للعمل ليحس بعجز ما ، بيحتاج ليشتغل اكتر ليلبيه ويغطيه وهيك ..
اوف .. مدري شقد الي صار عم بكتب ..
4- لما بتسمع موال أنا مسافر يا أمي (لجورج وسوف) بشو بتحس (انشالله ما أنبخع وتطلع ما بتعرف الموال)
ولا شي .. (مرة بزمانو اول مرة بسافر سفرة بعيدة سمعتو واتأثرت فيه شوي بس بعدها ما حصل)..
5- بفضل التطور بكل أشكاله ... أم العودة الى البساطة في الحياة ؟؟
اوف .. سؤوال بالصميم .. و عني هال الجدلية بتنهض من فترة لأخرى برأسيي ..
البساطة حلوي كتير ، بس التطور لا مهرب منه .. (هذا بالمنطق وهذا بالإمعرفة ولاستنتاج بتلاقيه)
بس بيخطرلي دائما انو هل يا ترى في وقت ما رح يوصل الواحد فيه لمرحلة من تداعيات و انعكاسات سلبية بالتطور تضطره يتخلي عنه تماما .. تضطره ينعزل بالبساطة عنه ..
(ع فكرة هاي الجدلية المطروحة بفلم The Village الي قلت انو من اكتر الأفلام الي مهمين شفتون )
من 4 اشهر اغلقت موبايلي تماما ، وهلق بدون موبايل.. و مرتاح جداااا
من اشهر ايضا سكرت تلفون البيت وحطيت على التلفون الآخر انسر مشين ، ما بجاوب عليه برد على الأنسر مشين لمن بيكون في وقت .. و كثير من الأمور التكنولوجية او المواكبة للتطور اخرى صرت عم حس انها صارت عبئ عليي.. و عم بتخلي عنها ..
انا بيجوز متأكد اني ما رح بتخلي تماما بأي وقت عن ما هو تحت مصطلح تقدم و تكنولوجيا، بس عم حاول قوض مساعيه للتطفل عليي قوض مساعيه بفرض نفسه بتفاصيل حياتي ، عم حاول بحسب طاقتي و قدرتي اني حافظ على حالي ببساطة ما .. ضمن الزحمة هاي..
6- بتخاف شي لما بتفكر بمصيرك بعد الموت ؟؟ ... مين خلق ألله (في حال كنت مؤمن بشي اسمو ألله)
ابدا .. ما بخاف من الموت ، ولا بخاف مما بعد الموت .. بعتقد اني عم عيش بالحياة سعادة بتكفيني في حال ما كان في شيئ بعد الموت، و بإسلوب حياة مرضي لجميع الأطراف في حال كان في شيئ بعد الموت .. (فإنو بالنهاي الأرض جنتنا الأولى ، اذا مافي جنة آخرى ، فإحنا عشنا بالجنة و خلص .. اذا في جنة آخرى ، فعااااال .. مين احسن منّا زبائن بالجنة الآخرى ؟؟) 
7- لحد الآن ... قدرت تعرف مين انت ... قدرت تعرف انت ليش موجود عالأرض وليش عايش وليش انخلقت ... قدرت تعرف الهدف الأسمى يللي بتسعى لتحقيقو بهالكام سنة يللي رح تعيشون ؟؟ (بتمنالك طول العمر)
بالمجمل لاء .. بس قطعت اشواط كتير مهمة ، وكتير منيحة و واسعة (مرضية بالنسبة الي) بهال المجال ، بمجال معرفة النفس ومجال معرفة الحكمة المطلقة في صيرورتي _كفرد_ على ما انا عليه ..
العين الي قاومت المخرز امبارح .. وبعدها عم بتقاومو لليوم .. بكرا بدها تقلعو !