اقتباس:
كاتب النص الأصلي : VivaSyria
أخي أنا ماعم قلك الدنيا مصاري.. بالعكس انا عم قلك حددلي شو الدنيا برأيك؟؟ يعني عطيني أي شي بيشتركو فيه البشر بنفس المقدار وفيه عدالة لقلك هاد مقياس العدالة الإلهية وبرافو عليك قنعتني..
اذا لا بالمال متساويين ولابالصحة متساويين ولابالجمال متساويين.. قد استوعب مثلاً ان كل منهم ينقصه شيئ ويوازنه بالآخر أما أن يكون بعضهم يملك كل شيئ مماسبق والآخر لايملك حتى النذر اليسير من أي شيئ فهاذا ما أطالب بتفسيره...
انت بتقول انو في عدل إلهي أنا بقلك قارن سكان بيفرلي هيلز بسكان العشوائيات بمصر وقلي وين العدل؟؟ قارن أنجيلينا جولي بأحد الأطفال الذين يخلقون بمرض مميت لأبويين فقيرين وقلي وين العدل؟؟
عطيني مقياس واحد للعدالة بين البشر غير قصة الجنة والنار مشان مانرجع لموضوع "البقبيق"... أنا هون محمد وعلى غير كل حواراتنا عم إسألك من كل قلبي... هل إنت مقتنع بالعدالة الإلهية وإلا بتجيير الموضوع للآخرة والجنة والنار لأقتناعك أن مايحصل في هذا الكوكب هو الظلم بعينه؟؟
هل تلجئ لتمنية النفس بالآخرة لعلمك أنه لايوجد نقطة واحدة يشترك فيها البشر بعدالة على هذه الأرض؟؟ الجمال؟؟ المال؟؟ الصحة؟؟ الأطفال؟؟ الحروب؟؟ الكوارث؟؟ أي عدالة هذه؟؟ بالعكس ألا تلاحظ أن من يملك شيئاً أنه من النادر أن تجد كياناً يتمتع بواحدة منها فقط.. بل لاحظ أنها عندما يتوفر الجمال مثلاً يتوفر معه المال والدلال وماشابه أو قد يكون العكس يعني بأي شكل تشاهد أن الظلم يتسع جداً وحتى هذه العوامل لاتتوزع على مخلوقات الله..
حتى على صعيد الدول.. شاهد الدول الفقيرة والتي فيها مجاعة.. يبتليها الله أيضاَ بالحروب "ساعتبره ابتلاء مجازاً" وانتقل بالنظرة الى الدول الغنية.. وشاهد ديموقراطيتها ورفاهيتها.. لك حتى شعبها حلو يازلمة.. صدق شي غريب..
بتلاقي واحد فقير ومريض وفوق البلا بيخلقو ولاده مرضى ومامعو جق علاجون... جير القصة على الجنة والنار لأنو ماعندك حل تاني  |
وانا رح بادلك النقاش من القلب هون " لو كنت بتخدعني حسابك عند الله بالاخرة "
بيخدعك او بيخدع حاله اللي يقلك ان كل نصيبك او اللي تستحقو رح تاخدو بالدنيا ايا كان دينو او مفهومه حول الاله ورح ارجع لهالنقطة فيما بعد .
بتسالني عن العدل الالهي ؟! وكتبتلك في صعوبة علينا كبشر اننا نفهمو ببساطة رح قلك ، افرض ان في اله للكون و نحنا بنحكي عن عدله ، مفهوم العدل الالهي هاد مو متل مفهوم العدل البشري ، الطبيعي ان المفاهيم البشرية رح تكون بمرتبة اقل من مرتبة المفاهيم الالهية لان مافي تساوي بين البشر والالهة بالفكر او القدرات (والا كان البشر الهة ) قلتلك اذا كنا نحن البشر مختلفين حول مفهوم العدل البشري من دولة لدولة ومن حقبة تاريخية لحقبة تاريخية اخرى على نفس الدولة وبين شريعة لشريعة وهكذا ، صعب الادراك ، افهمني .
مافيني اجبلك مقياس العدل الالهي ، 100 نقطة صحة و100 نقطة ذكاء و100 نقطة مال و100 نقطة جمال و100 نقطة علم والبشر كلون متساويين نصيبون 400 نقطة من اجمالي ال600 موزعين على هالشغلات (كيف رح جبلك متل هالمقياس !!)ما انا إلا بشر مثلك ، لا افوقك بقدرات اضافية عن قدرات البشر العقلية لحتى اجبلك هالمقياس ، مافيني الا اني اقدملك وجهة نظر مختلفة عن وجهة نظرك او اقدملك فكرة ما خطرت عبالك )
اذا بتقبل هيك انا معك واذا مابتقبل ، بقلك مافي عندي قدرات تفوق قدراتك البشرية ، انا بس بقدم فكرة توزيع الرزق في عدة صور ، منها المال ومنها الابناء ومنها الزوجة ومنها الصحة ومنها العلم وهكذا (اما عن المقياس الالهي للعدل فهاد يفوق قدرات عقلي البشري) ولاحظ اني بطرح الفكرة معتقدا صوابها ولست جازما .
انت بتقول البشر لا بالمال متساوين ولا بالصحة ولا بالجمال ولا بالاولاد ولا بالعلم ولا ولا ولا ...
أحسنت هاد اللي كنت بحاول اوصلو بفكرتي ،
سكان بيفرلي هيلز عندون مال وعلم واذا في حدا بيجيب اطفال بيكون طفل او 2 لكل اسرة
سكان العشوائيات عندون صحة وعندون ذكاء واذا حدا عندو اطفال بيكون 4 و5 و 6 وانت طالع
واذا سنحت لك الظروف تروح عشة اوبيت واحد من سكان العشوائيات، اخر اليوم رح تلاقيه قاعد يضحك ويتسامر مع مرتو واولادو وقد لا تجد نفس الشيئ ببيفرلي هيلز .
كنت حطيت الك جملة بالبداية حان وقت الرجوع الها .
بيخدعك او بيخدع حاله اللي يقلك ان كل نصيبك او اللي تستحقو رح تاخدو بالدنيا اي كان دينو او مفهومه حول الاله ورح ارجع لهالنقطة فيما بعد .
ما الدنيا الا دار اختبار مهما طال عمرك بالدنيا فهو نقطة ببحر عمرك بالجنة .
انت بدك تاخد كل شيئ هون ، وامثالك بيعرفو ان جنتهم في الدنيا وعلى الارض لذلك انا متفهم طبيعة موقفك ، انت بدك نبعد الجنة والنار عن الحديث وبنفس الوقت جاي تناقش عن الله وجايب اية من أحد كتبه ، مافينا نفصّل حالة نقاشية على رغبتنا باستبعاد عوامل والابقاء على اخرى وبالنهاية بدنا نقول هاد نقاش كامل ونتائجه دقيقة صحيحة .
لاء مش صحيح ، انا اتفهم نقاش الملحد لما يقلي لو سمحت استبعد الغيبيات انما يجي يقلي لو سمحت استبعد الجنة والنار ويجي يقلي نتناقش بقا ونكمل عن الله !! هي ماصارت من ملحد لانو بالنسبة الو الجنة والنار متل الله ، بس القصد ان يا ابو شريك كلها حلقة واحدة غير قابلة للفصل .
انا ما كان بدي ناقش من الاصل لانك لازلت بعيد عن الدعوى القضائية بصراحة انا مستغرب من ردك والنقاط النقاشية اللي بتوردها ، بتحطني بمازق اذا ظليت اتركها وما اناقشك رح الاقي حالي برا الموضوع متفرج .
- بتحكيلي عن الكوارث والحروب والمصايب اللي بالارض ، يعني انت مابتعرف اسبابها ؟
الحروب اسبابها طمع البشر وجشعهم وحب السيطرة
بتحكيلي عن الكوارث الطبيعية والانسان هو المسئول الاول عنها !!
مين اللي لوث الجو والزرع والمياه ؟ اتسبب في مرض ملايين البشربهالتلوث
مين اللي رفع وبيرفع درجة حرارة الارض ورح يتسبب بارتفاع منسوب المياه على الكوكب ورح يغرق ملايين البشر ؟
مين اللي اخترع القنبلة النووية ؟ مين القاها على هيروشيما ونجازاكي ؟ مين المسئول عن قتل عشرات الاف من الارمن ؟ ومين المسئول عن قتل المسلمين بالقدس ايام الحملات الصليبية ومين مسئول عن محاكم التفتيش ؟ مين مسئول عن ضحايا برجين التجارة ومين مسئول عن ضحايا غزة ؟ الجواب واحد "الانسان"مش الله
الانسان عمل العديد من الاختلالات الكونية ورح يعمل لسى اكتر .
في معرض حديثك استوقفتني مقارنة بين الدول الفقيرة والدول الغنية
اتغزلت بدموقراطيتها ورفاهيتها والحديث عن الدول الغنية ، بس لعلمك مافي دول نشات غنية ، انما تراكم الثورات نتج عن تعب ومجهود وعمل متواصل ، اوربا الغنية المتعلمة القوية ، من قرون بسيطة كانت فقيرة جاهلة ضعيفة والدول العربية الفقيرة الجاهلة الضعيفة كانت من قرون غنية قوية عالمة ، اليابان دولة فقيرة بالموارد الطبيعية ومع ذلك عملت ب50 سنة نجاح قياسي ، اشتغلو وفكرو وتعبو واجتهدو وبالنهاية حققو اهدافهم ودول شرق اسيا بتعمل شيئ مقارب اما الانسان باميركا الجنوبية وبافريقيا بصفة عامة واقف بدو العالم تيجي تبني الو دولتو وتعملو بني ادم متحضر ، لا كرامة لانسان ينتظر معونة غذائية كيف العالم ناطرة منو يشارك بركب الحضارة والتقدم ،
- الدول الفقيرة، اللي انت طلعت كريم معي بالنقاش وقلت تم ابتلائها بالحروب ، نفس الحروب كانت موجودة باميركا بين الهنود والانجلو سكسون وبعدها حروب بين الشمال والجنوب (الغزاة مع بعضهم) وبكل بقعة في العالم ، أخيرا رح قلك ، الحروب من صنع البشر بدول فقيرة او غنيه ،،، حتى الحروب اللي خاضها البشر تحت اسم الله .