اقتباس:
لأن جسمك ما بستفاد غير من ثلث الكمية الي بتشربها
أما البقية بصرفها جسمك للخارج ع شكل عرق أو بول
و لحتى جسمك يستفاد من كل الكمية الي بتشربها
|
هيك ع هامش نصائح محمد ابراهيم الصيامية..
عندي تساؤل حول انو ليش معتبرين البول و التعرّق هو عدم استفادة من الماء؟ ما هدول وظائف أساسية جدا جزيلا للماء بجسم الانسان عدا التوازن الهيدروألكتروليتيكي (و حياتكون هيك اسمو ما عم اخترعو
)
البول مانو طرح ماء زائد مانك بحاجتو.. مع كل ليتر بول عم تطرح كمية من الشوارد و العناصر اللي لازم تنطرح بر اجباري, و مشان تنطرح لازم تطلع مع ماء.. (قصدي من هالكلام انو غلط انو الواحد ما يشرب مشان ما يبول, لأنو البول مانو مجرد طرح ماء زايد عن حاجتك كان ممكن ما تشربو).
لذلك.. اشربو و اشربو و اشربو (مو بجنان.. بس ازا عطشان اشرب.. العطش هو نظام انذار مبكر بيقلك انو جسمك محتاج يشرب.. و يجوز محتاج يشرب مشان يطرح فضلات عن طريق البول).
أما التعرّق.. هالأمر المزعج... فألله يخليلنا ياه لأنو بدونو كان فطسنا من زمان
في طريقة بنصحها دايما لجماعة الريجيم (و أنا ما بطبقها.. بس نافعة جدا) هو انو ازا بتحس انو ما قادر تضبط نفسك و تاكل كتير و انت جوعان.. فقبل الأكل خدلك كاسة عصير كبيرة (أو أي سائل تاني مانو مي, الشوربة بتنفع كمان) و انطرلك دقائق قليلة قبل ما تبلش هجوم... بينفعك بتعويض السوائل و بينفعك مشان ما تاكل كتير.
التفسير العلمي لشغلة كاسة العصير: الجهاز العصبي يستقبل رسائل الشبع بجانب كبير عن طريق "قياس" مدى تمدد المعدة بسبب الأكل اللي فيها.. هالرسالة مانها آنية انما ممكن تتأخر لحظات أو دقيقة دقيقتين (لأنو مانو منعكس عصبي بحت انما في تداخل هرموني بياخد وقت) .. فلهالسبب انت بتكون دحيتهاو وصلت لحجم معدة ملائم لحتى تكون شبعان بس جهازك العصبي لسى ما وصلتلو الرسالة لذلك تكمّل أكل.. فلبين ما توصل الرسالة تكون قضّيت دقيقة و نص تقريبا أكل زايد عن اللزوم (و لذلك بعد ما توقف أكل بدقيقة دقيقتين وقت "بتكبس أكل" بتحس حالك رح تنفجر...
لنفس السبب السابق لما تكون عطشان كتير و تمسك قنينة مي ام الليترين وتبلش تشرب بجنون و بسرعة بس تخلص تحس بطنك توجعك... لأنو مديت معدتك أكتر من حاجة جسمك من الماء و جهازك العصبي ما لحق ينبهك انو أخد حاجتو و ما بدو أكتر (لذلك, خصوصي لما تكون عطشان كتير.. اشرب مي كتير أوكي بس شوي شوي.. نص كاسة, عشرين ثانية, نص كاسة تانية... و هكذا لبين ما ترتوي)
كاسة العصير الكبيرة و انتظار فترة زمنية قصيرة هيي مشان التمدد اللي رح يصير بسبب كاسة العصير يوصل للجهاز العصبي, و نسبة التمدد اللي بتوصللو قبل ما تبلش أكل هي اللي رح توفرها بعدين.. و ما تحس حالك رح تنفزر
جربوها و ادعولي
