الله يرحم ايام زمان بحضي كانت رحمة
اللي ما كانت تتمرجل علينا باكتر من اعلان عن :
مطلوبين؟تلاتة؟ادعش؟ ، 189 مطلوب ، هي كحدا اقصى ممكن ( الإعلان عنو )
عنجد الله يرحم هديك الايام، والله يرحمنا نحنا اللي متنا ونحنا عايشين من زمـاااااااان
اليوم وحسب مصدر موثوق تم القاء القبض عالوطن
.
.
انتهت ايام التفرقة ورجع كل شي يشتغل بالجملة
لك السجن , النفي .... بالجملة لك حتى الموت صار بالجملة
انو تلقط الوطن كاملا ( بالجملة ) يعني تسكرت هالفضائيات
ورتاحو المزيعين والمزيعات
المطابع والجرايد رتاحت من نشر صور المطلوبين
انو تلقط الوطن كامل ، يعني انو ريحت راسي من استقبال كم رسالة من نمط
صاحبك الفلاني عفطوه
الاخ اللي صرلو فوق ال 26 سنة بين حيطان هالسجون اليوم وبصدر مشروح بيستقبل ابنو الكبير كـــ شريك غرفة Room Mate
تم عفط حوالي 12 مطلوب مبارح وما زال العفط جاري...
خبر عاجل: القبض على كزا مواطن
ابو فلان عميحتفل لبنتو الفلانية بزواجها ..... ضمن صالة سجن الوطن .. للأتراح .... جنة الاطفال زنزاناتهم
مواطن ومرتو وولادو التسعة بيعترفو بانتمائهن لتنظيم الفوضى ، والجهات المعنية بتشجع ما تبقى من شعب هالوطن يحتذو بهالمواطنين الصالحين
خبر عاجل : تبقى في الوطن ما دون ثلث المواطنين .....
احصائية عابرة : 70 بالمية من هالوطن مئرئعين بالسجون ...
.
اليوم وضمن حالة من الفوضى والضجة والفرحة العامرة ، وال ..مابعرف شو كمان ، وصلتني هالكم مسج:
مبروك عليك حريتك .... اخوك من الزنزانة المجاورة
انا بالزنزانة رقم 38 بمعيتك كروز طويلة وقداحة
عرض خاص بمناسبة الصيف : عجلو بحجز زنزانات مطلة عالوطن
يوجد لدينا زنزانات للعائلات، الزنزانة مكيفة، ودورتين مياه ، +ميزة اضافية : واجهة وطنية
عزيزي المشترك في السجن الوطني : طلعت فاتورتك الحالية بمبلغ: 43265 ليرة ، يرجى المبادرة بالتسديد قبل اي تصرفات غير محمودة عقباها ، مع تحيات ادارة السجن الوطني .... يدا بيد نحو مستقبل افضل اهلا وسهلا بكم في وطنكم الثاني ، أينما كنتم ، نحن في الخدمة عزيزي المعتقل ، مع تحيات شركة سجن تيل
عرض خاص والكمية محدودة: زنزانة افرادية مع اشتراك مجاني بازاعة صوت الشباب ...لمدة سنة
.
هلئ .. حلها بقا تهدا المسجات عندي، برأيي الشخصي ، أنا ، وباقي ما تبقى من هالمواطنين
خبر عاجل جدا :::
الجزيرة تسكر الاستوديو شيتها واكتفت برسالة وحدة بتعرض 24/24 مدى الحياة ((( عاجل : تم اخيرا القاء القبض على المدعو الوطن ))
بالنسبة للعربية ميسون عزام بتقدملنا حلقة جديدة من برنامجها ( شو ضل بهالوطن )
وجيزيل خوري بتمتعنا بحلقة مثيرة من برنامج : من قلب الحدث ( زنزاناتكم.. )
ونيرفانا ادريس بتحاور مدري مين عبر برنامجها السجن سجنك!!!
..
انا هلئ عمدور عشي موقف لسيارتي بهالسجن الكبير
ابي ناطرني جوا ... امي .!!!
المواقف كلها غير شاغرة ، كل مواطن عندو سيارتو والي اهم من هيك .... ((((( هويتو الشخصية ))))
واليوم اصبح عندي زنزانة يعني شو ضل وما حصلت عليه ... ولا شي
حامل مسرحية ( الحضيض ) لغوركي وعماركد وانا عمالهت
لاحجز دور عالزنزانة ، قبل ما تتسكر بواب السجن بوجهي او ( تنفد الكمية ) وضل لحالي بهالوطن
عنجد شغلة مأساوية انك تضل وحيد بهالوطن
وحيد !!!بدون مخبرين ولا كتيبة تقارير بدون مطلوبين بدون رجال امن هالدولة ، بدون اصدقاء معدومين...!!!!
وقتها بتكتشف فوايد البكاء عالراحلين
ولا احباب تحت امر محجوبين وقتها بتتعلم منيح فن الشوق ومشقات الحب
او اشخاص منفيين ، لتعرف وقتها كيف بتكون الرسائل الجاية بأنينة عسطح المي الها جماليتها
او مشنوقين ، لتعرف معنى العلو بالحياة والممات!
..
بالفعل السجن نعمة
ما بيقدرها الا الرائعون، الفاهمون ، العارفون لأي وطن هم ينتمون
.
..
الفرح يسيطر على الشعب ويكتسحه ...
المواطنون او المسجونون بمعنى اوضح، يرفعون ايات الدعاء : انو يدوم الامن والامان عزنزاناتهم
ويمد هالقضبان بالعمر المديد
ويصبرهن على الصدأ والرطوبة
ودمتم بود
