نقطة أولى... أبو نهلة عم تحمّل أوربا أكثر من طاقتها و أكثر من مسؤوليتا بكتيييييير.. التصنيف تبع الغرب بكامل أشكالو شكل واحد مانو مزبوط... بشكل أو بآخر, الدول الأوربية مغلوبة على أمرها بدرجات متفاوتة, و محكومة بالاستابليشمنت الامبريالي بالفرض و بالقندرة... و هالشي فرض تاريخي متلو متل الاستعمار..
أوربا مدينة للولايات المتحدة بكميات هائلة من المال و العتاد و المساعدات.. لما انعمل مشروع مارشال لاعادة بناء أوربا بعد الحرب العالمية الثانية, ما انعمل لأنو الأميركان بيحبو الأوربيين (ذاتا الأميركان ما فاتو عالحرب الا لما شافو انو في تهديد حقيقي لمصالحهون.. بعد ما كانت فرنسا محتلة و لندن آكلة قصف بصواريخ الـ V2 لشبعانة.. ) انما انعمل لحتى تكون القارة العجوز محكومة فيهون و مربوطة فيهون لمية سنة لقدام أو أكثر...
مافي هلأ صناعة أوربية واحدة (عم نحكي عن صناعات ثقيلة و عليها العين) مانها محكومة من قبل الأميركان بدرجة أو بأخرى.. عندك الآيرباص مثلا.. أميركا ضامنة انو عندا أكتر من 10% من مكوناتها من انتاج أميركي, و بالتالي ما بيصير تنباع طيارة وحدة دون موافقة اميركا (و هلأ الطيارات اللي ساركوزي رح يبيعهون لسوريا, جاية موافقة اميركا عليهون.. و هاد جزء من الخبر اللي ما بعرف ليش وسائل الاعلام العربانية مخبيتو), و أوربا ما فيها و لا رح يكون فيها تنتج العشرة بالمية الباقية.. لأنو محكومة بفرض الاقتصاد..
عندك داخل الاتحاد الأوربي محورين... أنصار أوربا, اللي هنن غالبا أحزاب الاشتراكية الديمقراطية و كتل البلدان الأوربية الكلاسيكية ما عدا بريطانيا, و عندك اللي اسمهون (الشكوكين أو غير المقتنعين: Eurosceptics)و هنن بريطانيا, بولونيا, هولندا, و أغلب دول أوربا الشرقية (و عندك اللي بدو أوربا قوية لكن بشرط تكون ضمن الاستابليشمنت الامبريالي و هنن اليمين المحافظ أمثال ساركوزي و ميركل) ... هدول بيدافعو عن انو أي اتحاد أوربي و ضروب و طراح.. لكن لكل واحد تحالفاتو الخاصة و قصصو الخاصة, و الاتحاد الأوربي بدل ما يكون مشروع اتحاد قوي لازم يكون مجلس جمعة شباب كل فترة مشان نقضي ويك اند حلو بشي مدينة.. بينما انصار أوربا هنن اللي راهنو على توحيد الاقتصاد.. و يعني جعل أوربا كتلة قوية على عكس ما هيي هلأ .. الاتحاد الأوربي هلأ كتلة هشة جدا كقوة قرار.. لأنو كل يغني على ليلاه.. و خصوصا بما يخص السياسة الخارجية... عندك من التبعية اللامحدودة للولايات المتحدة من قبل بريطانيا و دول أوربا الشرقية -هدول عظام رقبة الامبريالية صارو
- للموقف المعاكس تماما اللي بتلاقيه هلأ بهاللحظة ممثل باسبانيا (كون بوش زعلان و ما بدو يحكي معنا.. مقاطعنا
).. و الشي اللي ما منقدر ننكرو بهاللحظة هو انو قدرة أوربا على المناورة محدودة جدا, و خصوصا بمواجهة الولايات المتحدة.. و راح اعطيك مثال..
أول ما صار في عملة موحدة.. كانت أرخص من الدولار, منيح؟ و كان التوازن التجاري بتحسّن و ماشي حالو ... صار انو بالـ 2002 صار في نزاع اقتصادي بين الاتحاد الأوربي و أميركا (بصراحة ما بتذكر بالضبط ع شو) و شو عملت أميركا؟ فرضت ضريبة صغيرة كتير كتير على الوارد الأوربي على أميركا من الحديد (أوربا مصدّر كبير للحديد الخام لأميركا), يعني ضريبة تافهة كتير! أثر هالضريبة خلا اليورو يطلع فوق الدولار بفترة قياسية.. مع ما يعني هالشي من اختلال التوازن التجاري بالاتجاه الأميركي و التضخم الاقتصادي اللي هلأ هالك نفس أوربا...
بقصد من هالكلام... انو بالضغط أو التأثير... ممكن أي دولة خليجية ان قطعت النفط عن أميركا تأذيها أكتر من كل أوربا مجتمعة بالفترة الحالية, لأنو من أيام مشروع مارشال ربطوهم بالسلاسل.. و ما بخفيك في جزء كبير عاجبتو هالسلاسل اللي مربوط فيها ع أميركا... لأنو حاسس فيها ربط مصير مع دولة عظمى و حاكمة العالم, و يظل هالربط أحسن من الرهان على المجهول (هاي نظريات أثنار و شلتو...)..
لكن في جزء تاني عم يحترق بداخلو عالوضع.. بدو أوروبا تكون منارة متل ما كانت, بدو غير شي.. و عم يشتغل لغير شي لكنو محكوم بالظروف متل ما انت محكوم بالظروف و متل ما أنا محكوم بالظروف.. يعني خليني جيبلك مثال ثاباتيرو مثلا... يا أخي عندو دولة.. شو بدو يساوي؟؟ اللي بايدو عملو و انصب عليه جام غضب الامبريالية بكل قوتها (امبارح عم اسمع صحفي من أصل كوبي عايش بميامي عم يقول انو سألوه انو مين بدك يموت قبل ثاباتيرو و للا فيديل كاسترو؟ اجا قال انو لأ خلي فيديل يموت بسرعة لأنو حرام هاد شيخ.. بس ثاباتيرو الارهابي خلي يجيه سرطان و يموت ببطء.. تسالي أكتر) .. فبعتقد انو موقف الشعب الاسباني هو أقصى ما يمكن فعله في هذه الظروف.. و ما بأيدو يعمل أكتر .. و بالتالي لو كل واحد يعمل أقصى ما يمكنه عمله كان يجوز مشي الحال.. يجوز انت ما فارقة معك بليرة انو يكون طالع الجيش من العراق كقرار أول الو.. و انو هالأمر كلفو عداوة أنصار أميركا داخل الاتحاد الأوربي, و انو حتى أخلاقيا كان ردة فعل تستحق الاحترام.. بس أنا بعتقد انو يستاهل رفع قبعة... لأنو ما بتذكر بالتاريخ انو شعب خجل من حاكمو لأنو أذى غير شعب..
عدا عن انو في اعتبارات سياسية لازم تؤخذ بعين الاعتبار.. يعني بالنهاية الحاكم هو حاكم لشعبو, و الخطاب السياسي يكون بالداخل و للداخل.. و مو كل شي سياسة خارجية... و هاد سبب كتير لوجود حكام يجوز انت بمنظورك أسوء من الكلاب الجربانة عالعرب.. لكن هنن حكام لشعبون. .ازا منيحين بمنظور معين مع شعبون.. ما فيك تطالب انو يكون منيح معك بنفس القوة... و لما شعب يطيّر حاكم كان منيح معو (بالمنظور الاقتصادي للطبقة الوسطى فما فوق.. أثنار كان كبير كتير و أعاد الاقتصاد الاسباني الى الواجهة) بس لأنو كان عاطل معك... فيجوز بدها وقفة و صفنة.. هل يا ترى انت رح تعمل نفس الشي لو كنت مطرحو؟؟